Read Angami Naga Ezekiel 45 Bible Online

Ezekiel 45 - Angami Naga bible

Ezekiel 45

¹Siro nieko kayie puo tuoi kijü kezakecü ki nieko kijü huo kha kreipie kemesa rüna puo tuoi pie Jihova tsütuo, thu nyie mepfüepengou chatuo, mu thu nyie mepfü meyatuo, thechü süu chaüchie pete bu mesatuo.

²Hauha geinu kehouki la puochapuozha ketoukecü thu krie pengoungoutuo, mu thechü kemethuo thu hiepengou bu puo khie houpfü votuo.

³Siro kemesa kijü hau nu puocha thu nyie mepfüepengou mu puozha thu nyie kerkecü khapie balie, sidi süu nunu kehouki, kemesa thechüu chüliecie.

⁴Süu bu kijüu nu kemesa thechüu chütuo; mu pie zievoko kehouki lietho chüyakezhako mu Jihova liechütuoü puo mhodzü voyakezhako vie chütuo; mu süu bu uko kiko mu kehouki chülieketuo thechüu tuo.

⁵Siro thechü kekrei puo, puocha thu nyie mepfüepengou mu puozha thu nyie kerkecü puo Leviko rüsuokiu nu lietho chüketuo la batuo, uko bu u nadi chü di lhou baketuo la.[87]

⁶Siro nadi puo, puozha thu nyie pengou, mu puocha thu nyie mepfüepengoukecü puo, rüna kemesa mhie di kedaliecie; süu pie Israel kinuko pete vie chütuo.

⁷Siro thechü puo kedinuou rüna kemesau mu nadi khapie baketuou kenienie rei rüna kemesau nu nadi khapie baketuou mhodzü keba niakratsa nu niathutsa petsou di chülie, puoca seyie puo puo vie ze ketoutuo mu niakratsatie nunu vo niathu tsatie,

⁸kijü tierie ketsotuo. Süu bu Israel nu puo vie meseutuo. Siro a kedinuoko a themiako pese salie lho; derei ukoe Israel kinuko bu u seyieu medzi di kijüu ngulietuo.

⁹Niepu-u Ukepenuopfü hakemhie puya: Tseite, he-i Israel kedinuoko! Mia pekakecü mu mia pesekecüko khawatalie, sidi kemezhüu mu puotoukecüu chüliecie. A themiako gei mhaliekecü zhoko chü sa hie, Niepu-u Ukepenuopfü puya.

¹⁰Nieko mha mejükecü ki diethotuo, efa puotoukecü, mu bath[88] kemejü puotoulie.

¹¹Siro Efa mu Bath kemejü kenienie rei kemhie toutuo, bath liro homer ker za puo baya mu efa liro homer ker za puo baya; homer-u bu kemejü puotoukecüulie.

¹²Siro shekel liro gera mepfütuo. shekel mepfü, shekel mepfüepengou, shekel kerepengou pie nieko la mina puo chütuo.

¹³Nieko mha hau khashütuo; thoulha homer puo nu efa za sorou nu za puo mu barli lha homer puo nu efa za sorou nu za puotuo,

¹⁴mu tier mejüpie kebautuo,[89] kor puo nu tier bath ker za puo khashütuo, (kor[90] puoe, homer puo mhie di bath za ker baya);

¹⁵siro tekuokro krie kenie donu puo Israel nha pejo keba lie nunu tuo. Hauha lhacülhale ruosuoko, kethe ruosuoko, kevikechü ruosuo, uko phou mesalieketuo la, Niepu-u Ukepenuopfü siya.

¹⁶Kijü nu themia pete rei Israel nu kedinuoko ze ruosuo hau chütuo.

¹⁷Derei kedinuou bu kethe ruosuo, lhacülhale ruosuo, mu kekrie ruosuo, thenyiko nu, khrülhou ki mu sabatko, Israel kinuko thenyi pethopie keba peteko nu. Puoe kephouma ruosuoko, lhacülhale ruosuoko, kethe ruosuoko mu kevikechü ruosuoko, Israel kinuko phou mesakecü chütuo.

¹⁸Niepu-u Ukepenuopfü hakemhie puya; nie thekhrü therieu nu zha kerie nhie, pedonuo ciewalie kelho puo selie, sidi kehoukiu chü kemesatuo.

¹⁹Zievo-ue kephouma ruosuo la thezie huo selie di pie rüsuokiu kikha coko gei, ruosuobau kediako gei mu kinu tsatie coko gei kenheshütuo.

²⁰Nieko kekrü di mu si mo di kephouma chükewako la thekhrüu nu zha thenie nhie mia pete la mu rüsuokiu la ruosuo chütuo.

²¹Thekhrüu zha keredia nhie, nieko ciekevonyi nyituo, zha thenie nyi di khreiü shükemo niekhrüda cütuo.

²²Teisozha sünhie kedinuou puo thuo puo la mu kijü nu themiako pete la pedonuo puo pie kephouma ruosuo chüshütuo.

²³Sidi thenyi zha thenieko nu puoe kethe ruosuo chüpie Jihova tsütuo, ciewaliekelho pedonuo thenie mu mvüdo thenie se zha thenie la teisonhie ruosuo chü votuo; mu mvüdo puo pie teisonhie kephouma ruosuo chütuo.

²⁴Puoe lhacülhale ruosuo khakeshü la pedo puo puo la efa puo, mvüdo puopuo la efa puopuo, mu efa puopuo la tier hin puo kesetuo.

²⁵Khrü thenieu nu zha kerepengou nhie, puoe zha thenie nyi la, kephouma ruosuo la, kethe ruosuo la, lhacülhale ruosuo, mu tier la mha sükemhiekecü kesetuo.