Read Angami Naga Daniel 3 Bible Online

Daniel 3 - Angami Naga bible

Daniel 3

¹Kediu Nebukadnezar-e suna miarhi puo chülie, puo rükrie thu hiesorou, mu puozha thu sorou; sidi puo süu pie Babilon kedirüvie nu keba Dura razhanu pedoupie thalie.

²Süsie kediu Nebukadnezar mia ketsepie kedinuoko, kezhako, miakekhayakezhako, miatahitarhoyakezhako, kinyikeseko, kethoca cayakecüko, capimiako mu kedirüvie nu kezhako pete kishü, uko bu kediu Nebukadnezar chükeshü miarhiu seüdekecünu vor kengulienu di.

³Süla kedinuoko, kezhako, miakekhayakezhako, mia tahitarhoyakezhako, kinyikeseko, kethoca cayakezhako, capimiako, mu kedirüvie nu kezhako pete vor kengulie, Nebukadnezar chükeshü miarhi seüde mhathoko chütuoü di. Siro uko Nebukadnezar pie chükeshü miarhi mhodzünu thalie tse,

⁴phekeshieko shiekhoui di, “He-i themiako, seyieko, mu die kekreikreikecüko pete ki diekhashüya,

⁵süla nie mhakekhou pfhe, luoü, nyarübou, trigon, harp, übou, mu tsali doneiünei pfhe si ro, nie tsu di kediu Nebukadnezar chükeshü suna miarhiu rüsuotuo.

⁶Kehoupuorei tsu rüsuokemo-u rükri te kelhoupie süki mi chü sepie keba miü metsuo nu shü mhaiwatuo” sishü.

⁷Süla themiako tatou pfhe, luoü, nyarübouko, trigon, harp, übouko mu tsali neiünei peteko pfhe sishü mumetha, themiako pete, seyieko, mu die kekreikreicü peteko tsu Nebukadnezar chükeshü miarhiu rüsuota.

⁸Siro süteiki Chaldianmia huo tuo penuo vor, di Judako pejota.

⁹Sidi uko sie kediu Nebukadnezar ki, “Kediu bu rhei kechau chüliecie.

¹⁰He-i kediu no we thezho puo chüshü, süu themia kehoupuorei tatou pfhe, luoü, nyarübou, trigon, harp, übou, mu tsali neiünei pfheko sishü tse tsu suna miarhiu rüsuotuoüshüe,

¹¹mu kehoupuorei tsu rüsuo moro kelhoupie mi tukebau nu shüwatuoüshüe.

¹²Mu Judamia huo no uko petho pie Babilon kedirüvie nu mhakemeho kezha chükecüko: Shadrak, Meshak, mu Abednego ba. Hako n dieze nu ba mote, he-i kediu uko n rhuoko lie chü ba mote mu ukoe no suna miarhi chükeshü rüsuo mote” sishü.

¹³Sitse Nebukadnezar puo nei mo se di Shadrak, Meshak, mu Abednego ze vornu pushü; süla uko süko ze puo mhodzünu vorshü.

¹⁴Sitse Nebukadnezar sie uko ki, “He-i Shadrak, Meshak, mu Abednego, nieko a rhuoko lie chü mo mu nieko suna miarhiu rüsuo moücü ketho me?

¹⁵Tsie nieko tatou pfhe, luoü, nyarübou, trigon, harp, übou, mu tsali neiünei pfhe kesiki tsu di a chükeshü miarhiu rüsuolie liro vi zo. Derei mhanuü nie rüsuo mvü ro, tsie rükri nieko kelhoupie mi tukebau nu shüwatuo, siro terhuo kikecü puonie a dzie nunu nie kelalie vituo ga?” sita.

¹⁶Sitse Shadrak, Meshak, mu Abednego ukoe kediu die kela di, “He-i Nebukadnezar hieko mhahau la we n ki hie mezhü pu morei vi.

¹⁷Mhanuü Ukepenuopfü hie puo lie chüyakezhau mitu keba miu nu mu n dzie nu hie kelalietuoü ro, he-i kediu, puo bu hieko kelaliecie.

¹⁸Derei mhanuü silie lho zoürei, süu n bu siliecie, he-i kediu, hie n rhuoko lie chülie lho mu hie no suna miarhi dukeshüu rüsuolie lho” sishü.

¹⁹Sitse Nebukadnezar-e puo nou rüpe phi di Shadrak, Meshak, mu Abednego petsou di puo zie teimekieta. Sidi puoe mi chüpie kezhü de va thenie chü petu salienu diekhashü,

²⁰sidi puo rüpfhünuo donu kemecathomia bu Shadrak, Meshak mu Abednego phalie di kelhoupie miü nu khashüwanu diekhashü.

²¹Süla uko phalie, uko boulie, u nei, u tsüreko, mu uko pfhenei kekrei rei se zo di uko kelhoupie mi tu se kebau nu shüwa.

²²Siro kediu diekhakeshüu chü mhai morosuota mu miu lethorkecü la miü bu Shadrak, Meshak, mu Abednego pie kevoko thekhriwa.

²³Derei mia seko Shadrak, Meshak mu Abednego zowe u phapfü di le mi tukeba metsuo nu zhüta.

²⁴Sitse kediu Nebukadnezar puo ngota di rükri sieta. Sidi puo mia tarhoyakezhau ki, “We mia se kelhoupie mi nu shü mo me?” si. Ukoe kediu ki, “He-i kediu, süu ketholie” ishü.

²⁵Sitse puo lasie, “Derei a u phreipfü ketha mia dia, miu metsuo nu chatuoketuo ngute, mu uko the moto zo; tsiu u diau we terhuorhimia puo mhie zo[4]” sishü.

²⁶Sitse Nebukadnezar mi tukeba kikha penuo phi di sie, “Shadrak, Meshak, mu Abednego, Kerükrietho Kepenuopfü kituoko, tuo parlie! Sidi haki vorlie” sishü. Süla Shadrak, Meshak, mu Abednego ukoe miu nunu tuo parlie.

²⁷Sitse Kedinuoko, kezhako, mu kediu themia miatarhoyakezhako vor kengukebako themia hako moko gei mi kekuo ba kemo, morei uko tsütha thewa kemo, uko pfheneiko thewa kemo, tsiu uko gei mi re rei tuo kemo ngulie.

²⁸Sitse Nebukadnezar sie, “Shadrak, Meshak mu Abednego Kepenuopfü tsheliecie, puo dieliemia ketseshü di puo kituoko puo peleyakezhako kelakelieu. Ukoe kediu die zemvü mu uko Kepenuopfü zo kemosie terhuo kekrei puorei lie chü morei rüsuolie lhoü di uko phou khashü zo.

²⁹Süla a thezho puo chüshüya: Seyie kehoupuorei morei die kekreikrei puyakecü kehoupuorei Shadrak, Meshak mu Abednego Kepenuopfü thakecümia u mo duchüdurhawatuo, mu u kiko pekawatuo; terhuo kekrei hakemhie di mia kelashüketuo ba mo zocü la” sita.

³⁰Süsie kediu Babilon kedirüvie pete nu Shadrak, Meshak mu Abednego chü pezhashü.