Read Angami Naga Ezekiel 44 Bible Online

Ezekiel 44 - Angami Naga bible

Ezekiel 44

¹Süsie puo a ze la chazoutsa keba kehoukiu niathutsa petsou kebau careu nu vor; mu süu khapie ba.

²Sitse Jihova sie a ki, care hau khapie ba zotuo; hau khrüshülie lho, mu miapuorei hau ze lelie lho; kekreilamonyü Jihova Israel Kepenuopfü hau ze letakecü la; süla hau khapie ba zotuo.

³Kedinuou rübei, puoe kedinuocü la puoe Jihova mhodzü mhacütuoü di sünu balie vi, puoe careu kifükhrotsa ze di letuo, mu cha süu ze di la pratuo.

⁴Süsie puoe a ze rüsuokiu mhodzünu care pesotsa kebau cha ze vor; sidi a mehoshü ru harie, Jihova zayieu thuo Jihova rüsuokiu tshupfü bata, ru a zerepfü zhüta.

⁵Sitse Jihova a ki: Themiau, le touliecie, penuo di mehoshülie, sidi a n ki Jihova kiu kemesa zhoko mu puo zhoko pukeshü pete rünyü menuoliecie; sidi suomia rüsuoki nu lelie vi shi mu suomia kehoukiu nu lelie suo shikecüko le menuoliecie.

⁶Siro no mia petsouyakezha kiu, Israel kinuko ki pushülie, Niepu-u Ukepenuopfü hakemhie puya: He-i Israel kiu, nie mha kerütsekecü chüyakezha pete bu puo thela chütaliecie,

⁷Chazoumia ze lekecü, u nou mu u chü gei u zhürekemomia, bu a kehouki nu batuoü, sidi nieko kecüca, chüshuo mu thezie pie ruosuokechü ki a kerüsuokiu bie perhuwaya. Nieko mha kerütsekecü kechü pete la a dietseidiekho-u varhuowate.

⁸Siro nieko a vie kemesa ruosuo chünukeshüko chüüzelie mote, derei a kehouki nu chazoumia pethopie u bu nie sounu mhachüliete.

⁹Niepu-u Ukepenuopfü hakemhie puya: Chazoumia, u nou mu u chü gei u zhürekemomia, mu Israel donu keba chazoumia puorei bu a kehouki nu lelie lho.

¹⁰Derei Leviko a kinu pecieketako Israel yotuoketa ki uko terhuorhiko siemedzi di a kinu pecieketako, süko bu siazhau pfütuo.

¹¹Uko bu a kehouki nu lietho chütuo, rüsuokiu careko mehotuo, sidi rüsuokiu nu mhachütuo. Ukoe kethe ruosuoko dukhrituo mu themiako la ruosuo chütuo, mu uko bu uko mhodzü tha di uko lie chütuo.

¹²Siro ukoe uko mhodzünu nu uko terhuorhiko lie chü mu Israel kinuko chüpie mha kesuo kechü nu letakecü la; süla a uko rüseshüya, Niepu-u Ukepenuopfü puya, ukoe uko siazhau pfütuo.

¹³Uko a penuo vorlie lho, zievomia puo chü di a lie chülie lho, morei a ruosuo kemesako, mha kemesathoko penuo vorlie lho; derei uko ngau mu mha kerütsekecü kechü pete pfütuo.

¹⁴Sishierei a uko pethopie uko bu rüsuokiu kemeho chütuo, süu mhatho pete, mu sünu chüketuo pete la.

¹⁵Derei Levimia zievoko, Zadok yiemiako, Israel kinuko a kinu rütsituoketa ki a mhatho se kebako, uko a lietho chütuoü di a penuo vortuo; sidi ukoe chüshuo mu thezie ruosuo chütuoü uko a mhodzünu thatuo, Niepu-u Ukepenuopfü sikecü puya.

¹⁶Uko sü a kehouki nu leketuoko zo, uko sü a lie chütuoü di a mizhü gei vorketuoko zo, mu uko a pukeshüko chüüzetuo.

¹⁷Siro uko kehoukiu kinu care nu kele ki, uko linen boulieu setuo, siro kinu careu ki mu sünu nu mha kechü ki chümie puorei bu u gei tuolie lho.

¹⁸Uko linen tsüzeu pfütuo, mu u chieca nu linen boulie pekhroko setuo; rükhrutalie kevi pfhenei puorei selie lho.

¹⁹Siro uko kitiezhau nu themiako ki pracü ki, uko lietho kechü ki boulie keseko lhewatuo, sidi süko khapie kibou kemesako nu bawatuo; sidi uko pfhenei kekrei se lalietuo, uko uko pfhenei geinu kemesa se themiako tsüwalie kelho la.

²⁰Uko u tsü thielie lho morei uko tha bu the pechalie lho; ukoe uko tsü shü kemezhü pfütuo.

²¹Zievomia puorei bu kehouki kinu lekecü ki zu krielie lho.

²²Uko samimiapfü lielie lho, morei u nupfunuo ze kevaketamia lielie lho, derei ukoe Israel seyie donu rüüphousemia morei zievomia nupfü nuo sami kebamia rübei lietuo.

²³Uko a themiako ki kemesa mu mha kekreikecü pu pethatuo, sidi mesakemo mu kemesa kedipuo kekrei shikecü se uko pekietuo.

²⁴Siro dienya parketa ki uko theca catuo mu uko süko a dienya medzi di mha pepituo. Uko a zhoko se satuo mu a dieko a thenyi zha pethokeshüko pete la kepethadieko chüüzetuo mu uko a sabatko se kemesatuo.

²⁵Uko kesiamia penuo vo di u thuo u perhulie lho; siüderei u puonuo morei u zuonuo, kehoupuo rei, u nuonuo thenu rei thepfu rei, mu u prünuo morei u üpfünuo kiyakemomia la we u perhulie vi.

²⁶Siro mesakelie sie, uko puo la zha thenie phrü.

²⁷Sidi puoe kemesachüu nu kele nhie kehoukiu kinuzhau nu kemesachüu nu le di kephouma ruosuo khashütuo, Niepu-u Ukepenuopfü siya.

²⁸Sidi haue uko kayieu chülietuo: Ae uko kayieu zo; mu nieko Israel nu mhakevie seketuoko puorei pie uko tsülie lho. Ae uko rüvieu zo.

²⁹Ukoe lhacülhale ruosuo, mu kephouma, kejokemou ruosuoko cütuo; mu Israel nu kemesa ruosuo khakeshü pete uko yatatuo.

³⁰Siro mha kehoupuorei puo si vülie kerieu, tsiu nieko ruosuo puopuokecü pete nieko ruosuo kehoupuo shierei, zievoko vie chütatuo; mu nieko niekhrüda nelie kerieu pie zievoko tsütuo, theja bu nie kinu vorlieketuo la.

³¹Zievomia pera morei khunuo kehoupuorei puo thuo puo se chüta morei khunuo bu ciechücierhakewako puorei cülie lho.