Read Angami Naga Ezekiel 41 Bible Online

Ezekiel 41 - Angami Naga bible

Ezekiel 41

¹Süsie puo a ze rüsuoki kiluou nu vor, sidi coko mejülie, lutsahatsa puo kezha thu sorourou, süu rüsuokiu zhau.[83]

²Siro puo kikhau thu ker; mu puokhie lutsa hatsa kenienie thu pengoungou. Siro rüsuoki kiluo puochau mejülie, thu hiedia, mu puozhau thu mepfü.

³Süsie puoe puo noutsa kibou-u nu le sidi kikhau coko mejülie, thu kenie, mu kikha kezhau mejülie, thu sorou, mu kikha khieu liro thu thenie.

⁴Siro puo kibou chau mejülie thu mepfü, mu puo kezhau thu mepfü, süu rüsuoki kiluou ze kepetse. Sitse puo a ki, “Hauha thechü kemesatho-u” isi.

⁵Süsie puo rüsuoki sozhau mejülie puo kecha thu sorou; mu kibou zhau pete liro thu dia, rüsuokiu khie pete nu.

⁶Puo khie kiboukoe kikha se, puoe puomho, sidi kilhau nu ser ba; siro ukoe kibou puo khie keba kiu nu kebako nunu sozha nu le, sidi sozhako huoniehuo khrü kemeteilieketuo chü phre, süla rüsuoki sozhau bu uko khrü kemetei moketuo chü.

⁷Siro puokhie keba kibouko kilha puo nu lha puo nu kho ro chau meya miemie khotaya; kekreilamonyü ki houpfükebau rüsuokiu khie whi volie kevi cha bakecü la. Haikecü la kiu kilha puoe kilha puo ki meya miemieta. Sidi mia puoe kilha kerünuotho-u nunu kilha kerükrietho-u gei puo whipfü keba kheya geinu kholielieya.

⁸Siro a rüsuokiu khieko nu thechü kerükrie chüpie houpie keba ngu; sidi kiu nu keba puokhie kibouko puo mvüdzeko mejükelie thu sorou.

⁹Kibou chazou, siro rüsuokiu nu kibouko khieko donu thechü kemethuo khapie ba,

¹⁰mu kibouko donu thu mepfü rüsuokiu khie lutsa hatsa ba.

¹¹Siro kibou khie keba kikhakoe thevitsa thechü methuokebatsa nu khrülieya, kikha puoe pesotsa va mu kikha kekrei puoe pekhrotsa va; siro thechü kerükrie pie keba puo bu methuo kezhüu puozha lutsa hatsa thu pengou.

¹²Siro niathutsa ki ruosuokiu petsou kebau puozha thu hiethenie, siro kiu sozhau puo keshü lutsa hatsa thu pengou, tsiu puozha thu hiethepfü.

¹³Süsie puo rüsuokiu mejülie, puozha thu krie puo; mu thechü kemeya puo, kiu mu sozhau sa, puocha thu krie puo;

¹⁴Süsierei kiu zieu zha, mu niathu tsatie thechü krei kezhüu thu krie puo.

¹⁵Siro puo kiu thechü krei keba petsou kebau, süu puosietsa kebau puozhau mejülie, tsiu kho pesogei keba tietsa puo tsiu kekreitsa isi kecü thu krie puo. Rüsuoki kiluou, puo noutsa, tsiu kibou kifükhroko chazoutsa pete rei sei pie lawa,

¹⁶mu süu whipfü keba pete, tsiu hako seko pete rei khirki kemereko sa phre. Siro rüsuokiu kiluou petsou kebako sei pie la whi vowa, kiluo nunu kho khirki ketso lawa (khirkiko pete rei whewa),

¹⁷sidi vo kikha mho ketso, mu kibou puo noutsa ketso rei, tsiu chazoutsa rei siwa. Siro puo noutsa kibou houpfü keba sozha pete mu kiluou puo khuthukecü ba.[84]

¹⁸Süusü Cherubnie mu kukuobo se chü, sidi kukuobo puo Cherub puo mu Cherub kekrei puo donu balielie isi, Cherub puopuokecü puo zie kenienie ba phre.

¹⁹Süu themia zie puo kukuoko bo petsou mu losha nuo yopuo zie kemhiekecüu kekreitsatie kukuoko petsou isi. Süko kepie rüsuokiu pete houshü.

²⁰Kiluo nunu kho kikhau mho ketso Cherubnie mu kukuobo pie chü, tsiu rüsuokiu sozha gei rei isi.[85]

²¹Rüsuoki coko puochapuozha ketou. Kemesa chüu mhodzüko liro

²²ruosuobau seiu ze kemhie, thu se rükrie thu kenie cha, mu thu kenie meya; siro sozhako sei pie chü. Siro puo sie a ki, “Mizhü hauha Jihova mhodzünu bayakezhau” isi.

²³Rüsuokiu mu kemesachüu kikha kenienie ba phre.

²⁴Siro kikhako puo nyü kenienie, kikha puopuo pa, puo nyü shükewhikecü kenienie ba phre.

²⁵Siro sükogei, rüsuoki kikha gei, Cherubnie mu kukuobo ba; sozhako gei kepie keba mhie di; mu chazou kifükhro zie gei mela shüdekecü ba.

²⁶Siro tietsatie puo tsiu kekreitsatie khirki kemere mu kukuobo ba, kifükhro khieko gei, mu kiu khie kibouko gei, mu mela shüdekecüko gei ba.