Read Angami Naga Daniel 6 Bible Online

Daniel 6 - Angami Naga bible

Daniel 6

¹Darius-e kedinuoko krie puo di mepfü bu puo kedirüvie pete mho baketuo puo neita,

²mu süko mho Daniel sa di kezha mia se bu ba; kedinuoko bu mhathoko pie uko ki pushülie di kediu bu mhapuo nu rei kata molieketuo la.

³Siro Daniel-e kezha kekreiko mu kedinuoko kirei mhachü pevikuo zolie kekreilamonyü ruopfü kevitho puo puo gei bakecü la, mu kediue puo bu kedirüvie pete mho ba nyüta.

⁴Süla kezhako mu kedinuokoe kedirüvie nyietsatie nu Daniel pejo nyüta. Derei ukoe kenyaketuo ca morei puo pejoketuo puorei ngulie mota. Kekreilamonyü puoe miatho zo, mu puo gei pecü mokecü morei mha kesuo chükecü puorei ngulie mo.

⁵Sitse themiako sie, “We Daniel pejoketuo ca puorei ngulie mo, puo Ukepenuopfü zho-utsa nu pfhü kemosie” sita.

⁶Süla kezhako mu kedinuoko kediu ki vor di sie, “He-i kediu Darius rhei kechau chüliecie!

⁷Kedirüvie nu kezhako, mha kekhakezhako, kedinuoko, mia tarhoyakezhako mu mha sekebakoe kediu zho puo sedetuoü mu mha kekhakecü puo chü kemeteituoü kedierheliete, süu themia kehoupuorei zha ser donu no zo kemosie Kepenuopfü morei themia ki kecha chü ro, he-i kediu, süu tepie losha bou nu shüwatuo.

⁸Süla tsie, he-i kediu, mha kekhakecü zho-u chülie di leshüu nu zasi vüshücie, sitse süu kediwa molietuo, Medes mu Persiamia zho kize süu kelawa molietuo” sita.

⁹Süla kediu Darius-e leshüu nu zasi vüshü di thezho-u khashüwa.

¹⁰Siro Daniel-e leshüu nu zasi vüshüwaketa si zoürei, puoe puo kiu nu vo ba zo, sünu kibou peso nu khirkiko khrüpie Jerusalemtsa vaba, sidi puoe hamhodzü chüyakezha tuoi di khunhie va se khoutou tsu Ukepenuopfü ki cha mu puo thezieya.

¹¹Siro puo kepetsouko vor Daniel-e Ukepenuopfü ki cha mu ngukemezhie pfhü keba ngulie.

¹²Sitse uko kediu ki vor thezho khashüwaketau pu di, “He-i kediu! No thezho khakeshü themia kehoupuorei zha ser donu, he-i kediu, n ki zo kemosie Kepenuopfü morei themia kehoupuo kirei cha ro puo kelhoupie losha bou nu shüwatuoükecü n za thushü mo me?” sita. Sitse kediu sie, “Mha süko ketho zo, mu Medesmia mu Persiamia zho-u medzi di süu kelalie lho” sishü.

¹³Sitse uko kediu die kela di, “Daniel Judamia miadie chü kevorko mia puo n die rünyü ba mo, he-i kediu, morei no thezho khakeshüu rei se mhaü ba mo, derei puo khunhie va se kechachü baya” sishü.

¹⁴Sitse kediu die süko sikeshü ki puo nou kemezhie seta. Sidi puo Daniel kelalieketuo leterta, sidi niaki leta kemochie puo hie chü di puo kelatuoüta.

¹⁵Süsie puo kepetsouko kediu ki vor di sie puo ki, “He-i kediu, Medesmia mu Persiamia zho sü, die khashükewa morei thezho puo kediu chüshüwata ro kedilieya mo zokecü siliecie” sishü.

¹⁶Süla kediu diekhashüwa, sidi Daniel ze vor kelhoupie losha bou nu shüwa. Kediu Daniel ki, “N Kepenuopfü bu dietho di puo lie chüyakezhau n kelaliecie!” sishü.

¹⁷Siro ketsie puo se vo losha bouu tienu khawa di kediu puo dziekha zasiu mu puo krütako zasipie sügei zasi vüshüwa; Daniel la rhükeshüu kediwa moketuo la.

¹⁸Süsie kediu puo kediki nu vorta, mu süzhü mevo zhüta; kecüca se puo ki vo mota, mu puo ze reilie mota.

¹⁹Sitse kediu khise sie zi selie di rükri loshako bou nu vor.

²⁰Sidi puoe Daniel khapie keba loshako bouu penuo vor tse, puo noukenyü chü Daniel kie peto di, “He-i Daniel, rheituoyakezha Ukepenuopfü kituou, no dietho di puo lie chütuoyakezhau loshako kinunu n kelalie nhie?” ishü.

²¹Sitse Daniel sie kediu ki, “He-i kediu, rhei kechau chüliecie!

²²A Kepenuopfü puo dieliemia ketseshü di loshako me keguliete, sidi uko bu a pechüwa molie, kekreilamonyü puo mhodzünu a kejo ba kemo la; tsiu n mhodzünu rei, he-i kediu, a kekrükecü puorei chü mo” sishü.

²³Sitse kediu puo neithorta sidi losha bou nunu Daniel zeparlienu diekhashü. Süla losha bou nunu Daniel ze parlie, mu puo bie kerüzakecü rhi puorei tuo mo, kekreilamonyü puoe puo Kepenuopfü pele tuokecü la.

²⁴Kediu diekhashü, sidi Daniel petsoukecüko ze vor, sidi kelhoupie losha bounu shüwa; uko, u nuonuoko, mu uko kimiako rei sa di. Siro uko losha bou thotsü nu ke tso kemo nu loshako uko telie di uko ruko bietshe phawa.

²⁵Süsie kediu Darius leshü thupie themia peteko mu kijü pete nu die kekreikreicü seyie peteko kishü: “Kruokelieu bu nie ketshu chüliecie!

²⁶A thezho puo chüshüya, süusü a kedirüvie nu kelhou themia pete Daniel Kepenuopfü mhodzünu michie mu pe zoliecie: Puo rheituoyakezha Kepenuopfücü la, Kechachie baya. Puo kedi mhakipuorei katalie lho, mu puo mha kekhakecü puo thela jü.

²⁷Puo shüphrakeshü mu kelakeshü, puoe tei mu kijü nie nu zasi mu u ngoko chükeshüu; kekreilamonyü puoe losha kekuo nunu Daniel kelaliete” sishü.

²⁸Sidi Daniel-e Darius kedi kechü ki mu Persiamia Sairos kedi teiki ketso rei vi kehie miemielie.