Read Angami Naga Ezekiel 8 Bible Online

Ezekiel 8 - Angami Naga bible

Ezekiel 8

¹Teicie sorou-u cie, khrü sorouu nu zha pengou nhie a kinu ba, mu Judamia phichüko a mhodzünu ba, Niepu-u Ukepenuopfü dzie a gei tsur.

²Sitse a mehoshü, ru themia rhi[12] mhiekecü puo ba, puo chieca khrotsa miü kemhie, tsiu puo chieca pesotsa thegi kemephrie kemhie di ziekruoi ba.

³Süu themia dzie tuoikecü puo se par sidi a tsütha kropuo geinu a teshülieta; sitse ruopfüu a toupie kijü mu tei nie donu sieta, sidi Ukepenuopfü mhapie a pengukecü nunu a ze Jerusalem nu pesotsa va keba kitiezha nu kele kharu-u nu, mia ngu u rokecü terhuorhi kebachüu, mia chüpie mia bu u rolieyakezha nu vor.

⁴Siro Israel Kepenuopfü zapuzayie kechüu sünu ba, a razha nunu kengu ziemho-u kemhiecü puo.

⁵Sitse Ukepenuopfüe sie a ki, “He-i themiau, tosie di pesotsa kevatsa chau mehoshücie,” sita. Süla a tosie di pesotsa mehoshü, ru sünu pesotsa ruosuobau kikha keleu ki mia ngu u rokecü terhuorhiu ba,

⁶Sitse puo a ki, “Themiau, uko kedipuo chüba shikecü no ngu mo? Israel kinuko mhakerütsekecü, kemeriekecüko, a bu kemesachü therhietatuoü di a whuo keba ngu mo? No mha kerütsekecü haki kezha ngutuo.”

⁷Sidi puoe a ze kitiezhau kikha ki vor; sidi a mehosie tse, sozha gei kecie puo ba.

⁸Sitse puo a ki, “Themiau, sozhau hophalie” si, sidi a sozhau hophalie tse, kikha puo keba ngulie.

⁹Sitse puo a ki, “Tuo lecie, sidi uko hanu nu mha kesuo thenga kerütse chüyakezhako mehoshücie” sita.

¹⁰Süla a lelie di mehoshü, ru sünu, sozha lutsa hatsa pete gei, goutuoyakezha khunuo pete, mu khunuo kerütsekecüko, tsiu Israel kinumia terhuorhiko pete rhipie zha.

¹¹Siro süko mhodzünu Israel kinuko pehüko mia hiethenietha, mu Shafan Jazania nuou uko donu tha, mia puopuokecü puo dzie nu mharekethengu kethebou se, mu mharekethengu thekeshü reu kimhou tuoi sie keba ngu.

¹²Sitse puo a ki, “Themiau, Israel kinuko pehüko kezei nunu kedipuo chüya shikecü, mia puopuokecü kibou nu terhuorhiko keba no ngushüta die? Kekreilamonyü uko pukecü, ‘Jihova hie nguya mo, Jihova kijüu khawate’ ” isiya.

¹³Puo a ki pu sakecü, “No uko haki rei mha kerütsekecü kechü ngu satuo” isi.

¹⁴Sidi puo a ze care pesotsa Jihova kiu kikha ki vor; mu sünu thenupfüko Tammuz la kra ba.

¹⁵Sitse puo ki, “He-i themiau, no hau ngu mo? No tsie rei haki mhakerütsekecü ngu satuo ho” sita.

¹⁶Süsie puoe a ze Jihova kitiezha metsuo-u nu vor; ru sünu, Jihova rüsuokiu kikha ki, kifükhro mu ruosuobau nie donu, mia mepfüepengou rünoupie Jihova rüsuokiu tsü, tsiu uko zie niathutsa petsou ba, sidi uko niathutsa petsou di niaki rüsuoba.

¹⁷Sitse puo a ki, “He-i themiau no hau ngu me? Juda kinuko hanu nu mha kerütse chükecü ha suothor moü me? Uko mha pekakecüpie kijüu ketshu chü, sidi a nouyie chü pekrakuozhü mo me? Harie, ukoe puoco-u pie uko nyhü nu shüpfü tuoya!

¹⁸Süla a rei nouyie se mhachütuo; a mhi uko ngu jowalie lho, morei mia ngumezhielie lho, tsiu uko thuo kra peto se di a ki cha zo shierei, a uko pfhe rünyü lho” sita.