Read Angami Naga Hosea 11 Bible Online

Hosea 11 - Angami Naga bible

Hosea 11

¹Israel nhicu baluocünu, a puo khrie vor, tsiu Ijipt nunu a nuou kielie.

²A[26] uko kie kra mu uko a[27] kinu pecie miemiete; ukoe ruosuo chüpie Baalko tsüzhü zo, mu mharekethengu thepie terhuorhiko tsü.

³Sirei Efraim pethapie chatuokelieu sü a zo a uko pie a[28] bouka geishülie; derei a uko chü keshürhokeshü ukoe si mo.

⁴A themia ngukemezhie ro-u mu kekhrie pfhe se n ta ze vor zo. Ae uko la mia puoe nuoranuo puo chüpie puo dzo gei shülieyakezhamia mhie zo. A nuketsu di uko vachü.

⁵Uko Ijipt kijü nu la votuo, sidi Asiria bu uko kediu chütuo, ukoe a ki rürei vor mvüketa la.

⁶Zhiechau uko nadiko petsou bate, süue uko zievo mha pushüyakecüko tecülieya, tsiu uko mharhüko la uko mezulieya.

⁷A themiako a kinu rüreitatuoü rhüzhü zo. Ukoe kerükrietho-u kieshü, derei puoe uko phou sesierya mo.

⁸Efraim, kiüdi a n khawatuo mu? He-i Israel, a kimhie di n pie mia tsü ta? A kimhie di n chüpie Adma mhielietuo mu? A kimhie di n gei Zeboim mhieshütuo mu? A nou a kera bate, ngukemezhieu mu kekhrieu a nou zha miemiete.

⁹A nouyieu se lho; a Efraim peka salie lho; kekreilamonyü ae Ukepenuopfü zo mu themia mo zo, Nie donu Kemesau, mu a noupfhü nunu vor lho.

¹⁰Ukoe Jihova siemedzi votuo, Losha tuoi mehoshüyakecüu; puo mehokeshü ki, puo nuonuoko niakratsa nu perüsü vortuo.

¹¹Ukoe Ijipt nunu perako tuoi, mu Asiria kijü nunu mekhru tuoi perüsü zo vortuo; mu a uko bu a kinu volietuo, Jihova siya.

¹²Efraim-e tijü, mu Israel kinumia meda di a houpfülie; derei Juda tsierei Ukepenuopfü ze tuo[29] zo, mu Kemesau geinu dietho ba zo.