Read Angami Naga Daniel 4 Bible Online

Daniel 4 - Angami Naga bible

Daniel 4

¹Siro kediu Nebukadnezar, themia peteko, seyieko, die kekreikreicüko kijü nu lhouketuo peteko ki: Nieko vi kehie miemiekelieu chüliecie!

²Kerükrietho Kepenuopfüe a gei zasiko mu u ngothoko chükeshüko lepie a neibate.

³Puo zasiko kide zha shi, Puo u ngothoko kide rei kuo shi! Puo kedi-e kechachie keba kedi, mu puo dikecüe thephou puo nunu vo thephou puo ketsoya.

⁴A, Nebukadnezar, a kinu rüleitshüi mu a kediki nu kruo phi ba ru.

⁵A mho pemate mu süu la a michiete; a zhü nu a nou keleko mu a tsü nu ziemhoko a keyhute.

⁶Süla a die khashü di Babilon nu mhakesimia pete ze a mhodzünu vornushü. Uko bu a mho cau pie a ki pushüketuo la.

⁷Sitse kemeduoko, khrüthemvü dze kesiko, Chaldianko mu themouko a ki vor, mu a uko ki a mho pushü, derei ukoe puocau a ki pulie mote.

⁸Sirei Daniel a mhodzünu vor-Belteshazar üdi a rhuou za nunu puo za thokeshüu, mu puo gei terhuo kemesako ruopfü ba[5] mu a puo ki a mho pushü:

⁹“He-i Belteshazar, kemeduoko kezhau, kemesa rhuoko ruopfüu[6] n gei keba a si, mu pekhrepie keba puorei n mhata mo zo. Süla a mho pemakecü hau we; puoca a ki pushücie.

¹⁰A zhü geinu hauha ngu; Kijü metsuo nu seibo puo ba, mu süu rükriethor zo.

¹¹Seibo-u memie sie zha mu meteilie, puo mezüu kho tei tso ba, mu kijü kela pete süu nguta.

¹²Süu nyüko zivi, puo si kra phi, tsiu sü geinu kecüca pie mia pete tsüya. Nha nu nhachüko puo khronu teisü ngulieya, teirako süu coko gei baya, tsiu kerheiro keba khe süu geinu pevülieya.

¹³A zhü gei, a tsü nu ziemho nunu a meho zo tha, ru rükhoumia kemesa puo teigei nu ker.

¹⁴Puoe melie peto di sie: ‘Seibo-u wiwalie mu puo coko zawalie, puonyüko kenieriewalie mu puo siko kezawalie. Nhachüko bu puo khronu tatalie, mu teirako bu puo coko geinu pruotalie.

¹⁵Derei puo mvüu mu puo mieko kijünu khapie bawalie, thegi mu mesepie phapie balie, lie nu nha kemenera nu. Teigei thezeiu bu puo petselie, mu puo bu nhachüko ze kijü nu nha pie puo ya chütuo.

¹⁶Puo nou bu themia nou geinu rüditacie. Sidi khunuo noupie puo gei shüwacie. Sidi va thenie puo gei sishülie.

¹⁷Mha hau rükhouko bu die khashü, mha pepikelieu kemesau thuo thezho khakeshüu zo, süusü themia lhoutuoyakezhamia bu Kerükrietho-ue themia mho di bayakezha silieketuo la; puo süu khapie puo medomia tsüya, mu themia zhasethomia pie sümho bashüya.’

¹⁸A mho hau, a Nebukadnezar kediu ngushü. Belteshazar no tsie süu ca pushücie, a kedi nu mhakesimiako pete puocau pie a ki pushülie lhoketa la. Sirei no pulie vi, kemesa rhuoko ruopfüu n nou keba la” sita.

¹⁹Sitse Daniel, Belteshazar üyakezhau hie puo kemekrie thata. Puo keleko puo kedewaketa la. Sitse kediu sie, “Belteshazar, a mho-u morei puocau bu n kedewa hiecie” sishü. Sitse Belteshazar puo die kela di, “A niepuu, n mho-u bu n ngumecüyakezhamia la, mu puocau bu n ngumvümia la tacie!

