Read Angami Naga Daniel 2 Bible Online

Daniel 2 - Angami Naga bible

Daniel 2

¹Siro Nebukadnezar dikelie cie kenie cie, puo mho kro puo pema mu puo mho süko puo nou chükemezhie pie puo bu zelie kenjüta.

²Süla kediue kemeduoko, khrüthemvü dze kesiko, mu themouko tsiu Chaldianko kieshünu di diekhashü, kediu mhoko pie puo pesishüketuo la. Sitse uko vor kediu mhodzünu thalie,

³sitse puo sie uko ki, “A a mho puo pema di a noue süko si nyücü la kemezhie se bate” sita.

⁴Sitse Chaldianko sie kediu ki (Aramikmia die nunu)[2] “He-i kediu rheikechau chüliecie! N kituoko ki n mhoko pushücie, sitse hieko puocau kela se parshütuo” sita.

⁵Sitse kediu uko die kela di sie, “Mechü mhodzünu die puo khashüya: Mhanuü nieko a mho mu süko ca pushü mo liro, nieko ciechücierhawatuo, mu nieko kiko bierhuopie zhüwatuo.

⁶Derei mhanuü niekoe a mho mu süko ca pushülie liro, nieko a ki nunu mha methuo mu zhakhra tsiu therhu kezha ngulietuo. Süla a mho mu süu ca pushücie” sita.

⁷Sitse uko va kenieu rei puo ki, “Kediu bu puo mhoko pie puo kituoko ki pucie, sitse hieko süko ca pushütuo” sishü.

⁸Sitse kediu la sie, “Nieko puotei ngu salie nyü keba a si tou bate, kekreilamonyü a thezho kemetei se puo khashüwaketa la:

⁹Mhanuü nieko a ki a mho pushü mo liro, nieko la mhapuo rübei keba zo. Puotei puo rüdi vor kemochie nieko a ki kemeda chatha kekrükecü dieko pu vor tso. Süla a mho a ki pushücie, sitse nieko süu ca a ki pulie kevi a silietuo” sita.

¹⁰Sitse Chaldianko kediu ki, “Kijü nu miapuorei kediu cha keba hau pie puo pekieshülie lho zo! Siro kedimia puorei puo thuo zha mu kuo phi barei, miapuorei kemeduomia morei khrü themvü dze kesimia morei themoumia morei Chaldianmia ki mha haikecü ketso chie mo zo.

¹¹Kediu mhacha kebau rethorcü puote, mu themia ze lhou bakemo terhuomia zo kemosie miapuorei hau pie kediu ki pushülie kenjü” sita.

¹²Mhahau la kediu puo nei mo kemerie chüta, sidi Babilon nu mhakesimia pete pekawanuta.

¹³Sidi thezho-u khashüwa, mu mhakesiko pekatuoü sieta; sidi ukoe Daniel mu puo zeko rei pekawatuoü pfhü vota.

¹⁴Sitse Daniel menuo mu mhale di Ariok, kediu khro kezhau, Babilon nu mhakesiko pekawatuoü kevor-u ki mha pushü;

¹⁵sidi puo sie Ariok kezhau ki, “Kiüdi kediu zho-u rükrei seta ga?” sishü. Sitse Ariok-e Daniel ki thedzeu pushü.

¹⁶Süla Daniel kediu kinu le di kediu bu puotei pie puo tsünu cha mu puoe kediu ki puocau pushütuoüshü.

¹⁷Süsie Daniel puo kinu vota sidi puo zeko Hanania, Mishael mu Azaria ki pushü;

¹⁸sidi pekhrepie keba hau dze Ukepenuopfü ki ngukemezhie pfhüketuo uko ki pu, Daniel mu puo zeko tsiu Babilon nu mhakesiko pete bu kaüjüta moketuo la.

¹⁹Sitse theva gei Daniel ziemho nunu si mo kebau pie puo pengushü, mu Daniel-e teigei Ukepenuopfü tsheshü.

²⁰Daniel-e sie: “Ukepenuopfü za bu thephou pete nu meyieliecie, mhasi mu kekuo puo vie zocü la.

²¹Puoe bavüdoko mu puoteiko bie kedishüya, kedimia bu krütaya mu kediko bu sielieya; puoe mhasipie mhakesimia tsüshüya, tsiu kesikelepie mhacamhala silieyakezhamia tsüya.

²²Puoe mhakesouko mu pekhrepie kebako hielashüya, puoe kezeiu nu kedipuo ba shiü siya, tsiu kezieu puo ze baya.

²³He-i a puonuoko Kepenuopfü, n ki, kethezie mu ketshe khashüya, noe mhasi mu kekuopie a tsükeshü la, tsiu hie n ki kedipuo chashüya shi süu se hie pesishü, kekreilamonyü noe kediu diekhakeshü pie hie pesipengushüte” isi.

²⁴Süla Daniel-e Ariok, kediu puo bu Babilon nu mhakesiko pekawa nu ketsekeshüu ki vo, sidi sie puo ki, “Babilon nu mhakesimiako pekawa hie, a ze kediu ki vocie, sitse a puocau pie kediu ki pushütuo” sishü.

²⁵Sitse Ariok rükrei Daniel ze kediu mhodzü vor sidi sie puo ki: “A Judamia mia die chüketuo nunu kediu ki puoca kelashülie kevi puo nguliete” sishü.

