Read Angami Naga Daniel 7 Bible Online

Daniel 7 - Angami Naga bible

Daniel 7

¹Babilon nu kediu Belshazar di therie cie Daniel puo zhü gei kezhü ki puo tsü nu puo mho puo pema mu ziemho puo ngu. Süsie puoe puo mho-u thulie:

²A Daniel, theva geinu a ziemho puo ngu ru teigei teikhrie diako dzükezhau gei rükhrie vor,

³tsiu dzükezha nunu khunuo dia par, puoe puo ki krei.

⁴Kerieu losha mhie mu tsüü shüpfü chüpfü. Süsie a meho tha ru, puo shünie biewa, mu kijü geinu piesieta, tsiu themia phi kemhie di puo phi gei thalie, mu themia kele se puo tsüshü.

⁵Süsie khunuo kekrei puo, kenieu la par, süu ngupie thega mhie. Süu puotseitsa thalie, tsiu puo me nu puoke se puo hu donu ba mu süu sie, “Sielie di themianuo kekra mezuliecie!” sishü.

⁶Hau sie a meho tha ru, kekrei puo, khurhü kemhie puo par. Khunuou pera mhie puo sietsa puoshü dia nyi mu puo tsü dia ba; mu mha kekhaketuo kha puo tsüshü.

⁷Hau sie a theva gei a ziemho nu khunuo diau ngu, kemerie mu u phoumehou phi tsiu kuothor. Puo gei thegi hu kezhazhacü ba mu süko pie mha tecü mu mha tachie phawaya, tsiu keshako puo phi pie kedewaya. Siro khunuo hau puo mhodzü ketuo khunuo kekreiko ki kreikhro zo, puo kia ker ba.

⁸A puo kia dze le tha ru, puo kia kekrei kecüyo puo uko donunu the la par; puo bu baketuo thechü la, puo kia kerie seko puobo nunu phewa. Puo kia hau gei puo themia mhi kemhiecü ba, tsiu kemelha se di die pukecü me ba.

⁹A meho tha ru, kedibako pie thechüko nu balie, mu nnhie nnhie nu[8] Ketuou puo kediba nu balie, puo pfhenei-e pekrie kirei kra, mu puo tsüthae chümie kevipfü mhie; puo kedibae miü ketuchü, tsiu puothuoko rei miketuchü zo.

¹⁰Miü rücü chü par sidi puo mhodzünu nu kru par. Mia nyienyiekecü puo lie chü, tsiu nyie ker cü nyie ker puo mhodzünu tha. Mia ketsoketuo la dienyabau chülie, tsiu leshüdako lhalie.

¹¹Siro mha kiau kemelhakecü dieko kepu la ae sie mehoshü. Sidi a meho tha tse, khunuou dukhriwa, mu puo mo-u bie pesuowa di mi nunu thewaketuo la kelhouwa.

¹²Siro khunuo kekreiko la zowe, uko mia mho dilie keviu zorei chüseta, derei uko kerheiro zowe puotei huo mu dopuo la chü pechashü.

¹³Siro a theva gei ziemhoko meho tha tse, Themianuo rhi kemhie puo[9] teigei kimhouko nunu par. Sidi puo nnhie nnhie nu Ketuou[10] ki vor, sidi süu mhodzünu vor thalie.

¹⁴Siro mia mho dikecü mu zapuzayie tsiu kedikechüpie puo tsüshü, themia peteko, seyieko, mu die kekreikreikecüko bu puo lie chütuoü di. Puo mia mhodi ketuoe kechachie di baketuou zo, süu jütalie lho, mu puo kedi rei pekawalie kelho puo.

¹⁵A Daniel zowe, a ruopfüe a nounu kemezhie,[11] tsiu a tsü nu ziemhoko a kedeta.

¹⁶A a khieki ketha puo ki vo di mha hako dze ketho-u ketso. Süla puoe mhaca hako kelapie a pesishütuoüta:

¹⁷“Khunuo dia hako, kijünu kedi dia sierketuoko.

¹⁸Derei Kerükrietho-u kemesakoe kedirüvieko lielietuo sidi kechachie kedirüvieu se batatuo” sishü.

¹⁹Süsie a khunuo diau dze ketho-u si nyülie, süu kekreiko kirei kreikhro, ngu prei phi, puo hu thegiü chü mu puo dzietseko rei merenyi, tsiu süu mha tecülie di tachie phawa, mu keshako puo phipie kedewa;

²⁰tsiu puo tsü gei puo kia ker kebau, mu kekrei kepar-u tsiu süu ba la kerie seko bu tetsuta, puo kia gei puo mhi kebau mu kemelhakecü die kepu tieu tsiu kekreiko kirei zhakuokecüu.

²¹Siro a mehoshü tse, puo kia hau kemesako ze terhüchü sidi süko ki kuolie,

²²Nnhie nnhie nu Ketuou vor kemochie;[12] sitse Kerükrietho-u kemesako gei ketsokecüu khashü, mu kemesako bu kedirüvieu pevie lalieketuo teiu vorta.

²³Siro puo pukeshü haha: “Khunuo diau, kijünu kedi diau tuo, süu kedi peteko ki kreikhro; süu kijü pete mezulie tuo, mu süu kedewa, mu bietshe phawatuo.

²⁴Puo kia kerko ca liro, kedi rüvie hau nunu kedi ker siertuo, mu uko sie kekrei puo la siertuo. Haue kerieko kirei kreikhrotuo, sidi kedi seko biekhrüwatuo.

²⁵Puoe Kerükrietho-u petsoukecü dieko putuo, Kerükrietho-u vieketa kemesako bie pesuotuo, tsiu puotei kemesako mu thezho-u bie kediwa nyü sietuo; sidi puotei puo, puotei kenie,[13] tsiu puotei puotie idi süko khapie puo kekuo khrükhro shüwatuo.

²⁶Süsie dienyabau nunu capi chütuo, sidi puo mia kekhakecüu chü setatuo, sidi puo bie pejü mu peka tseiwatuo.

²⁷Siro kedi kechü mu mhakekhakecü tsiu teikhro kedirüvie pete khapie Kerükrietho-u mia kemesako tsüwatuo; uko kedikechüe kechachie dikecütuo, mu mia kekhakecü pete uko liechü mu uko dieze chütuo” si.

²⁸Thedzeu hai di tseite. A Daniel zowe, a keleko a kede phi, mu a zie ngusuo phita; derei a mha hako pie a nou balie.