Read Angami Naga Ezekiel 46 Bible Online

Ezekiel 46 - Angami Naga bible

Ezekiel 46

¹Niepu-u Ukepenuopfü hakemhie puya: Kinu zhau care niathu tsatie petsou kebau mhakechü zha sorouko nu khapie batuo; derei sabat nhie süu khrüshütuo mu khrülhou zha nhie rei süu khrütuo.

²Siro kedinuou chazoutsa nu kifükhro chau ze di care süu nu letuo, sidi care ki thalietuo. Sitse zievoko u kethe ruosuo mu vitho ruosuo chüshütuo, mu puo shie khieki care kinu nuketsushütuo, di puo tuopratatuo, derei careu thevatie ketso khrüpie batuo.

³Kijü nu themiako rei care hau nu kele kinu Jihova mhodzünu nuketsu rüsuotuo, sabat nhie mu khrülhou ki.

⁴Siro kedinuo sabat nhie kethe ruosuo khashü Jihova tsüketuou tekuonuo ciewaliekelho sorou mu mvüdo ciewaliekelho puotuo;

⁵mu lhacülhale ruosuo mvüdo sa di chüketuou bu efa puotuo, mu lhacülhale ruosuo tekuonuo sa di chüketuou we puo thuo khashülie kevide pie efa puo la tier hin puopuo di khashütuo.

⁶Siro khrülhou nhie pedonuo ciewaliekelho puo, mu tekuonuo sorou, tsiu mvüdo puotuo; süko pete ciewaliekelho phretuo.

⁷Lhacülhale ruosuo tuoi di puo efa puo la mvüdo puo la efa puo, mu mvüdo puo efa puotuo, tsiu tekuonuo la liro puoe khashülie kevide mu efa puo la tier hin puotuo.

⁸Siro kedinuou lekecü ki, puo kharu kifükhro chau ze letuo, mu puoe cha süu ze di la pratuo.

⁹Kijü nu themiakoe pethopie keba thenyi teiu nu Jihova mhodzünu kevor ki kehoupuorei rüsuotuoü pesotsa careu ze kelekoe pekhro tsatie careu ze pratuo mu kehoupuorei pekhro tsatie careu ze lecümia pesotsa careu ze la pratuo, ukoe rüreila uko keler chau ze pralie lho derei mezhü u mhodzütsa vapra zotuo.

¹⁰Uko keler ki kedinuou uko ze lertuo mu uko la kepra ki puo rei pratatuo.

¹¹Siro thenyiko nu mu pethopie keba tei kekreikecüko lhacülhale ruosuo pedo puo sa di kechüu la efa puotuo, mu mvüdo sakecüu la efa puotuo, tsiu tekuonuoko sakecüu we puo thuo khashülie kevidetuo, efa puo la tier hin puopuotuo.

¹²Siro kedinuou kenei nunu ruosuokechü, kethe ruosuo morei vitho ruosuo u kenei nunu khapie Jihova ketsü ki, kharu niathutsa petsou kebau puo la khrüshütuo; sidi puoe kethe ruosuo morei vitho ruosuoko puo sabat nhie kechü tuoi di khashütuo. Süsie puo pratatuo, mu puo thuo praketa sie kharu-u kha lawatuo.

¹³No teisonhie kethe ruosuo chüpie Jihova ki shüketuo la tekuonuo cie puo nuonuo ciewaliekelho khashütuo; süu teisoduü khashütuo.

¹⁴Siro puo süu sa di lhacülhale ruosuo teisoduü khashü seituo, efa sorou za puo, mu hin tier se za puo, pie thoulhau kevitho-u chü kemenelie, di lhacülhale ruosuo chüpie Jihova tsütuo, hau puotei pete nu la kemesa zho-ute.

¹⁵Hakemhie di tekuonuo mu lhacülhale tsiu tier khashütuo, teisoduü kethe ruosuo khashü seituo.

¹⁶Niepu-u Ukepenuopfü hakemhie puya: Mhanuü kedinuou puo kayieu nunu mha methuo pie puo nuonuo thepfuko kehoupuorei tsü liro, süu puo nuonuoko vie chütatuo, süu kayie nu u vie chütatuo.

¹⁷Derei mhanuü puoe puo kayieu nu mha methuo pie puo kituoko donu mia puo tsü liro, puo kha lashükewa teicieu ketso süu pie puo vie chütuo; süsie süu kedinuou ki la vortatuo; puo nuonuoko rübei puo kayieu methuo khakeshüu se balie kevi zo.

¹⁸Kediu nuou bu themia kehoupuo kayieu lielie lho, uko kemvü chü uko dzienu kebau pielie lho; puo thuo puo kayieu nunu mha khapie puo nuonuo thepfuko tsütuo; a themiako miapuorei bu u dzienu keba u vieko petawa molieketuo la.

¹⁹Süsie puo a ze kele cha careu khieki kebau nunu zievoko kibou kemesau, pesotsatie petsou kebau nu vor, mu sünu a niakratsa petsou keba lutsa hatsa nie nu thechü puo keba ngu.

²⁰Siru puo a ki, “Thechü hau nunu zievoko kejokemou ruosuo mu kephouma ruosuo betuo, sünu ukoe lhacülhale ruosuou rietuo, süko se chazou kibou nu pra di kemesau se themiako gei shüwalie kelho la,” si.

²¹Süsie puo a ze chazou kibou-u nu vor, sidi a bu kibou-u kediako nu pfüthe vo; mu kibou ke diako pete nu rei kibou puopuokecü ba phre.

²²Kibou kediako nu kibou kecücü ba, puocha thu hiedia mu puozha thu ser, diako pete rei puo chapuozha ketou phre.

²³Siro süko nu puo cha chüpie kibou dia süko nu whi vo ba, mu süu whi vo keba khronu miphu chüpie ba.

²⁴Sitse puo a ki, “Hako mhachaki, rüsuoki nu lietho chüyakezha themiako ruosuoko betuo” si.