Read Angami Naga Joel 1 Bible Online

Joel 1 - Angami Naga bible

Joel 1

¹Jihova die Pethuel nuou Joel ki kevor:

²He-i phichümiako, rünyüshücie, nie nyie kedeishülie, kijü nu kelhou peteko! Mha hau nie teiki, morei nie puonuoko teiki chü üro?

³Nie nuonuoko ki süu pushülie, sidi nie nuonuoko bu uko nuonuoko ki pushülie, tsiu uko nuonuoko bu phou kekreiu ki pushülie.

⁴Kuprie bu cü kepeshako, pekrie kue cüliete. Pekrie kue cü kepeshako, prou ketuo kue cüliete, tsiu prou ketuo kue cü kepeshako, kepeka kue cüliete.

⁵Sieliecie, nie kemezeko, sidi kraliecie; tsiu nie zu kekriemia pete, zu kemou la kra ruorüilie, kekreilamonyü n tie nunu süu dathewate.

⁶Kekreilamonyü seyie puo a kijü re vorte, kuo phi mu phrü hulie kelho chü; uko hue losha hu, mu uko ke-e loshapfü ke zo.

⁷Süue a khube lie pekawa, ukoe a chiedeboko bietshewate; süu uko zhüko lowa di kelhouwate; uko coko krapouite.

⁸Rüü phousepfü puoe gakhropfhe dzie di puo nupfu chütuoü kebau la thekrü kechü tuoiliecie.

⁹Jihova kinu lhacülhale ruosuo mu kekrie ruosuo ba sa mote. Zievoko, Jihova liethoko thekrü chü bate.

¹⁰Lie pekaperuowate, kijüu krazhüte; telhako pekawaketa la, khubezu sote, tier ba mote.

¹¹Nie lieciemiako, thenou kemezhieliecie, nie khubebo beyakezhako, thoulha tsiu barli lhapfü la kraliecie, kekreilamonyü lie nu lhako pekawate.

¹²Khubebo kite, chiedebo rüwite; turaü, kukuobo, tsiu ciephobo, lie nu seibo pete rüwite. Ketho zo, thenou keneiu themiako donu nu rüwite.

¹³Nie zievoko, gakhropfhe dzielie di thekrü chüliecie; nie ruosuobau gei liethomiako, kraliecie. Vorlie, teizeizha pete gakhropfhe nu zhülie, nie a Kepenuopfü liethoko! Lhacülhale mu kekrie ruosuo nie Kepenuopfü ki nu khashü ba mote,

¹⁴Kemevo teiu chü kemesalie, Kehou kemesa puo kieshülie. Phichümiako mu kijü nu lhou keba pete kie kengupie Jihova nie Kepenuopfü ki shülie, sidi Jihova ki shieshüliecie.

¹⁵Hou teisozha sünhie we chülietie! Kekreilamonyü Jihova teisozhau penuo bate, tsiu Kekuotho-u[1] kinu kepekau vorzhie.

¹⁶Hie mhingu kinu kecüca ba mota moü me, kenei mu thenoukemvü hie Kepenuopfü kinu ba mota moü me?

¹⁷Puo shülou-u puo kou nunu suote, mha khapie keba kiko methuote; telha kiko ruote, mha lhoulie moketa la.

¹⁸Kiüdi khunuoko ruorüite shi! Khurinuoko yotuote, uko la nha jüketa la; tekuo kro-u zorei kemezhie bate.

¹⁹He-i Jihova, n ki a melieshüzhie. Kekreilamonyü mi-e rayha nu nhako the pejüwate, tsiu miüe lie nu seiboko pete thewate.

²⁰Siro nhachüko rei ruozhie, kijüu dzü soketa la, tsiu mi-e rayha nu nha kepejo pete thewate.