Read Angami Naga Ezekiel 35 Bible Online

Ezekiel 35 - Angami Naga bible

Ezekiel 35

¹Jihova die a ki vor di sie:

²Themiau, n zie pie Seir kijüthou petsoulie, sidi süu petsoukecü siedzekesidie pushülie.

³Sidi süu ki, Niepu-u Ukepenuopfü hakemhie puya: Seir kijüthou; a n petsouya; a n chü kemethuo mu perawaketuo la a dzie yhapie n petsouya:

⁴A n rünako chü pekawatuo; noe methuotatuo, sitse noe a Jihova zoücü silietuo.

⁵Noe thiedzü mia pese kevor-u n neite, mu Israelmia kemezhiekecü ki, uko pechükecü thelau teiki, uko khapie zhiecha kekuou tsüwaketa la.

⁶Süla, Niepu-u Ukepenuopfü puya, a rheiketuo tuoi a nieko la thezie keseshütuo, mu thezie nieko whuotuo; nieko thezie kepekru ngumecüya mokecü la, theziekepekru nie whuotuo.

⁷A Seir kijüthou-u bie pera mu bie kemethuoshütuo; mu a sügei themia kevorko mu la keprako dathewatuo.

⁸A puo kijüthouko gei dukhrikewako pie tshuwatuo, tsiu n kijüthouko gei, tsiu n razhako nu, razha nu mu n rü peteko nu zhiecha geinu siaketako tetsu zhütuo.

⁹A n chüpie n bu kechachie methuotatuo, tsiu n nadiko nu mia lhou lalie lho. Sitse noe a Jihova ücü silietuo.

¹⁰Kekreilamonyü no sie, “Seyie hanieha siro rüna hanieha a vie zo, mu we uko vieko pevielietuo,” siya. Süu Jihova sünu ba zorei,

¹¹süla, Niepu-u Ukepenuopfü puya, a rheiketuo tuoi, n nouyie mu mia ngu n rokecü thakeshü mhie di n gei mhachüshütuo, kekreilamonyü nie uko ngumecükecü la, mu a nieko dienya kecücü ki a thuo a pie nie pesishütuo.

¹²Siro noe a Jihova zo ücü, no Israel kijüthouko petsou di mia tha di sie, “Uko methuo zhüte, uko pie u bu uko mezulietuoü khashüte,” idi kepu pete silietuo.

¹³Siro no n tie pie a petsou di n thuo n chü kemeyieya, mu n die kekra pie a petsoute; a süu sishüte.

¹⁴Niepuu Ukepenuopfü hakemhie puya: Kijüu pete u nei keba mhie, a n chü kemethuowatuo.

¹⁵Noe Israel kiu peviekelie la, süu methuo zhüketa la n nei keba mhiei, a n gei sükemhie chüshütuo; Seir kijüthou-u, mu Edom pete, tsiu sünu keba pete, chü kemethuowatuo. Sitse ukoe a Jihova zoücü silietuo.