Read Angami Naga Ezekiel 42 Bible Online

Ezekiel 42 - Angami Naga bible

Ezekiel 42

¹Süsie puo a ze kitiezha nu vorshü, pesotsa petsou kebau nu, sidi puo a ze rüsuoki petsou keba zhau mu pesotsatie petsou keba kiu kibouko nu vorlie.

²Pesotsa kiu puocha thu krie puo mu puozha thu hiepengoukecü mhodzünu shü.

³Kibou puo nu kebau thu mepfü kecüu petsoushü, tsiu chazou bouu petsoushü, kibou lha se kesieso keba kerükrie gei thechü chüpie huoniehuo ze kerütsie ba.

⁴Kibouko mhodzünu puo noutsa thu ker chatuo ba, puozha thu ker mu puo cha thu krie puo, tsiu uko kikhako pesotsa ba.

⁵Siro kibou pesoko merekuo, kekreilamonyü kerükrie gei thechü cha chüpie kebako kerünuo nu kebako ki rei thechü seko mu pekhro lha ki chüpie keba metsuo tou nu kebau kirei meyakecü la.

⁶Kekreilamonyü sükosü kibou lha sese, mu süko coko we kitiezhau coko mhie mo, süla kerünuotho-u mu kijü gei metsuo tou nu kebau geinu ki chüpiekebau mereta.

⁷Siro kibouko chazoutsa petsou keba sozhau, kibouko keriethotsa chazou kibouu petsou keba süu puocha thu hiepengou.

⁸Chazoutsa keba kibouko puocha thu hiepengoukecü la, mu rüsuokiu mhodzütsako thu krie puo ba.

⁹Siro kibou hako nunu niathutsa lelieketuo careu ba, chazou kibou nu letuoü ro.

¹⁰Chau kemeya liro kiu sozhako houpfü zo vo. Pekhrotsa rei thechü kemethuo kezhüra kepetsou nu kibouko ba, siro kibouko,

¹¹süko mhodzünu cha zhü, sükoe pesotsa kibouko rhi mhie, puocha puozha rei kemhie; puorhi mu kikhako rei kemhie phre.

¹²Süla pekhrotsa kibouko nu kikhako kemhie chau mhotsa kikha puo ba, niathutsa petsou keba sozhau mhodzünu chau, süko nu letuoü ro.

¹³Sitse puo sie a ki, “Pesotsa kibouko mu pekhrotsa kibouko, thechü methuo keba mhodzünu kebako kibouko mesa, zievo-u Jihova ki kevo-u sünu mha kemesathoko cütuo, sünu ukoe mha kemesako khashütuo. Lhacülhale ruosuo, kephouma ruosuo, kejokemou ruosuo khashütuo, thechüu mesakecü la.

¹⁴Siro zievo-u kemesachüu nu lekecü ki, ukoe thechü kemesau nunu tuose chazou kibou-u nu volie lho, derei ukoe kirapuonu lietho chü shiü sünu nu uko pfhenei khapie zhüwatuo, hako mesakecü la; siro ukoe themiako kebachü penuo vorkecü mhodzü pfhenei kekrei se lalietuo.”

¹⁵Siro puoe kinu puo nutsa mejü tseiwata tse, puoe a ze care niathutsa petsou kebautsa vor, sidi süu khieümhoura mejülie.

¹⁶Puo mhakemejü seiu se di niathutsa mejülie; mhakemejü sei mhie ro thu krie pengou.

¹⁷Süsie puo rüreilie di pesotsa mejülie, mu mhakemejü sei mhie ro thu krie pengou.

¹⁸Süsie puo rüreilie di pekhrotsa mejülie, mu mhakemejü seiu mhie ro thu krie pengou.

¹⁹Süsie puo rüreilie di niakratsa mejülie, mu mhakemejü seiu mhie ro thu krie pengou.

²⁰Sidi puokhie diako mejülie. Sozha puo süko khie houpfü ba, puocha thu krie pengou mu puozha thu krie pengou süu bu kemesachü mu mechü chüu kela kreishütuoücü la.