Read Angami Naga Ezekiel 39 Bible Online

Ezekiel 39 - Angami Naga bible

Ezekiel 39

¹Mu no, themiau, Gog petsou di siedzekesidie pushülie, Niepu-u Ukepenuopfü hakemhie puya: Harie Gog, Meshek mu Tubal kedinuo nie mho kedi kezhau a n petsouya!

²A n shükewhishü di n bu pedzütsa votuo tsiu pesotsa nu n ze vorlietuo, a sidi n chatha ze Israel kijüthouko petsou votuo.

³A n dzie n vitsa nu n theü vüshütuo, sidi n dzie n zatsa theütsieko bu tetsutatuo.

⁴No Israel kijüthouko geinu tetsutatuo, no mu n zeketuo chüpahi kro-u n ze ketuo peteko, a n khapie pera neiünei tsiu nha nu khunuoko bu cülienu shüwatuo.

⁵No phouyo nu tetsutatuo; kekreilamonyü a pushüwate, Niepuu Ukepenuopfü siya.

⁶A mi ketsepie Magog mu dzükezha khie thechüko nu lhou khrukhre kebako gei shütuo; sitse ukoe a Jihova zo ücü silietuo.

⁷Siro a themia Israelko donu a za kemesau pesishütuo; tsiu a za kemesa perhu salie lho, sitse seyiekoe a Jihova, Israel nu Kemesau ükecü silietuo.

⁸Süu vorte! Süu chü parte, Niepuu Ukepenuopfü puya. Hau a pushüwaketa teisozhaute.

⁹Sitse Israel nadoko nu lhou kebako tuo partuo mu rünyieko se mi chüshü di süko thewatuo, keya vieko mu pezhüko, theü mu theütsieko, thezeyakezha vienyako mu rüngouko, sidi ukoe cie thenie süko se mi chütuo.

¹⁰Uko vo nha nunu seidei rielie lho morei ketsa nunu seibo puorei wilie lho, kekreilamonyü uko rünyieko se mi chütuokecü la, ukoe uko pekakecümia pekatuo, mu uko vie vakeliemia vie valalietuo, Niepu-u Ukepenuopfü puya.

¹¹Sünhie a Israel nu mekhru chüketuo la thechü puo pie Gog tsütuo, süusü dzükezha niathutsa keba Rüvemia Razhau, kekreilamonyü sünu nu Gog mu puo kro-u pete khruwatuo; razha süu üse Hamon-gog Razhau ütuo.[70]

¹²Siro khrü thenie se di Israel kinuko süko khrutuo, kijü chü kemesawaketuo la.

¹³Kijüu nu themia pete süko khrutuo; sidi a zayie pesikeshü tei nhie süko therhu pfülietuo, Niepu-u Ukepenuopfü siya.

¹⁴Sidi ukoe themia keda pekreilie di ketsepie kijüu pfüthe vo kijü penyü kevor[71] peshapie kijü zie gei kezhüko khrutuo, sidi süu chü kemesatuo, siro khrü thenie se süko pfhüwatuo.

¹⁵Siro mha pfhü yakezhamia[72] huo kijüu pfüthe vokecü ki, kehoupuorei theru huo ngu ro süki nu zasi puo khapie batuo, mia khruyakezhako süu pie Hamon-gog Razhau nunu khruwa kemochie si batuo.

¹⁶(Hamona[73] nadiu rei sünu ba.) Hamhie di uko kijüu chü kemesawatuo.

¹⁷Siro no we, themiau Niepu-u Ukepenuopfü hakemhie puya: Teira kehoupuo ki rei, mu nhachü kehoupuo ki rei pushücie: Nie kengulie di vorliecie, thechü lutsahatsa nu vor kengulie di a nie la ruotho nyi, Israel kijüthouko geinu kesepie kebau ruothuo nyi kezhau nu vorlie, nieko bu themuo cü mu thezie krietuo.

¹⁸Nie bu kekuomia chü cütuo, mu kijüu nu kedimia zie, mvüdo, tekuo mu temvü, tsiu pedo zie krietuo, uko pete rei Bashan nu u phou kevimia phre zo.

¹⁹No pevülie kemochie puo shuoko cütuo, mu mezelie kemochie puo zieko krietuo, a nie la ruotho nyi kesepie kebau nu.

²⁰Siro niekoe a mizhü gei gura mu guragari,[74] terhümiavimia mu chüpahi neiünei ze batuo, Niepu-u Ukepenuopfü hakemhie puya.

²¹A seyieko donu a zayieu pesishütuo; sitse seyieko pete a dienyakecü shükecü ngutuo, tsiu a uko gei keshü a dzieu ngutuo.

²²Sidi Israel kinumia sünhie yawinu mu süsietsa ae uko Kepenuopfü Jihova zo ücü silietuo.

²³Siro seyieko Israel kinuko uko kephouma la kediechü voketa silietuo, kekreilamonyü ukoe a gei joümouthor tuote. Süla a uko kinu a zie kevieliete sidi uko pie u kepesemia dzienu shüwa, sidi uko pete zhiecha geinu tetsuta.

²⁴Siro a uko mesakemo kize mu uko kejokemou kize uko gei mhachüshü, sidi uko kinu a zie keviewa.

²⁵Süla Niepu-u Ukepenuopfü puya: Süsie a Jakob ruo chü pekuoshütuo, sidi Israel kinumia pete ngumezhieshütuo; mu a za kemesau la süu chü mo khrietatuo.

²⁶Siro uko ngau rükra motatuo,[75] mu a petsou di kejokemou chükewa pete rükra motatuo, uko kijü nu lhou menetshüi di miapuorei uko chüpie michie sa moketa ki,

²⁷a themiako donu nu uko ze la vorlie mu uko ngumvümia kijü nu seyie kekra kinu uko donunu a chü kemesakelie ki.

²⁸Sitse uko a Jihova uko Kepenuopfü ücü silietuo, kekreilamonyü uko bu mia die chü seyieko donu vota, mu süsie uko pfhü kengupie uko kijü nu lashüte. A uko mia puorei pie mia sie bawalie lho;

²⁹mu a mhakipuorei uko kinu a zie kevie salie lho, a a ruopfü rupie Israel kinuko gei khakeshü ki, Niepu-u Ukepenuopfü siya.