Read Angami Naga Hosea 1 Bible Online

Hosea 1 - Angami Naga bible

Hosea 1

¹Jihova die Uzia, Jotham, Ahaz mu Juda nu Hezekia kedi hako teiki, tsiu Israel kediu Joash nuou Jeroboam teiki Beri nuou Hosea ki vor.

²Jihova Hosea geinu die pukeshü therie nu, Jihova Hosea ki, “Vo di n la thethepfü puo liepie n kimia chülie mu thethe nuonuo nyiliecie, kekreilamonyü Jihova khawa di kijüu thetheliethor bate,” sita.

³Süla puo vo di Gomer Diblaim nuopfü lielie, sidi süpfü nuonipfülie di thepfunuo yopuo penuo puo tsü.

⁴Sitse Jihova puo ki, “Puo za thopie Jezril[1] chülie, kekreilamonyü puotei huoyo sie a Jehu kikru gei Jezril zieu la khepulietuo, sidi Israel kikru kedipie puo thela chüwatuo.

⁵Siro sünhie Jezril razhau nunu a Israel theü bietshewatuo,” sita.

⁶Süsie puo nuonipfü lalie sidi thenumia yopuo penuoshü, sitse Jihova sie puo ki, “Puo za thopie Lo-ruhama[2] chülie, kekreilamonyü a Israel kiu ngumezhie salie lhote morei uko kejo rei vashülie lhote.

⁷Derei a Juda kiu ngumezhieshütuo, mu a uko Kepenuopfü Jihova chü di uko kelashütuo; a theü, morei zhiecha morei terhü, morei gura, morei gurathemia geinu uko kelalie lho” sita.

⁸Süsie puoe Lo-ruhama khowata tse, puo nuonipfü lalie sidi thepfunuomia yopuo penuolie.

⁹Sitse Jihova sie, “Puo za pie Lo-ami[3] chülie, kekreilamonyü noe a themia mo mu a nie Kepenuopfü rei mo,” sita

¹⁰Sirei Israelko phrükesie ki dzükezha nu theshünyo mhietatuo, sidi mejü morei phrü hulie lhotatuo; siro uko ki, “Nieko a themia mo” sikeshüra nu uko ki, “Rheituoyakezha Ukepenuopfü nuonuoko” ilashütuo.

¹¹Judamiako mu Israelko ze vor kengu lalietuo, sidi uko thuo uko la puo tsü pfüketuo puo kedalietuo; sidi uko kijü pevielietuo, kekreilamonyü Jezril teisozhau zha phishü zotie ru.