Read Angami Naga Ezekiel 48 Bible Online

Ezekiel 48 - Angami Naga bible

Ezekiel 48

¹Hako seyieko zako: Pesotsa tierie, Hethlonchau nu, Lebo-hamath nu sede di Hazar-enon (süu Hamath khro tou nu Damaska ze ketierie) niathu nu vo niakratsa ketso pie Dan yie chülie, za puote.

²Siro Dan niakratsa nunu niathutsa pie Asher ya chüshü, za puote.

³Asher tierie nunu niathutsa nunu niakratsa ketso pie Naftali tsü, za puote.

⁴Naftali tierie nunu niathutsa nu vo niakratsa ketso pie Manasseh tsüshü, za puote.

⁵Manasseh rie niakratsa nu vo niathutsa ketso pie Efraim tsü, za puote.

⁶Efraim tierie nu niakratsa nu vo niathutsa ketso pie Reuben tsü, za puote.

⁷Reuben rie nu niakratsa nu vo niathutsa ketso pie Juda tsü, za puote.

⁸Juda rie nu niakratsa nu vo niathutsa ketso nie bu kha kreipie zhütuo, puozha thu nyie mepfüepengou, mu puochau seyieko ya khakeshü puo detuo, niakratsa nu vo niathutsa ketso, sidi kemesachüu bu süu metsuo nu batuo.

⁹Siro nieko Jihova la kha kreikeshüu bu puocha thu nyie mepfüepengou, mu puo zha thu nyie mepfütuo.

¹⁰Siro hako pie kemesa zau la khapie batuo: Zievoko u pesotsa puocha thu nyie mepfüepengou, mu niakratsa puozha thu nyie ker, tsiu niathutsa puocha thu nyie ker, pekhrotsa puocha thu nyie mepfüepengoutuo, sidi Jihova kehoukiu bu süu metsuo nu batuo.

¹¹Siro hau bu Zadok nuoyie chü kemesapie zievo kechüko, a zho se bakelieko mu Israelko tuoi rütsita kemoko tsütuo, Levimiako tuoi di.

¹²Sidi kha kemesa kreipie keba kijüu Levimia kijürieu ki kezhüko uko ya mu uko la mha kemesatho puo chütuo.

¹³Siro zievoko kijürie meze vokezhü puocha thu nyie mepfüepengou mu puozha thu nyie ker ngulietuo. Puochau pete thu nyie mepfüepengou mu puozha thu nyie mepfütuo.

¹⁴Siro uko bu süu ze morei süu pie keliwalie kenjü; uko bu kijü keda pekrei se keba hau bie kediwalie lho, kekreilamonyü süu Jihova mhodzü mesakecü la.

¹⁵Siro peshapie kebako, puozha thu nyie pengou mu puocha thu nyie mepfüepengoukecü pie nadiu se mhakehoupuorei chütuo, se lhou baketuo mu phouyo rüna chütuo. Siro süu metsuo nu nadiu bu batuo,

¹⁶mu puochapuozha bu hamhietuo: Pesotsa thu nyie dia di krie pengoutuo, pekhrotsa thu nyie dia di krie pengoutuo, niathutsa thu nyie dia di krie pengoutuo, mu niakratsa thu nyie dia di krie pengoutuo.

¹⁷Siro nadiue phouyo kijü batuo: Pesotsa thu krie kenie di hiepengou mu pekhrotsa thu krie kenie di hiepengou niathutsa thu krie kenie di hiepengou.

¹⁸Siro kemesa thechüu meze di peshapiekezhü puochau niathutsa thu nyie kertuo, mu niakratsa nyie ker, mu süu thechü kemesau ze kemeze zhütuo, sünu mhangukelieko pie nadiu nu mhachüyakezhako kecüca chütuo.

¹⁹Siro Israel seyieko pete nu mhakechümiakoe süu ciecütuo.

²⁰Nie kha kemesa kreikeshü thechü pete thu nyie mepfüepengou idi kediako ketoutuo, thechü kemesau se nadiu vieko sa kesatuo.

²¹Siro kemesachüu nu nadiu khie lutsa hatsa peshakezhüko pete kedinuou vietatuo. Thechü kemesa thu nyie mepfüepengou nunu vo niathutsa therieu ketso, mu niakratsa thu nyie mepfüepengou nunu vo niakratsa tierieu ketso, seyieko tsüwaketako ze keduo kevo sü kedinuou viete. Kemesachü kehouki kemesau süu donu batuo.

²²Siro Levimia vie mu nadiu vie kedinuoko vie donu zhütuo, Juda tierie nunu Benjamin tierie donu kedinuou vie zhütuo.

²³Siro seyie kekreiko la we, niathutsa nu vo niakratsa ketso Benjamin ya chütuo.

²⁴Benjamin tierie nu niathutsa nunu vo niakratsa ketso, Simeon ya chütuo, za puote.

²⁵Simeon tierie nu niathutsa nu vo niakratsa ketso pie Isakar ya chütuo, za puote.

²⁶Isakar tierie nu niathutsa nu vo niakratsa ketso pie Zebulun tsütuo, za puote.

²⁷Zebulun tierie nu niathutsa nu vo niakratsa ketso Gad ya chütuo, za puote.

²⁸Gad tierie nu tsu pekhrotsa tierieu ketso Tamar nunu vo Meribath-Kadesh dzüko ketso mu sünu nu Ijipt Rüu peze vo Dzükezha Kezhau ketsotuo.

²⁹Kijü hako Israel seyieko bu welieketuo la kezapie tsüshülie, tsiu hakoha uko yako, Niepu-u Ukepenuopfü hakemhie puya.

³⁰Hako nadi prataketuoko: Pesotsa thu nyie dia di krie pengou,

³¹kharu se, Reuben kharu, Juda kharu, mu Levi kharu, nadi kharukoe Israel seyieko za nunu thu.

³²Niathutsa kemejü thu nyie dia di krie pengou, kharu se, Josef kharu puo, Benjamin kharu puo, Dan kharu puo.

³³Pekhrotsa kemejü thu nyie dia di krie pengou, kharu se, Simeon kharu puo, Isakar kharu puo, Zebulun kharu puo.

³⁴Niathutsa kemejü thu nyie dia di krie pengou, kharu se, Gad kharu puo, Asher kharu puo, Naftali kharu puo.

³⁵Nadi whi kevo puochapuozha kemejü thu nyie kerethetha; tsiu sünhie yawinu nadi süu za üse, Jihova Sünu Ba, situo.