Read Angami Naga Ezekiel 47 Bible Online

Ezekiel 47 - Angami Naga bible

Ezekiel 47

¹Süsie puo a ze la rüsuokiu niathutsa kicieu khronu dzü kru parkezhü nu vor (kekreilamonyü rüsuokiu niathutsa petsoukeba la); mu dzüe kicie pekhro tsatie khronu kru se ruosuobau pesotsa tsurzhü.

²Sitse puoe a ze pesotsa care chau nu vor, sidi a ze chazou chau whi se care peso tsa keba niathutsa petsou kebau nu vo; siru dzüe pekhrotsa nu kru parzhü.

³Siro mia puo puo dzie nu kero puo seketuou niathutsa vota, puoe thu nyie puo mejülie, sidi puoe a ze dzü pfüthe vo, ru dzüe u phimhi tsozhü.

⁴Süsierei puo thu nyie puo mejü lalie, sidi a ze dzü pfüthe vo; dzüe u khoudza ketso sou. Lasie puoe thu nyie puo mejü lalie, sidi a ze dzü pfüthe vo, dzüe u chieca ketso sieta.

⁵Süsie puo nyie puo mejülie, mu sü kerü puo a cie volie kenjüta, kekreilamonyü dzü thousierta, mu soupie dzüvülie kevi chüta, sidi cie volie kenjükecü kerü puo chüta.

⁶Siro puoe sie a ki, “Themiau no hau ngu mo?” si. Süsie puo a ze kerüpo gei vota.

⁷Sidi a la vorta tse, kerüpo gei seibo kezha tietsatie puo mu kekreitsa rei ba.

⁸Sitse puo a ki, “Dzü hakoha kru niathutsa vavo di kru Araba nu tsuta, sidi dzükezha nu tsukelie ki, dzükezha thou sei bayakezhau nu, dzüko mesataya.

⁹Sidi kerüu kru kevo pete nu, kerhei khunuo meleketuo pete rheilietuo, mu sünu khuo kekra batatuo, dzüko kru vo tsolie mumetha, mha pete rheirhie partaya; mu dzü kru kevo pete nu mha kehoupuorei rheilietuo.

¹⁰Khuoketemia sükhie ba di khuo tetuo, En-gedi nunu vo En-egliam ketso; jal kelhoushülie kevi thechü batuo; sünu khuoko puorhi doneiünei batuo. Dzükezha nu khuoko tuoi di.

¹¹Derei süu dzüthouko mu dzütseko nu mesalie lho, sükosü pie metsie chüwatuo.

¹²Siro kerüpo lutsa hatsa puo khieko nu, kecüca chüketuo la seibo lhoutuo. Uko nyüko rüwitalie lho, morei puosi rürietalie lho, derei sükoe thekhrü metsei puosi kesa vülietuo, kekreilamonyü kemesachüu nunu dzü kru par uko vacü la. Uko siko pie kecüca chütuo, mu uko nyü pie daru chütuo.”

¹³Niepu-u Ukepenuopfü hakemhie puya: Hako pie puotierie chütuo, sünu nie Israel seyie kerekenieko kayie la kijüu kezalietuo. Josef bu za kenie ngulietuo.

¹⁴Nieko süu keza ketoutuo; a pie nie puonuoko tsütuoü rüsekeshü tuoi, kijü hau bu nie kayie chütuoü nie dzie nu khashü.

¹⁵Siro hau kijü therieu chütuo; Pesotsa liro Dzükezha Kezhau nunu Hethlon chau ze Lebo-hamath nu ketso, tsiu sizo vo Zedad.

¹⁶Berothak, Sibraim (mu Damaska nu mu Hamath tierieunie donu ba), Hazer-hatikon ketsotuo, süu Hauran tierie nu ba.

¹⁷Süla kijürieu bu dzükezha nunu vo Hazar-enon tsotuo, süu Damaska tierie pesotsa, mu peso tsa Hamath tierieu. Hau bu peso tsatietuo.

¹⁸Siro niathutsa liro Hauran nunu Damaska donutuo, Jordan mu Gilid donu meze nunu vo Israel kijüu tsotuo, sizo vo niathutsa dzükezhau mu Tamar chaüzha petetuo. Hau bu niathu tsatietuo.

¹⁹Siro pekhro tsatie liro, Tamar nunu vo Meri-bath-kadesh dzüu ketso, tsiu süu meze se Ijipt Rüu nunu vo Dzükezha Kezhau ketsotuo. Hau bu pekhro tsatuo.

²⁰Niakratsa liro, Dzükezha Kezhau tierieu nunu vo Lebo-hamath kepetsou thechüu ketsotuo. Hau bu niakra tsatietuo.

²¹Süla no Israel seyieko medzi di kijü hau kezatuo.

²²Siro süu kezapie nie thuo nie la kayie puo chü mu nie donu keba chazoumia mu u nuonuo nie donu nu lhoukelieko yachüliecie.

²³Sidi chazoumia seyie kehoupuorei nie donu lhou bata ro, nie süranu puo ya khashütuo, Niepu-u Ukepenuopfü puya.