Read Angami Naga Hosea 14 Bible Online

Hosea 14 - Angami Naga bible

Hosea 14

¹He-i Israel, Jihova n Kepenuopfü ki rürei vortacie, kekreilamonyü n kejokemou la no tetsute.

²Dieko selie di no rürei Jihova ki vorlie; sidi puo ki, “Kejokemou pete chü setayi; mha keviu lielie, siro hie hie tie siu[35] pie ruosuo chüshütuo.

³Asiria hie kelalie lho; hie gura gei ba lho; hie rhithoko ki, ‘Hie Ukepenuopfü,’ isi salie lho. N geinu merünuomia ngumezhiekecü siliecie.”

⁴A uko dietho moketau chü kemene lashütuo; a uko khrie tseishütuo, kekreilamonyü a nouyieu uko geinu rüreite.

⁵A Israel gei thezei tuoishütuo; puo terhuobiepou tuoi poulietuo, puoe Lebanon ketsa tuoi[36] puo mie krelietuo

⁶Puo nuotheko pou parlietuo; puo zivi-e Olivbo mhielietuo, tsiu puore kevi-e Lebanon mhielietuo.

⁷Ukoe a khrükhro nu lhoutatuo, uko tezie tuoi kruolietuo; ukoe khubebo tuoi poulietuo, uko re keviue Lebanon khubezu tuoilietuo.

⁸He-i Efraim, a[37] n terhuorhiko se kedipuo chü ta? N pfhekhokeshü tsiu n meho kevor-u sü a zo. Ae saipres kepejo tuoi zo; n kemiatho[38] a geinu vor.

⁹Mhasi u gei kebamia hako silietuo; mhalelieyakezhamia hako silietuo. Jihova chakoe mezhü zocü la, mu kemiathomia süko nu tuoya, derei kejokechümia süko geinu u phi mesülieya.