Read Angami Naga Daniel 5 Bible Online

Daniel 5 - Angami Naga bible

Daniel 5

¹Siro kediu puo krütamia mia nyie puo la thehe puo keseshü, mu puoe mia nyie puo mhodzünu zu krie ba.

²Siro Belshazar-e zu krie mezelieta tse, puo puo Nebukadnezar Jerusalem nunu chükelie suna mu rakachü khouko se vornu diekhashü, sidi kediu mu puo krütako, puo kimia mu puo pelipfüko bu süko nunu zu krieketuo la.

³Süla ukoe Jerusalem nu Kepenuopfü rüsuokiu nunu chükelie suna mu rakachü khouko se vorshü, sitse kediu mu puo krütako, puo kimiako, mu puo pelipfüko süko nunu zu krie.

⁴Sidi ukoe zu krie tse sie suna mu rakachü, merenyi, thegi, sei mu ketsie rhuoko tsheta.

⁵Sitse kedikiu nu sozha nyhüpie keba mitubau kepetsoutsa nu themia dziekinuo par mha thuta. Siro kediue mhathu keshüu meho ba.

⁶Sitse kediu zie ngu pesuo vorta, mu puo keleko puo kedeta. Puo bou puo doko mezieta, mu puo khudzanie kevü khrukhruta.

⁷Sitse kediue melie shiekhoui di sie khrüthemvü dze kesiko, Chaldianko, mu themouko ze vornuta; siro kediu Babilon nu mhakesiko ki, “Kehoupuorei khuthu hau phrülie mu a ki puocau pulie liro puo bu pfhenei keloshükecü setuo, suna cü kelietuo, mu kedirüvie nu kezha seu chütuo” sishü.

⁸Sitse kediu themia mhakesiko pete vor, derei khuthu phrülie kenjüta morei puocau pie kediu ki pushülie lhota.

⁹Sitse kediu Belshazar michie seta mu puo zie ngu pesuo seta tsiu puo krütako u nou meyhumezhieta.

¹⁰Siro kedipfüe kediu mu puo niepuko kerüchü ketha sishü tse, thehe bouu nu vor. Sidi kedipfüe sie, “He-i kediu, rhei kechau chüliecie! N keleko bu n kedewa hiecie morei n zie bu zisuota hie.

¹¹N kedirüvie nu mia puo kemesa rhuoko ruopfü puo nou bayakezha puo ba. N puo teikiko nu terhuoko mhasi kemhiei, puocapuola sikelie mu mhakesikele puo gei keba ngu. N puo, kediu Nebukadnezar, puo chüpie puo bu kemeduoko, khrüthemvü dze kesiko, Chaldianko, mu themouko mho kezha chüwa,

¹²kekreilamonyü ruopfü kevitho puo kesikele, mu u mhoca pulie kevi mhasi, dieviko ca pukelie, mu mhakereko mezamezhüshülieyakezha Daniel gei ba, kediue puoü Belteshazar üyakezhau. Süla tsie Daniel kieshücie, sitse puo puocau pushütuo” sishü.

¹³Süsie Daniel ze kediu mhodzünu vor. Sitse kediu sie Daniel ki, “No Daniel, Judamia mia die chü kevor-u, a puo kediu Juda nunu ze kevor-u me?

¹⁴A n dze sikecü noe terhuoko ruopfü n geituo, mu mhacamhala kesi, kesikele, mu terhuomia mhasi kevithopfü n gei ba üsi.

¹⁵Siro mhakesimia, khrüthemvü dze kesimia bu a mhodzünu vor di khuthuu phrü mu puocau pu a kienushü, derei uko mhahau ca pupie a kielie kenjüte.

¹⁶Derei a sikecü no puocau pulie vi mu mha kere hau meza toushüketuo site. Süla no mhanuü khuthu hau phrülie mu puocau pushülie vi üro, n bu pfhe keloshükecü dzietuo, suna cü kelietuo, mu n bu kedirüvie nu kezha seu chütuo” sishü.

¹⁷Sitse Daniel-e kediu mhodzünu nu puo die kela di, “No mha methuo khashütuoü kebako bu n vie chü ba zolie, morei n zhakhrau pie kekreimia tsüwalie! Sirei a khuthuu phrüpie kediu pesishütuo mu puo bu puocau silietuo.

¹⁸He-i kediu, Kerükrietho Kepenuopfüe kedikechü, zhakecü, zayie mu kuokecü pie n puo Nebukadnezar tsüshü.

¹⁹Siro puoe zhakecü pie puo tsükeshü la, themia pete, seyieko, mu die kekreikreikecüko puo mhodzü michie mu pe vor. Puoe dukhri kenyüko dukhriwa, perheipie ba kenyüko perheipie ba, therhupie tsü kenyüko therhupie tsüshü, mu chü kerünuowa kenyümia chü kerünuowa.

²⁰Derei puo nou rükrie sieta mu puo kemiako di puo nou reketa ki, kediba geinu puo khawa, tsiu puo zayieu puo geinu chüwa.

²¹Sidi themia kro-u nunu puo whuowa, tsiu puo kele chüpie khunuo kele mhiewa. Puoe Kerükrietho Ukepenuopfüe themia kedi mho puo kekuo keba, tsiu puo kedi pie puo nouliemia tsüyakecü silie kemochie, puo bu nha nu gurako ze bata; tsiu teigei thezei bu krü puo va.

²²Siro no, puo nuou Belshazar, n nou rünuolie mo, no hako pete si zorei!

²³No n thuo n chü kerükrie pie teigei Niepuu mho shüwate! No rüsuokiu nu mhakhouko se n mhodzünu vor, sidi no mu n krütako, n kimiako mu n pelipfüko süko nunu zu krie. Noe rakachü mu suna, merenyi, thegi, sei mu ketsie rhuoko rüsuo, sükoe mha ngu morei silieya mo; derei n keha puo dzie nu keba Ukepenuopfü mu n chako pete puo vie zokecüu, no süu rhulie mote.

²⁴“Süla puo thedzieu ketseshü di khuthu hau thushüte.

²⁵Siro khuthu thukeshüu hamhie: MENE, MENE, TEKEL, mu PARSIN.

²⁶Siro hauha puocaute: MENE, Ukepenuopfü n kedi zhako phrüliete mu süu se puo thela nu vorte;

²⁷TEKEL, roshükhou nunu n mejüliete tsiu no tso mocü nguliete;

²⁸PERES,[7] n kedi kezawate sidi khapie Medesmia mu Persiako tsüwate” sishü.

²⁹Sitse Belshazar diekhashü, sidi Daniel bu pfhe keloshükecü selie, suna cü kelielienushü, sidi puo bu puo kedirüvie nu kezha seu chütatuoü pesishüwa.

³⁰Süzhüsü mia bu Chaldianko kediu Belshazar dukhriwa.

³¹Siro Medesmia kediu Darius-e cie hiesorouekenie phichüketa ki süu lielie.