Read Angami Naga Ezekiel 36 Bible Online

Ezekiel 36 - Angami Naga bible

Ezekiel 36

¹Siro no, themiau Israel kijüthouko ki siedzekesidie pushüliecie, sidi sie: He-i Israel kijüthouko, Jihova die rünyüliecie.

²Niepu-u Ukepenuopfü hakemhie puya: Kekreilamonyü ngumvümia n dze pukecü, “Yha” si, tsiu sie “Keriekimia thechü kerükrieko rei hie vie chüte” siya.

³Süla siedzekesidie pushücie, sidi sie, Niepuu Ukepenuopfü hakemhie puya: Kekreilamonyü uko n chü kemethuowate, mu lutsa hatsa pete n bietshewate, süla n bu seyie kekreiko pete vie chüte, tsiu noe mia bu n dze kepu sikecü vie puo chüte mu themia donu uko pu pesuo bate.

⁴Süla, he-i Israel kijüthouko, Niepu-u Ukepenuopfü die rünyüliecie, Niepu-u Ukepenuopfü kijüthouko ki, kerüko mu razhako ki, kijü khawa di methuo zhüketako mu kijükesia rünako ki, seyie u khie u mhou houpfü kebako pete mhodzüki u chüte chü tsiu miakrenyü chü batakecüko ki puya.

⁵Süla Niepu-u Ukepenuopfü hakemhie puya: A a nou a ro se di seyie kepeshako petsouya, mu Edom pete u nou u nei kebako mu mia pese di a kijü liepie u vie chülietuoü kebako, kekreilamonyü puo nhakepejo ra, süu pekawatuoü siekecü la.

⁶süla Israel kijüu la siedzekesidie pushülie, mu kijüthouko mu kerüko ki, kerüko mu razhako ki pushülie, Niepu-u Ukepenuopfü hakemhie puya; Ae a rokecü nouyie se di diepushüzhie, kekreilamonyü nieko seyieko bu nie kenyakecü la kemezhielie.

⁷Süla Niepu-u Ukepenuopfü puya: Seyie nie khieümhou houpfü kebako u thuo thenga chü di kemezhielietuo.

⁸Derei no we, he-i, Israel kijüthouko, n coko pouparlietuo, mu n si vüpie a themia Israelko tsütuo; ukoe kinu vortaketuo la.

⁹Siro harie, a n lanu zo; a rürei n kitsa vortuo, mu nieko liecielie di tsia prushülietuo;

¹⁰mu a n nuolhou chü pekrashütuo, Israel kiu pete, süu pete rei zotuo; rünako nu themia lhou lalietuo mu razhüketa thechüko chüpiesie lalietuo;

¹¹mu a themia mu khunuoko bu nieko gei kra parlietuo. Ukoe kruolie mu u si rüchülietuo; sidi kerieki mhie a nieko bu lhou lalietuo, mu a thiedzü kirei nieko gei mhakevi chükuo sashütuo. Sitse niekoe a Jihova zoücü silietuo.

¹²A mia bu nie chathatuo, a themia Israel, mu uko nie pevielietuo, mu nieko uko kayie chütuo. Nie uko nuonuoko la thenousuo salie lho.

¹³Niepu-u Ukepenuopfü hakemhie puya: Kekreilamonyü uko n ki, “No themia mezulieya, tsiu no seyieko nuonuo bu thenoukesuo nguya” isi.

¹⁴Süla no themia mezu salie lhote mu n seyieko nuonuo bu thenousuo salie lhote. Niepuu Ukepenuopfü siya;

¹⁵tsiu a n bu seyieko n kengakecü die si salie lhote, tsiu n seyieu bu tetsuketa chü salie lhote, Niepu-u Ukepenuopfü siya.

¹⁶Jihova die a ki vor di sie:

¹⁷Themiau, Israel kinuko u thuo u kijü nu lhoukelie ki, uko u thuo u zhoko mu uko mhathoko geinu süu perhuwaya; uko zho-u a mhodzü ki thenumia kerhu se ba di mesa mo keba ki mhie zo.

¹⁸Uko kijüu gei thezie pekrukecü la, mu uko terhuorhi se süu perhukewa la a nouyie rupie uko gei shütuo.

