Read Angami Naga Ezekiel 40 Bible Online

Ezekiel 40 - Angami Naga bible

Ezekiel 40

¹Hieko mia die chüketuo cie mepfüepengou cie, teicie therieki, thekhrüu nu zha ker nhie, nadiu bie pesuowaketa sie, cie keredia cie, teisozha sünhie Jihova dzie a gei vor, sidi a ze thechü sünu vorshü.

²Ukepenuopfü ziemho geinu a ze Israel kijü nu vorshü, sidi a khapie kijüthou rükrie sekecü puo geishü, süusü pekhrotsa nadiu kemhie dziethorhi puo ba.

³Puo a ze sünu vorlie tse, themia puo sünu ba, puo kengu merenyi kemhiei, puo dzie nu linen lo mu mha kemejü whuorie puo se tuo, sidi puoe kharu ki tha.

⁴Sitse themiau sie a ki, “Themiau, meho menuoshü di rünyü touliecie, sidi a thapie n kieketuo peteko gei n noupie shüliecie, kekreilamonyü a thapie n pekieshüketuo la n ze hanu vorte; no kengu pete pie Israel kinumia ki pushüliecie” sita.

⁵Süsie sozha puo rüsuoki khie houpfü ba, mu themiau dzienu mha kemejü whuorie kecha thu sorou mu puo dziezhü ne puo se tuo. Mu puo whuorieu se sozha keshü mejüshü, whuorie puo; mu puo rükrie, whuorie puo.

⁶Süsie puo niathutsa petsou keba chau nu vor di kheyau gei kho, di care-u phi mejülie, süu kesou whuorie puo de sou[76].

⁷Siro kibou kropuo ba, mu kibou puoe puocha whuorie puo, mu puo kesou whuorie sou phre, mu puo nuko kemejü thu pengoungou ba; siro kharu kifükhro kiluotsa liro whuorie puo.

⁸Süsie puo careu nu kifükhrotsa mejülie, süu thu puo zo.

⁹Süusü puoe care kifükhro-u mejülie, süu thu thetha; siro puo coko thu thetha; siro careu kifükhro puo puo nutsa ba.

¹⁰Siro care niathutsa petsou keba khie lutsa hatsa kibou kecü se ba phre; süko puo kezhakecü kede phre; mu puo coko rei kede phre.

¹¹Sitse puo kharu nu kele puozhau mejülie, thu ker; mu kharu puocha thu kerese.

¹²Siro kibou kecüko mhodzünu puo cahou ba, hatsa thu puo phre; mu kibou kecüko lutsa hatsa sa liro thu sorou.

¹³Siro puoe kibou sietsatie[77] puo nu kekreitsatie[78] puo nu careu mejü; puo zha thu mepfüepengou, sozha nunu sozha ketso.[79]

¹⁴Siro puoe kifükhroko rei mejülie[80], thu mepfü; mu kharu-u sie coko kiluo lutsa hatsa ba.

¹⁵Siro careu kele nunu vo kharuu puo nou tsatie keba kifükhro ketso thu hiepengou.

¹⁶Tsiu kibou kecüko puo coko pete gei khirki ba phre, siru kharu noutsatie lutsa hatsa puo kekhako sa ba, tsiu khirki puo noutsa whi vo ba; mu puo coko gei kukuobo ba.

¹⁷Sitse careko, khie kharuko puochapuozha mhodzü ki kibou ser ba.

¹⁸Siro careko, khiera kharuko puochapuozha kezhü hau khrapie pekhrotsa ba.

¹⁹Süsie puoe care kerünuou mhodzütsa nu vo chazou kibou puo noutsa kebau ketso mejü keshü thu krie puo.[81]

²⁰Süsie puo chazou care pesotsa petsou kebau, puoe puochau mu puozhau mejülie.

²¹Siro sünu kibou kecüko lutsa hatsa se mu lu tsatie se; mu puo coko tsiu kehoupie kebako kharu kerieu kemejü kemhie, süu puocha thu hiepengou, tsiu puozha thu mepfüepengou.

²²Siro puo khirkiko, kibou kecüko, mu puo kukuoboko pete, care niathutsa petsoukebau kemejü kemhie, sidi chapra thenie süu gei kho; mu puo kibou kecüko süko nu ba.

²³Siro niathutsa tuoi pesotsa careu petsoukeba kibouu puo noutsatie care puo ba; mu puoe care puo nunu vo care kekreitsatie mejükeshü thu krie puo.

²⁴Süsie puo a ze pekhrotsa petsou vor ru pekhrotsa care puo ba, sitse puoe sünu coko tsiu kibou kecüko mejülie; sükoe kekreiko mhiei mejükecü kemhie zo.

²⁵Süko pete nu mu kibou kecüko nu khirki bu whi vo ba; kekreiko khirki kemhie di; puo kecha ro thu hiepengou, mu puo kezha ro thu mepfüepengou.