²⁰Seibo no kenguu memie mu zha metei sie di puo mezü kho tei thu mu kijü vala ketso ngulie vita,

²¹puo nyüko zivi mu puo si kra phi, sidi kecüca pie mia pete tsü, puo khronu lie nu nhachüko lhou, mu puo coko gei teirako bu u kruchü,

²²sikecüue no zo, he-i kediu! Noe zha mu kuo philie zo. N kezhae sie tei thu, mu noe kijü vala ketso nu kedi chü.

²³Siro kediu rükhoumia kemesa puo teigei nu keker ngu mu süu sie, ‘Seibo wiwalie mu pekawalie, derei puo mvüu mu puo mieko kijü geinu pie bawalie, thegi mu mesepie phawa di terha nha menekecüra pie bawalie; mu teigei thezei bu puo petselie, sidi puo bu lie nu nhachü ze di nha puo ya ngucülie, va thenie puo gei vor kemo ki’

²⁴puocau sü hau, he-i kediu, mu Kerükrietho-u diekhakeshü, a niepuu kediu gei kevor haute:

²⁵Themia krotho nunu n whuowatuo, sidi n bu terha nhachüko ze batatuo. Noe thudo kemhie nha liecütuo, noe teigei thezeiu rüloutuo, sidi va thenie n gei si vortuo, Kerükrietho-u themia pete mho diba, tsiu puo kedi pie puo nouliemia tsüyakecü no silie kemochie situo.

²⁶Siro seibo mvüu mu puo mieko pie bawalienu di diekhakeshü tuoi, no Teigei mhakekha sebayakecü sikelie nhie, n geinu kedi chü pesie lalietuo.

²⁷Süla, he-i kediu, a tarhokeshü dieu lieliecie: Kemiatho pie n kephouma chü kemesaliecie, mu mia u peseyakezhako ngumezhiekeshü bu n kejokemouko khrüwaliecie, sitse no vikezhü haha ba pechalietuo” sishü.

²⁸Mha hako pete Kediu Nebukadnezar gei vorta.

²⁹Khrü kerekenie sie ki puoe Babilon kediu kitsü gei tuo,

³⁰süki kediu sie, “Babilon kemeyie haha a kemecakemekhro mu a kekuo kezha üse a nadi haha chülie moü me?” ishü.

³¹Sitse kediu diepu pedzethaluocü nu mhapfhe puo teigei nu ker di; “He-i kediu Nebukadnezar n la mha haha pushüte: Kedikechü n ki nunu tuotazhie!

³²Themia krotho nunu n whuowatuo, mu n bu terha khunuoko ze batatuo. Noe Kerükrietho-u themia kedi pete mho di ba mu puoe kedipie puo nouliemia tsüya ücü silie kemochie, n bu thudo mhie nhalie cütuo, mu va thenie n gei si vortuo” sita.

³³Süsie süko pushü mumetha Nebukadnezar petsoukecü dieu chü tsei vorta. Themia krotho nunu puo whuowa, puo thudo mhie nhalie cü, mu puo moe teigei thezei rülu, mu puo tsütha chapie tsüüra mie tuoi tsiu puo dzietseko pera dzietse mhieta.

³⁴Siro zha süko tseita tse, a Nebukadnezar, tosie teigei mehoshü, sitse a siele la vorlieta. Sidi a Kerükrietho-u tsheshü, mu puo thezieshü tsiu kechachie rhei tuoyakezhau rhushü. Kekreilamonyü puo kedi-e kechachie kedi, tsiu puo kedi-e thephou pete nu voya.

³⁵Kijü nu lhou ketuo peteko zo we puo mhodzünu mhathopuo kemo mhie zo, mu teigei krodi ze di kijü nu lhouketuo pete gei puo medo kemhie chüya. Siro miapuorei puo dzie khalie lho morei sie puo ki, “No kedipuo chüya ga?” ireilie lho.

³⁶Sükisü a siele la vorlie; mu a kedirüvie bu zapuzayie chü lalieketuo la therhu mu kruokelie a gei la vorlie. A themia miatarhokezhako mu a niepuko a ngu lalie, sidi a kedirüvie nu a di sede lalie, tsiu a chüpezha phi sashü.

³⁷Süla tsie a, Nebukadnezar, teigei kediu tsheshü, pu kerükrie mu rhukeshü puo mhatho pete ketho zo, puo zhoko kethocau zo, mu puo kemiako tuoyakezhako chü kerünuowaya.