Read Angami Naga Daniel 9 Bible Online

Daniel 9 - Angami Naga bible

Daniel 9

¹Chaldianko rüna mho, Medemia yie puo Ahasurus nuou Darius kedi chü,

²puo dikelie therie cie, a Daniel, teicie phrükecü leshüdau nunu, Jihova die Jeremia siedzekesiu geinu pukeshü, Jerusalem pekawatuoü di pukeshü chü tseilieketuoe cie hiethenietuoücü silie.

³Süsie a rürei Niepuu Ukepenuopfü kitsa vashü, mevo mu gakhropfhe tsiu mige se a kenhepfü di a kecha kelashünu chavü.

⁴A Jihova a Kepenuopfü ki a kejo phra di sie, “He-i Niepuu, kezha mu u ngokecü Kepenuopfü, n khrieyakezhako mu n diekhakeshüko sebayakezhako gei n ketseikevi mu dietseidiekhokelieu se baya,

⁵hie phoumawate mu kekrüwate, rügerüzhü mu n perhie tuote, n die khakeshüko mu n zhoko therhie tuote.

⁶Hie n kituo siedzekesiko, n sounu hie kediko, hie kedinuoko, mu hie pfutsanuoko, tsiu kijünu themia peteko ki pukeshüko rünyü mvüte.

⁷“Kemiatho sü n kitsa tuo, he-i, Niepuu, derei thengau, thie ketso hie Judamia gei, Jerusalem nu kelhouko gei, mu Israel pete, kepenuo mu kepecie nu ketuoko, kijü nu no uko whuokewa peteko gei thenga tuote, kekreilamonyü uko kejochü di n petsoukewa la.

⁸He-i Jihova, hie kediko, hie kezhako, mu hie pfutsanuoko gei thenga tuote, kekreilamonyü hie n gei phoumawate.

⁹Ngukemezhie mu kejovakelie sü Niepuu hie Kepenuopfü vie zo, hie puo perhie di jowatacü la,

¹⁰mu hie Jihova hie Kepenuopfü puo kituoko gei puo zho khakeshüko zelie mote.

¹¹“Israel pete n pfhe ze mvü di n zhoko varhuo mu n ki nu rüreite. Süla Ukepenuopfü thekeu, Mosa thezho-u nu thupieketuo kesuokerhu mu rüseu hie gei rushüte, kekreilamonyü hie n gei jowate.

¹²Puoe hie mu hie kezhako petsoukeshü puo dieko chü toushüte, hie kepeka sü zhathor zo, süusü Jerusalem petsou di chükeshü mhie teikhro kekrei ra chüshü chie mo.

¹³Mosa zho nu thupie ketuo mhie mha kesuo pete hie gei vorte. Hie Jihova hie Kepenuopfü ki ngukemezhie chalie mo, hie kesuo kechüko nunu rüreilie mo mu n ketho-u leshü mo.

¹⁴Süla Jihova mha kesuo hau meho ba di süu se hie gei vorkeshü tso. Ketho zo, Jihova hie Kepenuopfü mha chükeshü pete mezhü zo; kekreilamonyü hie puo pfhe ze mvüte.

¹⁵“Siro tsie, he-i Jihova hie Kepenuopfü, n dzie kekuo se Ijipt kijü nunu n themiako ze parlie sidi thie ketso n za meyie ba, hie phoumawate, hie kerüzhü mhatho chüwate.

¹⁶He-i Jihova, n kemiatho kize mhachüshücie, n neikemo mu n noupfhüu bu n kemesa nadi Jerusalem, n kemesa kijüthou geinu rüreitacie; kekreilamonyü hie kephoumako mu hie pfutsanuoko kesuo kechüko la, Jerusalem mu n themiako bu hie zanuomiako mhodzünu thenga chüte.

¹⁷Süla tsie, he-i hie Kepenuopfü, n kituou kecha mu puo meheimelokeshü rünyü shücie, mu n thuo n lanu, Niepuu, n zie bu n kemesa chüu ruozhüketau gei zie lashücie.

¹⁸N nyie kedeishücie, he-i a Kepenuopfü sidi rünyüshücie. Mhirho pie hie ruozhüketako mu nadi n za se kebau mehoshücie. Hie hie miatho nunu n ki chaya mo, derei no mia ngumezhie phiyakezha la zo.

¹⁹He-i Niepuu, rünyüshücie, he-i Niepuu, kejo vashücie; he-i Niepuu rünyüshücie di mhachüshücie mu menyhota hieyi! N thuo n za la, he-i a Kepenuopfü, kekreilamonyü n nadi mu n themiako n za se bayakezha la!”

²⁰Siro a mhapu, mu kechachü, tsiu a kephouma mu Israelko kephouma phra, siro a Kepenuopfü kemesa kijüthou-u sounu a nounyüko pie Jihova a Kepenuopfü ki shüketha ki,

²¹sidi a kecha chüketha ki, Gabriel themiau, a hadzü ziemho nunu puo ngukecüu, thevatie ruosuokechü mese ki ta mhai a ki vor.

²²Puo vor di a ki, “Daniel, a tsie vor di mhacamhala sikelie mhasi pie n tsüshütuo.

²³No chakeshü therie nunu die puo par süla süu se n ki pushütuoü di a vorzhie; noe nuokhrietho puocü la. Süla dieu leshü di ziemho cau siliecie:

²⁴“Zhadoudo hiethenieko sü n themia mu n nadi kemesau la thezho khakeshüute: Kesuokechüko bu tseitatuoü, kephoumau bu tseitatuoü, kejokemou chü kemesatuoü, kechachie kemiatho-u se vortuoü, ziemho-u mu siedzekesiu zasi vüwatuoü, mu thechü kemesatho-u kenhelietuoü kecüute.

²⁵Süla tsie sielie di puocapuola silie: Jerusalem chü lalieketuo mu chü piesie lalieketuo pu kepar nhie nu kenhekelie kedinuo puo kevor ketso zhadoudo thenietuo; mu zhadoudo hiesorouekenieko chaüko chü mu thekhe rei thietuo, derei kemezhiekecü tei puotuo.

²⁶Zhadoudo hiesorouekenie sie, kenhekelieu dathewatuo mu mhapuorei ba motatuo, mu vortuoü ketuo kedinuou chüpahikoe nadiu mu kemesa chüu pekawatuo. Siro puo thelau dzüdi puo vortuo, mu terhü chü di puo thela tso tuo. Pekaperuowaketuo zho-u khashüte.

²⁷Puoe zhadoudo puo la mia kekra ze dietseidiekho kemetei puo chütuo, mu zhadoudo tie puo puoe ruosuo kechü khawatuo; mu süko sounu kerütse chü zo di pekaperuowa zoketuo puo vortuo, thezho chükeshü thelau rupie mha bie kepesuou gei shüshü kemochie” sita.