²⁶Siro chapra thenie sügei kho ba; puo boukecüko süu nu ba phre, süko coko gei kukuoboko ba, lutsa hatsa puo puo idi.

²⁷Siro pekhrotsa petsou keba kibou puo nu puo nutsatie kharu puo ba; mu puoe pekhro tsatie petsou di care puo nunu vo care kekreiu ketso mejükeshü thu krie puo.

²⁸Siro puoe pekhrotsa careu ze di a kibou puo noutsatie kebau nu vor, sidi puo pekhro tsatie careu mejülie; süu kekreiko ze kemejü kemhie zo.

²⁹Süu kifükhro puo coko, mu puo bou kecüko kekreiko ze kemejü kemhie phre; siro süko nu mu kibou kecüko pete nu khirki bu houpfü vo; puo kecha ro thu hiepengou mu puo kezha ro thu mepfüepengou.

³⁰Siro kibou kecüko puo houpfü ba, puocha thu mepfüepengou mu puozha thu pengou.

³¹Siro sünu puo bou kecüko kitiezhau petsou, mu puo coko gei kukuoboko ba, mu kekho chapra thetha ba.

³²Süsie puo a ze niathutsa petsou keba kibou puo noutsa kebau nu vor, mu puo careu rei mejülie; süu kekreiko kemejü ze ketou.

³³Puo kifükhroko, puo coko, mu puo bou kecüko kekreiko ze kemejü ketou; siro sünu mu puo bou kecüko khirkiko bu houpfü ba; puocha thu hiepengou, mu puozha thu mepfüepengou.

³⁴Puo bou kecüko kitiezhau petsou ba, mu puo coko gei kukuobo ba, lutsa hatsa rei, mu puo kekho cha chapra thetha ba.

³⁵Siro puo a ze kharu pesotsa kebau nu vor, sidi puo süu mejülie; süu kekreiko kemejü ze ketou.

³⁶Puo bou kecüko puo coko, mu puo kifükhro kekreiko ze kemejü ketou; mu sünu khirkiko bu puo houpfü ba. Puocha ro thu hiepengou, mu puozha ro thu mepfüepengou.

³⁷Puo kifükhro-u[82] kitiezhau petsou ba, mu sünu kukuoboko süu coko gei ba, lutsa hatsa; mu sünu kikha cha chapra thetha ba.

³⁸Siro kibou puoe kikha sa di sünu kele careko kiki ba, sünu ukoe kethe ruosuoko khrü kemesaya.

³⁹Siro care kifükhro ha tsatie mizhü kenie ba, mu lu tsatie mizhü kenie ba, sünu nu kethe ruosuo mu kephouma ruosuo, tsiu kejokemou ruosuoko dukhriya.

⁴⁰Siro süu khie chazou, pesotsa kharu nu mizhü kenie ba mu kekrei tsatie care kifükhro ki mizhü kenie ba.

⁴¹Mizhü dia puo nou ba, mu mizhü dia care khietsa ba, mizhü thetha ba, sünu nu ruosuoko dukhriya.

⁴²Siro mizhü diako ketsie jokelie pie ketheruosuo la chü, puocha thu puo di puotie mu puozha thu puo di puotie, mu puo rükrie thu puo, sünu nu ukoe mhanya pie kethe ruosuo nu khapie ruosuokechü mhanyako khapie zhüzhüya.

⁴³Sünu cawi ba, u dzie kemeya de cha, puo nu lutsa hatsa pete khekemetei se ba. Siro mizhüko gei ruosuokechü muo khapie ba.

⁴⁴Siro puonutsa careu chazoutsa kibou puonutsa kebau nu ütsali kechümia la kibou ba, süue peso tsatie care khieki ba, mu ukoe pekhrotsa petsou; puoe niathutsa kharu khie ki pesotsa petsou kebau.

⁴⁵Siro puo a ki, “Kibou hauha, pesotsatie petsou kebau, hau zievoko, kiu mehoyakezhako la.

⁴⁶Siro kibou pesotsatie petsou kebau zievoko, ruosuobau mehoyakezhamiako la; hakoha Levi yiemia donu Zadok nuonuoko, Jihova penuo vor di puo lietho chüyakezhamia la” si.

⁴⁷Puoe kibou-u mejülie, puocha thu krie puo, mu puozha thu krie puo, puo ke diako, tsiu ruosuoba kiu mhodzünu kebau.

⁴⁸Siro puoe a ze di kiu kifükhro co puopuokecü mejülie, lutsa hatsa thu pengoungou, tsiu care puozha thu se, mu sozhau khie lu satie thu se.

⁴⁹Kifükhro-u puocha thu mepfü, mu puozha thu kerekenie, sügei chapra ker kho ba, tsiu coko khieki tsiepou sepie ba, hatsa puo, mu lutsa puo isi.