Read Angami Naga Hosea 2 Bible Online

Hosea 2 - Angami Naga bible

Hosea 2

¹Nieko prüu[4] Ami,[5] mu nie üpfü[6] Ruhama[7] ki pushülie.

²N zuo ze di pushülie, pushülie, kekreilamonyü puo a kimia mo, mu a puo nupfu mo, sidi puo bu puo mhingu kinu thetheliekecü, mu puo nunie donu nu pieü kechü khawalie,

³Kemosie a puo pfhe puonei lhewa di puo bie kemethuo shütuo, sidi puo pie puo penuokelie nhie tuoiwatuo, mu puo pie rayha kemhieshütuo, sidi puo pie kijü sotoikecü nu shüwatuo, mu puo bu terhü di siatatuo.

⁴A puo nuonuoko rei ngumezhieshülie lho, kekreilamonyü ukoe thethenumia nuonuocü la.

⁵Kekreilamonyü uko zuoe thethelie; uko penuokeshüpfüe thenga thoko chü. Kekreilamonyü hapfüe sie, “A a neimia sie whuo votuo; uko a kecüca mu a kekrie, a nhachümiepfhe tsiu a pfhe kevipfü, a tier mu a kekrie a tsüya,” siya.

⁶Süla a zohu pie puo cha khawatuo; mu a puo petsou di sozha puo pfhewatuo, sitse puo puo chako ngulie motatuo.

⁷Süpfüe puo neimia sie whuotuo, derei uko tsolie lho; tsiu puoe süko pfhütuo, derei uko ngulie lho. Sitse süpfü sie, “A tuo la se a nupfu kerieu ki votuo, kekreilamonyü süue tsieki rei vikuo zo” ituo.

⁸Puoe, a thuo lhacülhale, khubezu, mu tier pie puo tsü, tsiu rakachü mu suna pie puo tsü seshü mu ukoe Baal la sekewa silie mo;

⁹Süla a lhacülhale teiki, mu a khubezu teiki süko chüsetatuo; mu a a chümiepfhe, mu a pfhenei kevipfü se puo kemethuo kewhe khakeshüko lie lalietuo.

¹⁰Tsie we a puo neimia mhingu kinu puo kemenga hielashütuo, mu miapuorei a dzie nunu puo kelalie lho.

¹¹Siro ae puo puoneipuonyü chüyakezha pete, puo thenyiko, puo khrüsako, puo sabatko, tsiu thenyi zha pethopie bayakezha pete bu ba sa motatuo.

¹²A puo khubebo tsiu puo chiedebo bu ruotatuo, sidi puoe süu üse, “Hako a zhakhra, a neimia haha khapie a tsüwe” isituo. A süko chüpie ketsa chüwatuo, tsiu nhachükoe süko cütuo.

¹³A Baalko thenyi zhako la puo pechütuo, süusü puoe mharekethengu thepie süko tsü, tsiu puoe dziekha mu cümenyie se puo ketsolie di puo kekhriemia siemedzi tuote, sidi a rükra mote, Jihova siya.

¹⁴Süla, a tsie puo ketsilietuo, sidi puo ze rayha nu votuo, sidi puo ki diepu menuoshütuo.

¹⁵Sidi a sünu nu khubelie pie puo tsütuo, sidi Akhor Razhau chüpie kemerü kenyi kicie puo chüshütuo. Siro thiedzü puo rüü teiki mhie, mu puoe Ijipt kijü nunu kepar teiki mhie, sünu nu mha putuo.

¹⁶Jihova puya, sünhie no a kie di “A nupfu” ituo, tsiu “A Baal”[8] idi a kie sa motatuo.

¹⁷Kekreilamonyü ae Baal za chüwatuo, sidi süko za pu sa motatuo.

¹⁸Teisozha sünhiesü ae lie nu nhachüko, teirako, mu kijü gei guyakezhako ze di n la dietseidiekho puo chütuo; mu a kijüu geinu theü, zhiecha, terhü khawatatuo,[9] sidi nie bu khrukhrekecü nu zhütatuo.

¹⁹Siro a n liepie kechachie la a kimia chülietuo, mu kemiatho tsiu kemezhü nunu, rüdirüli kemo kekhrie, mu ngukemezhie nunu a n liepie a kimia chülietuo.

²⁰Ae kedietho nunu n liepie a kimia chülietuo; mu no Jihova silietuo.

²¹Siro sünhie a n pfhekhoshütuo, Jihova siya, a teiko pfhekhoshütuo mu uko kijü pfhekhoshütuo;

²²Siro kijüu lhacülhale, khubezu, mu tier pfhekhoshütuo, sidi ukoe Jezril[10] pfhekhoshütuo,

²³tsiu a thuo a la puo pie kijü gei prushütuo. Siro a Lo-ruhama[11] mu a Lo-ami[12] ki, “No sü a themia zo” isituo; sitse puo sie, “No a Kepenuopfü zo” isi lashütuo.