Read Angami Naga Daniel 1 Bible Online

Daniel 1 - Angami Naga bible

Daniel 1

¹Juda kediu Jehoiakim dikelie cie se cie Babilon kediu Nebukadnezar Jerusalem nu vor di süu re.

²Siro Jihovae Juda kediu bu puo khro leta, süsie rei Ukepenuopfü kiunu mhabou huorei sa. Puoe süko se Shinar[1] kijünu vor, di mhabouko pie puo rhuoko kinyibou nu bawa.

³Süsie kediue puo ki kemeho kezhau Ashpenaz bu Israelmia kedi yie mu kevimia,

⁴khriesa ulhe ulhou tseikecümia, zivi, mhasi cha kehoupuonurei kesimia mu mhacamhala si mu mha kele, kediki nu puo lie chülie kevimia huo ze vornuta; Chaldianmia mhasi mu puo die se uko pethalieketuo la.

⁵Siro kediue teisonhie kediu kecüca mu zu nunu se uko ya chüshü. Cie se uko pethatuo, sidi süteiu tseilie tse uko bu kedikiu nu balie kevi chüketuo la.

⁶Süko donu Juda yiemia Daniel, Hanania, Mishael, mu Azaria rei sa.

⁷Siro kedikiu nu kezhau uko zathoshü: Puoe Daniel pie Belteshazar chü, Hanania pie Shadrak chü, Mishael pie Meshak chü, mu Azaria pie Abednego chü.

⁸Derei Daniel-e kedimia kecüca mu zu zakeshüko pie puo thuo puo perhuwa molieketuo leta; süla puo kedikiu nu kezhau ki puo bu puo perhuwa molieketuo la cha.

⁹Siro Ukepenuopfüe Daniel bu kediki nu kezhau neichülie mu puo khriepfülie.

¹⁰Kediki nu kezhau Daniel ki, “A a niepuu kediu preilie; puoe nieko cüükrie morokesuoko pethoshüte. Mhanüu puoe nie chüümoe nieko tshümiako ki thachüketa ngu ro, niekoe a tsüu pie kemichie nu shüwatie” sita.

¹¹Sitse Daniel-e sie kediki nu kezhau puo pethopie Daniel, Hanania, Mishael, mu Azaria mehokebau ki,

¹²“N pezie rei zha ker n kituoko dojüshücie. Hieko bu cüketuo la ga mu krieketuo la dzü rübei khashücie.

¹³Sidi n thuo hieko mu kediu kecüca zashükeba cükecüko kenguu mehoshücie, sidi nie kedipuo ngulietuo shi süu medzi di n kituoko gei chüshücie” sishü.

¹⁴Süla puoe pukeshü hau puo medolie di zha ker uko mehoshü.

¹⁵Sitse zha ker sie uko zieko kedimia kecüca cükebako ki zivi mu ukoe luokuoketa ngulie.

¹⁶Süla uko kepfheu kediu zakeshü kecücako mu zuko khashü mota, sidi gako pie uko tsüta.

¹⁷Mu Ukepenuopfüe kesikele mu leshü mhasi kehoupuorei silieketuo do keviko se nuo dia hako tsüshü, mu Daniel bu ziemho mu u mho pete ca silie kevi pie tsüshü.

¹⁸Siro kediue uko ze vorketuo la kediue puotei chiekeshüu tsolie tse, kedikiu nu kezhau uko ze Nebukadnezar ki vo,

¹⁹mu kediu uko ze kerüchü. Siro uko peteko donu miapuorei Daniel, Hanania, mu Azaria mhielie mota, süla uko bu kedikiu nu bata.

²⁰Siro mhasi mu mhacamhala sikelie cha kehoupuo nu rei kediu uko ketsokeshü ki, puo kedi khrükhro keba kemeduoko mu khrü themvü dze kesiko, thuophi, themouko pete ki va ker vikuokecü puoe nguta.

²¹Siro Daniel-e Sairos dikecü therie cie ketso rei sünu bata.