Read Angami Naga Ezekiel 43 Bible Online

Ezekiel 43 - Angami Naga bible

Ezekiel 43

¹Süsie puoe a ze care nu vor, care niathu tsatie petsou kebau nu.

²Sitse sünu, Israel Kepenuopfü zayieu niathutsa nu vor, puo pfhe-e dzü kekra pfhe tuoi, tsiu puo kesokezieu geinu kijüu ziekruoituo.

³Siro ziemho-u liro puo nadi pekawatuoü kevor ziemho kenguu ze kemhie, mu Kebar rü khienu kengu-u kemhiei, sitse a tetsu zerepfü zhüta.

⁴Siro Jihova kesokezieu care niathutsa petsou keba chau ze di rüsuokiu nu vor.

⁵Ruopfüu a toupie sieta, di a ze kinu kesou nu vorlie; mu Jihova zayieu rüsuokiu tshupfülie.

⁶Siro themiau a khie ketha rüsuoki nunu a ki diepu keba sishü,

⁷puo sie a ki: Themiau, thechü hau kediba kebachüu mu a phizhü zhokecü chüu, a Israelmiako donu kechachie baketuou, Israel kinuko bu a kemesau bie perhu salie lhote, uko morei uko kediko bu rei, uko rügerüzhü nunu, morei uko kediko kesiamo geinu shierei silie lho.[86]

⁸Uko a kiluou pie uko kiluo chülie tsiu uko a kikha coko pie uko kikha coko chülie, di a mu uko donu sozha yopuo rübei, uko kerütsekecüko chü di a za kemesau bie perhuwa; süla a a noupfhü nunu uko thepejüwa.

⁹Tsie uko bu uko rügerüzhüko, mu uko kediko kesiamoko chü kedipie a kinu peciewacie, sitse a uko donu kechachie lhou batatuo.

¹⁰Siro themiau, no Israel kinuko ki rüsuokiu dze pushücie, mu uko bu puo rhi mejülie; mu uko bu uko kejokemouko la mengalie.

¹¹Sidi ukoe chükewako la mengalieü liro, rüsuoki la mharhü kebako ki ketsoketuo, ki rhiu mu keprakele chako, mu puo rhiko pete, puo kemesa zhoko mu mha rhükeba pete tsiu puo zhoko pete se uko ki pushülie; sidi uko kengu kinu süu thushülie, sitse ukoe mharhü peteko mu puo zhoko pete zelie di medzilietuo.

¹²Haue rüsuoki zho-u; kijüthou mezü houpfükebako pete bu kemesatho chüu chütuo. Hauha rüsuoki zho-ute.

¹³Hako thu üse kemejü ruosuobau geinu kemejüu (thu puo ikecüe thu puo tsiu u dziezhü de puo): puo thotsütsa zorei thu puo rükrietuo; mu thu puo meyatuo, puokhie tierieu houpfü kebau pfü puo tuo:

¹⁴Kijü puothotsü nunu vo mvüdze kerünuou ketso thu kenie, siro puozha thu puo, mu puo mvüdzekecüu nunu vo kezhau ketso thu dia tuo, siro puozha thu puotuo;

¹⁵Sidi ruosuobau bu thu diatuo; mu ruosuoba pesotsa va kebau bu kia dia batuo.

¹⁶Ruosuoba tou-u bu ketou phretuo, puocha thu kerekenie mu puozha thu kerekenie phretuo.

¹⁷Puokhieko pete rei ketou phretuo, thu keredia cha mu thu keredia meyatuo, siro süu houpfü keba puokhieu thu puotietuo, mu puothotsütsa thu puotuo. Puo chaprako bu niathutsa petsoutuo.

¹⁸Sitse puo sie a ki: Themiau, Niepu-u Ukepenuopfü hakemhie puya: Hako ruosuobau la thezho kemesako; kethe ruosuo mu thezie kegekeshü ruosuo khashütuoü di süu chükelie nhie,

¹⁹noe Levi zievo Zadok yiemiako, a penuo voryakezhako, a lietho chütuoükecüko la kephouma ruosuo chütuoü thudo puo khashütuo.

²⁰Siro no puo zie huo pielietuo, sidi süko khapie ruosuobau gei kia dia kebako gei shütuo; mu puokhie kediako nu shütuo, tsiu puo khieümhouko nu shütuo; hakemhie di no süu chükemesa mu süu phou mesatuo.

²¹Siro no kephouma ruosuo la pedo-u selietuo, sidi rüsuokiu viekecü thechü kesepie kebau nunu thewatuo, kemesachüu khietsanutuo.

²²Siro zha kenie nhie noe mvüdo ciewaliekelho puo pie kephouma ruosuo chütuo, sidi ruosuobau chü kemesatuo, pedo-u se chü kemesakecüu mhie di.

²³Mu no süu chü kemesa tseiwa tse, no ciewaliekelho pedo puo mu tekuo kro nunu tekuonuo puo pie ruosuo chütuo.

²⁴Siro süko pie Jihova mhodzünu khashütuo sitse zievo-ue metsie kelhoupie süko gei shütuo sidi süko pie Jihova ki kethe ruosuo chüshütuo.

²⁵Zha thenie temvü puopuo pie teisonhie kephouma ruosuo la khashütuo; siro pedo mu tekuokro-u nunu tekuochü ciewaliekelho puo khashüliecie.

²⁶Zha thenie uko bu ruosuobau khrü kemesalie tsiu süu chü kemesalie, sidi süu kha kemesa pie balie.

²⁷mu zha hako tseita tse, zha thetha nhie nu sede di süsietsa zievoko ruosuobau gei nieko kethe ruosuoko tsiu vitho ruosuoko khashütuo, sitse a nieko lielietuo, Niepu-u Ukepenuopfü siya.