Read Angami Naga Ezekiel 4 Bible Online

Ezekiel 4 - Angami Naga bible

Ezekiel 4

¹Siro no rei, he-i themiau, Ita puo pielie, di süu khapie n mhodzünu shülie. Siro sünu nu Jerusalem nadi rhiu rhishülie;

²Sidi süu perhieketuo mhanyako chüshüliecie, süu perhieketuo la khahoulie, mu sei pe puo chüshülie, süu perhieketuo la razhüchüko chülie, di süu khieümhoura thumeketuo la seideko keselie.

³Süsie, no theginyü puo chülie di süu pie no mu nadiu nnie donu sozha chüliecie; sidi n zie bu süu petsoulie, sidi süu pie keperhieketuo thau nu balie; sidi süu neshücie. Hauha Israel kiu la zasi puo chütuo.

⁴Siro n vitsa pezhü pfüzhülie, sidi Israel kiu pejokecüu pie süu gei zhüwalie; noe uko pejokecüu toupfüketuo la teisozhako kephrü ze di süu gei zhülie.

⁵Kekreilamonyü ae uko pejoketuo teicieko kephrüde teisozhako pie n gei shüwate, zha krie se di hiethepfü.

⁶Siro no hako tseita ro, no n zatsa pezhü pfü lazhülie, noe Juda pejokecü zha hiedia toupfü; ae cie puo la zha puopuo icü chüshüwate.

⁷Siro no n zie pie Jerusalem reketuotsa valie, siro n bou whe mo di no süu petsoukecü siedzekesi die putuo.

⁸Harie, a n phawatatuo, süki noe rürei lutsa hatsa valie lho, re ketuo zhako tseilie kemochie si batatuo.

⁹Siro no thoulha mu barli, rücü, lentil, tshütienuo mu spelt selie di süko khapie mhabou puo nu shülie, sidi n thuo n la niekhrüda rieliecie. No n tseitsa nu zhüketuo zha pete, zha krie se di hiethepfü, no süu cütuo.

¹⁰No cüketuo kecüca liro khunhie la puo mesi shekel mepfüpfütuo; puotei chiepie no süu cütuo.

¹¹Siro no dzü mejü di krietuo, hin puo za sorou; no puotei chielie di süu krietuo.

¹²Noe süu barli pie niekhrüda kechü tuoi di cütuo, tsiu no süusü uko mhodzünu nu themia buo geinu rietuo.

¹³Kekreilamonyü Jihova sie, “Hakemhie di Israelmiako a uko whuopie seyieko donu keshüra nu rhukecü niekhrüda cütuo” si.

¹⁴Sitse ae sie, “He-i Ukepenuopfü Niepu-u! Ae a perhuwa mo zoluo; a nhicu nunu vor thie ketso puo thuo puo se chüketa chü morei bierha phaphakewa cü mo zo; morei mha kerütsekecüko bu a tie nu le mo zoluo” sishü.

¹⁵Sitse puoe a ki, “Co, a themia buo sounu mithu buo selienushüwate ho, süu se di n niekhrüdako keseliecie” sishü.

¹⁶Süsie puo a ki, Themiau, ae Jerusalem nu kecüca bie pejüwatuo; ukoe niekhrüda mejü di mu michiesiei di cütuo, tsiu ukoe mejü dzü krietuo, tsiu u vapethopfü di krietuo.

¹⁷Uko bu niekhrüda jüta tsiu dzü jüta; di huoniehuo ze uziekejü chü batatuo mu u pejokecü nunu u chü pejüwatuo.