²⁶Sitse kediu sie Daniel, puo za Belteshazar üyakezhau ki, “No a mho pemakecüu mu puocau pushülie vi me?” sita.

²⁷Daniel-e kediu ki, “Mhakesimiako, khrüthemvü dze kesiko, kemeduoko, morei themouko miapuorei kediu ketsokeba kepekhre hau kediu ki pushülie kenjü,

²⁸derei teigei keba Ukepenuopfüe mha pekhrepie keba hako pushülie vi, mu puoe thela teiko nu kedipuo chü vortie shikecü se kediu Nebukadnezar pesishüzhie. No n zhü gei kezhü ki n mho mu n tsü nu ziemhoko hakoha we:

²⁹He-i kediu, n ki, no n zhü gei kezhü ki, n nouleko vo thiesie kedipuo chü vortuo shicüko, mu kepekhreko pekieshüyakezhaue mhachü vorketuoko pie n pengushü bate.

³⁰Derei a la we, kepekhre hau kekreimia ki mhasikuocü la a pekieshü mo zo, derei kediu ki puocau pu pesishüketuo la, mu n bu n nou medokebako silieketuo la zo.

³¹“Noe meho tha, he-i kediu, mu harie; miarhi kezha puo tha. Miarhi hau zha se, puo kezie zie se, mu süu n mhodzünu tha, mu süu rhi kemeriekecü puo.

³²Miarhi hau tsü suna kevipfü, puo merü mu puo boukako rakachü, puo metsuou mu puo doko merenyi,

³³puo phi thegi, puo phizhü huo thegi mu huo rünyo.

³⁴No meho tha ru, themia dzie se mo di ketsieu phrowa, mu süu thegi mu rünyo pie kechü miarhi süu phizhü va sidi süu bietshie phawa.

³⁵Sitse thegi, rünyo, merenyi, rakachü mu suna hako pete bietshie phawa, sidi teile ki shie nu shübe kemhiewata, mu teikhrie-e süko hepieta, sidi süko puo sie yopuorei ngulie kenjüta. Derei miarhi vakeshü ketsieu sier di kijüthou kezha puo chülie sidi kijü pete tshupfülieta.

³⁶“Hau n mho-ute; hie süu cau se kediu ki pushütuo:

³⁷No, he-i kediu, kediko mho kediu, teigei Ukepenuopfü kedirüvieko, kekuo, kezha, mu zapuzayie kechü pie puo tsükeshüu,

³⁸kehourapuorei lhouketuo themianuo, lie nu nhachüko, mu teikhrie mu teirako pie puo dzie nu keshüu, tsiu uko kekhaketuo la piesierkeshüu-noe suna tsüu zo.

³⁹N sie n ki thachükecü kedi puo siertuo, süsierei merenyi kedi seu sier di kijü pete kekhatuo.

⁴⁰Siro kedi diau siertuo, thegi mhie kuo phituo; thegi-e mha pete bietshie mu vütshiewayakezha tuoi, süue mha hako pete bietshie mu vütshie phawatuo.

⁴¹Siro no puo phizhü mu phikinuoko za huo litho-u nyo, mu huo thegi kengu tuoi, puo kedirüvie-u kezawatuo; derei thegi kemetei kemhie huo sünu ba, noe thegi mu nyoba kereikecü kengu mhie di.

⁴²Siro puo phikinuoko huo thegi, mu huo rünyokecü tuoi, sütuoi kedi huo metei mu huo protatuo.

⁴³Siro no thegi mu nyoba kereikecü kengu tuoi, ukoe kesekerikecü nunu huoniehuo ze kereitatuo,[3] derei uko keze puochü balie lho, thegi mu rünyo kereilieya kemo tuoi.

⁴⁴Siro kedi süko teiki teigei Ukepenuopfüe kedi puo, mhakipuorei pekawalie kelho puo morei puo kedi khapie kekreimia tsüwalie kelho puo piesieshütuo. Sidi süue kedi hako pete bietshie phaiwatuo mu uko pie puo thela chüwatuo, tsiu puoe kechachie thatatuo;

⁴⁵noe kijüthou geinu thedzie üse phro kemo tsie kenguu tuoi, mu süue thegi, meseu, rünyo-u, rakachü, mu sunau bietshiephawatuo. Ukepenuopfü kezhaue hasie kedipuo chü vortie shikecü pie kediu pesishüte. N mho-u ketho zo, mu puocau pelelie sü zo” sishü.

⁴⁶Sitse kediu Nebukadnezar zeretsu zhüta, sidi Daniel rüsuo, mu uko bu lhacülhale ruosuo mu mharekethengu ruosuo chüpie puo tsü nu diekhashü.

⁴⁷Siro kediu Daniel ki, “Ketho zo, n Kepenuopfü terhuoko mho Kepenuopfüta zo, mu kediko mho Niepuu tsiu mhakepekhreko hielashüyakezhau zo, noe mha pekhre hau hielashüta kecü la” sita.

⁴⁸Sitse kediue mha kekra methuo pie Daniel tsü, mu puo chüpie Babilon kedi rüvie pete mho mhakekhakecüu chüshü mu Babilon nu mhakesimia pete mho kesitho-u chüshü.

⁴⁹Sitse Daniel-e kediu ki chashü, di Shadrak, Meshak mu Abednego uko chüpie Babilon kijünu kezha chülie. Derei Daniel zowe kediu kinu bata.