Read Angami Naga Ezekiel 37 Bible Online

Ezekiel 37 - Angami Naga bible

Ezekiel 37

¹Jihova dzieu a gei vor, mu puoe Jihova Ruopfüu geinu a piesiepie razhau metsuo nu shüwa; sünu theru thuo tshupfüzhü.

²Puo a ze süu whi vo; mu razha nu theru kekra tshupfüzhü, mu süko sotoi zo.

³Puo a ki, “Themiau, theru hako rheilie vi me?” si. Sitse a puo die kela di, “He-i Niepu-u Ukepenuopfü, no si ba” sishü.

⁴Sitse puo a ki, “No theru hako ki siedzekesidie pushülie, sidi uko ki: He-i theru sotoi kezhüko, Jihova die rünyüliecie.

⁵Niepu-u Ukepenuopfü theru hako ki hakemhie puya: A kerhei thesü pie nie nou shütuo, sitse nieko rheilietuo.

⁶A unyhiero chüpie nie gei shütuo, mu u chü bu nie gei vortuo, sidi nie zhü bu nie whelietuo, mu kerhei thesü[65] pie nie nou shütuo, sitse nie rheilietuo, tsiu nieko a Jihova zo ücü silietuo” si.

⁷Süla punukeshü mhie a siedzekesidie pushü, ru mhapfhe puo mhai zo di parta, mha kekrokecü pfhe mhieicü puo, sidi theruko vo kengulie, puo ru vo puo ru gei idi.

⁸Sidi a meho sie ru, uko gei u nyhieroko bata, mu puo chü uko gei vorta, tsiu puo zhü uko whelieta; derei uko gei kerhei thesü tuo mo.

⁹Sitse puo sie a ki, “Kehau ki siedzekesidie pushücie; siedzekesidie pushülie, themiau, sidi kehau[66] ki: Niepu-u Ukepenuopfü hakemhie puya: Teikhrie diako geinu vorliecie, he-i kehau, sidi siakezhü hako gei keha khashü di uko bu rheiliecie” sishü.

¹⁰Puo a ketsekeshü mhie di a siedzekesidie pushü, sitse uko gei keha thesü vorlie, uko rhei parta, mu uko phi sa siethalie, sidi krodi kezha puo chüta.

¹¹Sitse puo a ki, “Themiau, theru hako Israel kikru pete te. Uko sie, ‘Hie ruko sotote, mu hie kemerü jüte; hieko dathe tseiwate’ isi.

¹²Süla siedzekesidie pushücie, sidi uko ki, Niepu-u Ukepenuopfü hakemhie puya: A nieko mekhruko hielashü di nieko mekhru nunu nie ze la parshütuoüzhie. He-i a themiako; sidi a nieko ze Israel kijü nu la voshütuo.

¹³Sitse a mekhru hielakeshü ki, mu nie mekhru nunu nie sesierkeshü ki, a Jihova zo ücü silietuo, he-i a themiako.

¹⁴A a ruopfü pie nieko nou shütuo, sitse nie rheilietuo, tsiu a nie khapie nie kijü nu lashütuo, süze niekoe a Jihova thuo pushü di süu chüketuo” silietuo.

¹⁵Siro Jihova die a ki vor di sie:

¹⁶Themiau, kethe puo chülie sidi sügei mha haicü thulie, “Juda la, mu puo ze di Israelmiako la,” isikecü, süsie kethe kekreipuo rei chü lalie sidi süu gei rei haicü thu lashülie, “Josef la (Efraim theu) mu puo ze di Israel kinuko pete la” isi cü;

¹⁷sidi sünie kemapie kethe puo chüwalie, sitse uko n dzie nunu puo chü parlietuo.

¹⁸Siro n themiako n ki, “No mha hako puoca kedipuo shi thashü hie kie lhoü me?” isikesie ki,

¹⁹uko ki pushülie, Niepu-u Ukepenuopfü hakemhie puya: A Josef theu pielietatuoüzhie (süu Efraim dzienu kebau) mu Israel seyieu puo ze kebako sa di, sidi a Juda theu pie sügei shüwatuo, sidi uko bu keze kethe puo chütatuo, uko bu a dzienu keze kethe puo chütaketuo la.

²⁰Siro no kethenie gei mhathukeshünie pie uko mhingu nunu

²¹uko ki pu di, Niepu-u Ukepenuopfü hakemhie puya: A cüretuoketa seyieko donunu uko zelietuo, mu thechü pete nunu rei uko pfhü kengulietuo, sidi uko ze la uko kijü nu vorshütuo.

²²A uko kijü nu, süu Israel kijüthouko geinu uko chüpie seyie puo chüshütuo; siro kedi puo bu uko mho dituo. Uko bu mhakipuorei seyie kenie chülie lho mu uko bu mhakipuorei kedi kenie chülie lho.

²³Uko mhakipuorei terhuorhiko mu uko mhatho kerütsekecüko, morei uko kejokemou puorei se uko perhu salie lho. A uko phoumawa di tetsuketa nunu uko kelalietuo, sidi uko chü kemesawatuo. Sitse uko a themia chülietuo, mu a uko Kepenuopfü chütuo.

²⁴A kituou David bu uko mho kedi chütuo; mu uko pete rei u kepfhe puo ngulietuo. Uko a zhoko medzilie mu menuo di a diekhakeshüko zelietuo.

²⁵Ukoe a pie a kituou Jakob ketsü nie puotsanuoko lhoukecüra lhoulietuo, uko mu uko nuonuoko tsiu uko tsunuoko sünu kechachie lhoutatuo; mu a kituou David kechachie uko kediu chütuo.

²⁶A vitho diekho puo uko ze chütuo; süue kechachie dietseidiekho puotuo, tsiu a japie uko tsütuo mu uko chü pekrashütuo, mu kechachie a kemesachüu pie uko donu bawatuo.

²⁷A kebachüu uko ze sei tuotuo, mu a uko Kepenuopfü chütuo, mu uko a themia chütuo.

²⁸Sidi a kemesachüu pie uko donu kechachie bata tse, seyiekoe a Jihova Israelmia chü kemesakeshüu ücü silietuo.