Read Angami Naga Hosea 13 Bible Online

Hosea 13 - Angami Naga bible

Hosea 13

¹Efraim diepukeshü ki, sünu perüsata; Puoe Israel nu puo chü kerükrielie; derei puo Baal geinu kephouma chüwa di siata.

²Siro ukoe phouma zhü zo tsiu uko thuo u la miarhi rhilie, uko thuo u kele se rakachü pie terhuorhiko rhilie, süko pete rükreimia mhatho phre zo. Uko sie, “Ruosuo chüpie haki shücie,[31]” iya. Themiako thudonuo mebo!

³Süla ukoe khise gei kimhou morei thezei so mhaitayakezha mhietatuo, shie nunu shübe hepfütayakezha tuoi, morei khirki nu mikhu tuoitatuo.

⁴Sirei a Ijipt kijü nunu zorei n Kepenuopfü Jihova chü vor zo; a kemosie nie la Kepenuopfü kekrei si tuo mo, mu a sie kelakelie kekrei ba mo.

⁵Ae rayha nunu, kijü sotoikecü ra nu n vachü kevor-u.

⁶Ae uko vachükeshü ki, uko u kelhuo chülie; uko u ketshukelhuo chülie, sitse uko nou kemiakota; süla uko a rükra mote.

⁷Süla a uko gei losha tuoitatuo, cha khieki khurhü tuoi a uko rü batatuo.

⁸Thega mia puo nuonuo rügu seketa teiki tuoi a uko gei phirtuo, sidi uko melou kezeu cierhawatuo; sidi sünu nu a losha tuoi uko mezulietuo, nhachü tuoi uko cierhawatuo.

⁹He-i Israel, a n pekawatuo, supuonie n khruohilie ta?[32]

¹⁰N kelashülie kevi kediu tsie kirapuo ba ga? N nadiko nu kezhako sie, “A kediu mu kezhako kha a tsücie” idi pukeshüko kirapuo bata ga?

¹¹A nouyie nunu kedipuo khashü n tsü, mu a noupfhü nunu puo setatuo.

¹²Efraim kejokemouko pha kengu se ba; puo kephouma pie mha bou-u nu pie ba.

¹³Nuonuo vachüu puo gei vor, derei puoe mhasi kemo nuo puo; kekreilamonyü puo teiki puo khapie nuobvü tieu nu nu shülie mokecü la.

¹⁴A Sheol kekuou nunu uko rhalietuo me? Kesia nunu uko rhalietuo me? He-i kesia, n thepetheruoko kira[33] ba ga? He-i Sheol, n kepeka kira[34] ba ga? A mhi kinu ngukemezhieu rüshütakecü la.

¹⁵Puo thuo puo siezedzürieko donu nu kruolie zorei, niathutsa teikhrieu vortuo, Jihova kinu nu teikhrieu, rayha nunu siertuo; sitse puo dzüluokiu sotatuo, puo dzüluo sotatuo. Süu puo kinyibou mhama kere pete bie pesuowatuo

¹⁶Samaria puo kejokemou pfü morosuo, kekreilamonyü puoe puo Kepenuopfü petsouketa la; ukoe zhiecha geinu tetsutatuo, uko nuonuo kecüko vütshie phawatuo, mu u nupfünuo phoupie mo kebako rei rhiephawatuo.