Read Angami Naga Ezekiel 9 Bible Online

Ezekiel 9 - Angami Naga bible

Ezekiel 9

¹Süsie puoe a nyie kinu shie peto se di sie, “Penuo vorlie, nie nadiu pekayakezhako, mia puopuokecü bu puo dzie nu mha pekaketuo rünyie seliecie” sishü.

²Sitse mia sorou kharu peso-u cha, pesotsa kebau ze di par, mia puopuokecü puo dzie nu mia kedukhri rünyie se tuo; uko donu linenpfhe kedzie puo tuo, leshü kethubou puo se puo khieki tuo. Uko le di merenyi pie kechü ruosuoba khieki thata.

³Mu harie, Israel Kepenuopfü zapuzayieu Cherub bakecüu geinu sieta, di kiu kicie nu leta. Sitse Jihovae linen pfhe kedzieu, leshü kethubou puo seketuou kieshü,

⁴sidi sie puo ki, “Nadiu pfüthe vocie, Jerusalem pfüthe vocie, sidi sünu mhakerütsekecüko la thenou mezhie tsiu krayakezhamia kehoupuorei teikhie gei zasi vüshülie” si.

⁵Siro puo a nyie kinu kekreiko ki, “Puo siemedzi nadiu pfüthe vocie, sidi dukhriwalie; nie mhi bu mia ngu jokewa chü hie, tsiu mia ngumezhieta hie.

⁶Ketsamia, khriesamia mu rüümia, nhicumia mu thenupfümia shierei dukhri lotsowalie, derei u gei zasi kebamia we nyü hie, siro a kemesa chüu nunu sedeliecie,” sishü. Süla uko kiu mhodzünu ketha pehüko geinu sedeta.

⁷Sitse puo uko ki, “Kiu bie perhuwalie, mu dukhrikewako pie kietiezhau ketshu chüwaliecie. Tuoshülie!” sishü. Süla uko tuo pra di nadiu nu themiako dukhri vota.

⁸Uko mia dukhri vota mu a rübeita, sitse a tetsu zhüta mu kra di sie, “He-i Niepu-u Ukepenuopfü! No n noupfhü miu pie Jerusalem geikeshü ki Israel peshapie kebako pete pekawatatieya memu?” sishü.

⁹Sitse puo a ki, “Israel mu Juda kiu mhakesuokechü zhakhra zhathorte, siro kijüu thezie bu tshupfü bate tsiu nadiu thenoukere bu tshupfü bate; kekreilamonyü ukoe, ‘Jihova kijüu khawate mu Jihova nguya mo.’ si baya.

¹⁰Derei a la we, a mhi mia ngu jowalie lho morei a mia ngumezhielie lho, derei a uko mhathoko pie uko tsügei shüshütuoüzhie” si.

¹¹Sitse themia linenpfhe dzie ketuo kethukerubou se ketuou la vor di pucü, “No a ki diekhakeshü mhiei a chüwate” sita.