Read Angami Naga Ezekiel 34 Bible Online

Ezekiel 34 - Angami Naga bible

Ezekiel 34

¹Jihova die a ki vor di sie:

²Themiau, Israel kepfheu petsoukecü siedzekesidie pushücie: Siedzekesidie pushülie sidi uko kepfheko ki Niepu-u Ukepenuopfü hakemhie puya: He-i, nie Israel kepfheko nie thuo nie vachü tuote! Kuopfhemia tekuoko vachükecü mese moü me?

³Nieko puo shuo cüya, nieko chümie pfhe dzieya, nieko khunuo keluoko dukhriwaya; derei tekuoko we vachüya mo.

⁴Nieko thachükebako chü kemeteishü mote, nieko kesuokenyüko chükeshürhoshü mo, nieko rüzapfü phashü mo, nieko yotuoketako ze la vorshü mo; nieko jüketako pfhü mo, derei mia kemvüchü mu nie zho suo se di uko kekhaya.

⁵Süla ukoe ta cürete, kekreilamonyü uko kepfhemia puorei ba moketa la; sidi cüretuote; sidi ukoe lie nu nhachü pete ca chütuote.

⁶A kuoko cüretuote, uko kijüthou pete mu kijükhru pete gei rühoutuote, a kuoko kijü zie pete gei cüretuote, miapuorei uko pfhü morei uko siepie vo mo.

⁷Süla nie kuopfhemiako, Jihova die rünyüliecie;

⁸Niepu-u Ukepenuopfü puya: Kekreilamonyü a kuoko mia chüte chüte, mu a kuoko u kepfhe kejü la nhachü pete ca chütuote, kekreilamonyü a kuopfhekoe a kuoko pfhü mote; derei kuopfheko u thuo u vachü di a kuoko vachü mote.

⁹Süla, nie kuopfhemiako; Jihova die rünyüliecie:

¹⁰Niepu-u Ukepenuopfü hakemhie puya; Ae kuopfhemiako petsouya; mu a kuoko uko dzienu nu chatuo; sidi uko bu tekuoko vachü sa motatuo, kuopfheko rei u thuo u vachü sa motatuo. A uko me nunu a kuoko kelalietuo, sidi uko bu uko kecüca chü sa motatuo.

¹¹Kekreilamonyü Niepu-u Ukepenuopfü hakemhie puya: A thuo a kuoko pfhütuo, sidi uko ngulietuo.

¹²Kuopfhemia puoe tekuo kroko donu yotuoketa kuoko pfhüyakezha tuoi, sütuoi a rei a kuoko pfhülietuo. Sidi kimhoushü ketuo teiki mu teizeibouikecü teiki uko cüretuoketa thechü pete nunu uko kelalietuo.

¹³Sidi a themiako donu nu uko ze vorlietuo mu rünako nunu uko pfhü kengulietuo, sidi uko ze uko kijü nu la vortatuo; mu kerükhie Israel kijüthouko geinu, tsiu themia lhou keba thechü pete nunu uko vachüshütuo.

¹⁴A nha kevira nu uko vachütuo, mu Israel kijüthou kerükrieko geinu uko nhalie cütuo, uko bu nha kepejo kevira zhütuo, tsiu Israel kijüthouko gei nha kevira nu uko vachülietuo.

¹⁵A a thuo a kuoko kepfheu chütatuo, sidi a uko bu zhülietuo, Niepu-u Ukepenuopfü siya.

¹⁶A jüketako pfhütuo, mu a yotuoketako ze la vorlietuo; mu a uko rüzako phashütuo, tsiu thachüketako chü kemeteishütuo, derei kekuoko mu kemeteiko a pekawatuo. A kethoca se uko vachütuo.

¹⁷Siro nieko la we, a kuoko, Niepu-u Ukepenuopfü hakemhie puya: A tekuoko mu tekuoko donu, tekuochüko mu mvüdoko donu dienya kecütuo.

¹⁸No nha keviko cülie derei n phi pie n nha cü kepeshako kedewa die? No dzü kemesa krielie di n phipie kriekepeshako pekriewa die?

¹⁹Siro a kuonuoko n phi pie kedekewako cülie vi, mu n phi pie dzü pekriekewako krielie vi me?

²⁰Süla Niepu-u Ukepenuopfü uko ki hakemhiekecü puya: A a thuo tekuo keluoko mu keweko donu diekecütuo.

²¹Kekreilamonyü nie likhei mu nie bouka se newaya, sidi kethachüko whuopie ta kepetse nu shüwa kemochie nie kiako pie kethachüko thuba tsoya.

²²A a kuoko kelalietuo, mu uko mhakipuorei mia chüte chütalie lho; mu a tekuoko mu tekuoko donu dienya kecütuo.

²³A uko kepfhe puo khapie bawatuo; a kituou David uko va chütuo; puo uko vachütuo mu uko kepfheu chütuo.

²⁴Siro a, Jihova thuo uko Kepenuopfü chütuo, mu a kituou David bu uko donu kediu chütuo, a Jihova thuo pushüte.

²⁵Siro a uko ze di vitho diekho puo chütuo, sidi khunuo kekhrie kezeiko bu uko kijü nu ba sa motatuo, sitse uko nha nu lhou balietuo mu khrukhre di ketsa nu zezhülietuo.

²⁶A uko mu a kijükhru khieümhou keba pete chüpie theja pfülietuo; mu a puoteiki tei bu rütsurtuo; theja teirü vortuo.

²⁷Siro lie nu seiboko u si vülietuo, mu kijüu si kramiemielietuo. Ukoe uko kijü khrukhre di tshüümhie balietuo; ae uko vocie phau phreiwa, mu uko pie u die kechümia dzie nunu uko kelashü tse, ukoe a Jihova zo ücü silietuo.

²⁸Seyieko uko peka salie lho, morei kijü nu khunuoko uko mezu salie lho; uko khrukhre di lhoutatuo, mu miapuorei uko bie kemichie salie lho.

²⁹A uko la nha kekra pelhoushütuo uko bu kijüu gei merü di rühouta molieketuo la, seyieko uko kenyakecü nunu uko bu kemezhie salie lho.

³⁰Ukoe a Jihova uko Kepenuopfü, uko zetuo zo ücü silietuo, mu uko sü Israel kiu, a themia zo ücü silietuo, Niepu-u Ukepenuopfü puya.

³¹Nieko a kuoko zo, a nha kepejo nu ketuo kuokuo[63] mu a nie Kepenuopfü zo. Niepu-u Ukepenuopfü siya.