¹⁹A uko bu seyieko donu cüretuotatuo, mu uko bu rünako nu ta votatuo; a uko zho ki ze mu uko mhathoko kize uko dienya kecütuo.

²⁰Derei uko seyieko nu kevor ki, uko thuo kehoura vo zorei, uko a za kemesau perhuwa, süusü uko pukecü, “Hako Jihova themia we, sizoshierei uko bu puo kijü nu tuoprate” isiya.

²¹Derei a za kemesau la a nounyüya mu Israel-e puo vokecü seyieko do nunu a za perhuwate.

²²Süla Israel kinuko ki pushücie, Niepu-u Ukepenuopfü hakemhie puya: He-i Israel kinuko, a mhachüshütuoü kezhü hauha nie la mo ho, derei nie vorkecü seyieko donu nu perhukewau, a za kemesau la chüshütuo.

²³Siro uko donu nu perhukewau, a za kezhau chü kemesashütuo, sitse seyieko a Jihova zo ücü silietuo, Niepu-u Ukepenuopfü siya; a nie geinu a kemesau uko mhingu kinu tha pekiekeshü ki.

²⁴A seyieko donu nu nieko zelietuo, mu rünako pete nunu nie pfhü kengulietuo, tsiu nie ze nie rüna nu la vorshütuo.

²⁵A dzü kemesa kegepie nie vashütuo, sitse nieko mesa kemo kheko nunu mesalietuo, tsiu terhuorhiko pete nunu a nie chü kemesalietuo.

²⁶A thenou kesa puo khapie nie tsütuo mu ruopfü kesa puo pie nie gei shütuo; siro a nie geinu ketsie mhiecü melou-u chüwatuo, sidi thenou kemene khapie nie tsütuo.

²⁷A a ruopfü pie nie nou shütuo, sidi nie bu a zhoko medzilietuo mu menuo di a kepetha khakeshüko zelietuo.

²⁸Sitse a pie nie puonuoko ketsü kijü nu lhoulietuo; sidi nieko a themia chülietuo, mu a nie Kepenuopfü chütuo.

²⁹A nieko mesa kemo kheko nunu nieko kelalietuo. Sidi a lhacülhale kieshütuo tsiu süu chü pekrashütuo mu pekrie puorei khapie nieko geishü lalie lho.

³⁰A seibo bu puo si vü parlietuo mu lie bu vi philietuo, sitse niekoe seyieko donu nu pekrie la kemezhiekecü ngu lalie lho.

³¹Sitse nieko nie kerüzhü zhoko mu nie zhokesuoko rükralietuo; sidi nie kephoumako la mu mha kerütsekecüko la nie thuo nie ngu mecütatuo.

³²Siro hauha nie la a mhachüshü moükecü nieko thuo siliecie, Niepu-u Ukepenuopfü siya; he-i Israel kinuko nieko zhoko la menga mu nie ziejüliecie.

³³Niepu-u Ukepenuopfü hakemhie puya: A nieko kephouma nunu nie chü kemesakelie teisozha nhie, a rünako nu nie bu lhou lalietuo, mu razhüketa thechüko chü piesie lashütuo.

³⁴Kijü mia puo pfüthe kevomia mhodzüki we khakewa vie puo chüzhüketako cie lalietuo.

³⁵Sitse uko sie, “Kijü khakewa puo chüzhüketa hau Eden tezieu mhie laliete; tsiu razhüketa mu methuoketa tsiu pekakewa rünako themia lhouliete mu dahou kemetei chü laliete” situo.

³⁶Sitse seyie nie khie houpfü keba pete rei a Jihova thuo pekakewa thechüko chü lashü mu methuo zhüketa gei mha pelhou lashüketa silietuo; a Jihova thuo hau chüshütuoü di pushüte.

³⁷Niepu-u Ukepenuopfü hakemhie puya: A Israel kinuko bu a ki mha hau uko la chü sashünu di chalie nu putuo; uko nuolhou chü pekrapie tekuo krodi tuoi shünukecü.

³⁸Tekuo kemesa kro-u tuoi,[64] Jerusalem nu pethokeshü nyiko nyikecü ki tekuo kro-u tuoi shütuo, sidi pekakewa rünako nu themia kro bu ketshu chülietuo. Sitse ukoe a Jihova zoücü silietuo.