Read Angami Naga Ezekiel 6 Bible Online

Ezekiel 6 - Angami Naga bible

Ezekiel 6

¹Jihova die a ki vor di sie:

²He-i themiau, n zie pie Israel kijüthouko valie di uko petsoukecü siedzekesi die pushülie.

³Sidi sie: Nieko Israel kijüthouko, Jihova Ukepenuopfü die rünyüliecie! Jihova Ukepenuopfüe hakemhiekecü pie kijüthou kerükrieko ki, tsiu kijütseiko ki, kerüko ki, tsiu razhako ki puya: A thuo zhiecha puo pie n gei vortuo, sidi a nie thechü kerükrieko pekawatuo.

⁴Nieko ruosuobako vakewa mu mharekethengu thako bietshebietshawatuo mu a nieko dukhrikewako kelhoupie nieko terhuorhiko mhodzünu shüwatuo.

⁵Ae Israel siaketako mo pie uko terhuorhi mhodzünu zhüwatuo; mu nieko ruko kezapie nieko ruosuobako gei tshuwatuo.

⁶Nie kehourapuo lhou zorei, nie rünako methuotatuo mu nie thechü kerükrieko katatuo, sidi nieko ruosuobako chü kemethuowa mu pekawatuo,[9] nie terhuorhiko bietshebietsha mu pekawa, nie mharekethengu kethe thako dathewa, mu nieko mhathoko bie pejüwatatuo.

⁷Siro dukhrikewako nieko donu tetsutatuo; sitse nieko a Jihova zoükecü silietuo.

⁸Derei a huomia lhieshütuo. Nieko huomia zhiecha mhodzü talie sidi rünako nu cüre votatuo.

⁹Süki takelieko seyieko donu mia die chüketuora nu a rükralietuo, kimhie di uko nou nu thethelie di a ki nu nu rüreita, di a nou bie pesuowa, mu uko mhi rüyo di uko terhuorhiko ze rügetuoketa la uko bietshebietshawate shikecü rükralietuo, sitse ukoe kerütsekecü pete chükecü kesuoko la uko thuo uko ngu mecütatuo.

¹⁰Sitse ukoe a Jihova zoücü silietuo; ae mhakesuo hau uko gei chüshütuoükecü pukeshü thedo chüta moükecü silietuo.

¹¹Niepu-u Ukepenuopfü hakemhie puya: Dziedashülie mu phideshülie, sidi sie: Aya, Israel kiu mha kerütse chükecüko we chülietie! Kekreilamonyü ukoe zhiecha geinu, pekrie geinu mu thepe geinu tetsutaketuo la.

¹²Kepetse nu ketuomia thepetheruo geinu siatatuo; kepenuo nu ketuomia zhiecha geinu siata; mu themia pesha mu lhiekeshü kehoupuorei pekrie geinu siatatuo. Hakemhie di ae uko gei a nouyieu chü tseiwatuo.

¹³Sidi nie donu dukhriwakecüko uko ruosuoba khieümhoura uko terhuorhi donu kijüthou kerükrie pete gei, tsiu kijüthou mezü pete gei, tsiu sei kepejo pete khro, mu phrie nyü dei se kebako khro, uko mharekethengu thepie uko terhuorhiko tsüyakezha thechüko ketshu chükelie ki, ukoe a Jihova zo ükecü silietuo.

¹⁴Ae a dzie yhapie uko petsoutuo, sidi rayha nunu vo Ribla[10] ketso uko lhou keba chü kehourapuorei chü kemethuowa mu pekawatuo. Sitse ukoe a Jihova zoücü silietuo.