Read Angami Naga Joel 2 Bible Online

Joel 2 - Angami Naga bible

Joel 2

¹Zion nu ketsüu khoushülie; Kijüthou kemesau gei kemichie vorkezhü pfhe khoushülie! Kijü nu lhouketuo pete bu pekhrukhru batalie, kekreilamonyü Jihova teisozhau vorzhie, süu penuo bate.

²teisozha kezei puo mu thedzükekou teisozha puo, kimhou shübouikecü tsiu zeibouikecü teisozha puo! Teimekiekecü tuoi di kijüthouko zepfülietuo. zha mu kuo phikecü rüpfhünuo vortuo; thiedzü rei uko mhiekecü vor mo, morei hasie rei uko mhiekecü vorlie lho.

³Uko mhodzünu mi-e mha pekatuo, tsiu uko sietsa miü tu ba. Uko mhodzünu kijüue Eden zieu kemhietuo, derei uko sietsa rayha kemethuo zhütuo, mhapuorei uko kinu nu tatalie lho.

⁴Ukoe gura rhi tuoi, mu terhü gura tuoi ukoe tatuo.

⁵Guragari taketuo pfhe tuoi, uko kijüthouko mezü geinu proutuo, mi-e rüguko thekezha pfhe tuoi, rüpfhünuo kuo phicü terhü la dojü sekethamia mhie zo.

⁶Uko mhodzünu themiako kemezhie phi, u zie pete teimekietatuo.

⁷Terhümiavimia tuoi uko tatuo, chüpahimia tuoi uko sozha meli sietuo. Mia puopuokecü u thuo u cha nu votatuo, ukoe uko chako vajolie lho.[2]

⁸Uko miapuorei mia puo khulie lho, mia puopuokecü puo thuo puo chau ze tuo zotuo; uko terhü nyieko pfüthe vo zorei mhapuorei u chakhalie lho.

⁹Uko nadiu gei proushütuo, uko sozhako gei ta votuo; uko kiko nu meli letuo, ukoe kerügumia mhie di khirki nu gou letuo.

¹⁰Uko mhodzünu kiükishütatuo, teiko perüsütatuo. Niaki tsiu khrü rei zeitatuo, tsiu themvü rei zieshü motatuo.

¹¹Jihova puo rüpfhünuoko mhodzünu puo pfhe phrashütuo; puo krodi kide zha shi! Puo diekhakeshü zeyakezhako phrü hulie lho zo. Ketho zo, Jihova teisozhau zha; merie se zo, supuonie süu nu thalie ta?

¹²Sishierei tsie rei Jihova puya, nie nou pete se rürei a ki vorliecie, mevo, kra, mu thekrü chü di,

¹³nie pfhenei mo di nie melou cierhashülie. Jihova nie Kepenuopfü ki rürei vorlie, puoe mia khrie mu mia ngumezhieya, puo nou meyie tho, tsiu puo kekhrie zha zo, siazha khashüketuo nu rei puo nou keditaya.

¹⁴Puo rüreilie tsiu puo nou kedilie mo di, theja pie puo sie tsatie shüwa, lhacülhale ruosuo mu kekrie ruosuo khapie, Jihova n Kepenuopfü tsü rei supuo si ta?

¹⁵Zion nu ketsüu khoushülie; mevo kemesalie; kemesü kehou puo kieshülie;

¹⁶themiako kie kengulie. Kehou kebako chü kemesalie, phichümiako kie kengulie; nhicuko pfhü kengulie, mu nuyakezhako rei. Yasau bu puo kibou nunu tuo pratalie, mu yasau bu rei puo zhü nunu pratalie.

¹⁷Zievoko, Jihova liethoko bu kifükhro mu ruosuobau donu nu kraliecie. Uko bu “N themiako kelashücie, he-i Jihova, mu n kayieko bu mia krenyü, tsiu seyieko donu mia diebo puo chüta hieyi. Kiüdi mia bu themia donu nu sie, ‘Uko Kepenuopfü kirapuo ba ga?’ isitatuomu” sita.

¹⁸Sitse Jihovae puo kijüu la puo ruota, sidi puo themiako ngumezhieta.

¹⁹Jihovae puo themiako diekela di sie: A nieko ki telha, khubedzü, tsiu tier ketseshüzhie, mu nieko kelhuo chülietuo; siro a nieko bu seyieko donu miakrenyü chü salie lhote.

²⁰A pesotsa rüpfhünuo-u chü kedipie nie ze kepeciewatuo, sidi puo whuopie kijükeso tsiu razhüketara shüwatuo, puo mhodzü tsa bu niathutsa dzükezhatsa vota, tsiu puo sietsa bu niakratsa dzükezhau tsa votatuo; puoe cie mena di puore kesuoko mena siertatuo. Puoe mha kezha phi chüshü tou zeru.

²¹Michie hie, he-i kijüu; nie neilie mu nie noumvülie, kekreilamonyü Jihova mha kezha phi chüshüte!

²²Michie hie, nie lie nu khunuoko, kekreilamonyü rayha nu nhako pejozhüte; seibo puo si vüliete, chiedebo tsiu khubebo vüshü bate.

²³He-i Zion nuonuoko, Jihova nie Kepenuopfü nunu nie neilie mu nie noumvülie; kekreilamonyü puoe teirü kerieu puotei tou ki nie la khashüte, puo nie la teirü perü phishüte, teirü kerieu tsiu teirü kenuou hadzü kemhie di khashü.

²⁴Shie nu telha thuo tshupfhütatuo, mhabouko nu tier mu khubezu thuo krurüyo partuo.

²⁵Ae pruoketuo ku kro-u, zopeu, kepekau mu kelu-u bu cülieketako, a rüpfhünuo kekra ketsepie nieko petsoukeshü teicieko souchü lashütuo.

²⁶Nie mha kekra cüükrie di nie kelhuo chülietuo, sidi Jihova nie Kepenuopfü nieko gei mha u ngo chükeshüko tshelietuo. Siro a themiako bu mhakipuorei thenga chü salie lho.

²⁷Nieko a Israelko donu keba, tsiu a Jihova nie Kepenuopfü mu kekrei puorei tuo moücü silietuo. Siro a themiako bu thengachü salie lho.

²⁸Siro kenuotsa a ruopfü rupie chüüphou pete gei shütuo, nie nuo thenu rei thepfu rei siedzekesidie putuo; phichüko u mho pematuo tsiu khriesako ziemho ngutuo.

²⁹Siro süki mia die kechü thenu rei thepfu gei rei a ruopfü rushütuo.

³⁰A teiko gei mu kijü nu zasi chü pekieshütuo, thezie mu mi tsiu mikhu kemeriekecü batatuo.

³¹Niakiu zeitatuo, mu khrü thezie mevitatuo, Jihova teisozha kemeriekecüu kevor mhodzü.

³²Sitse kehoupuorei Jihova za kiekeliemia kelalietuo; kekreilamonyü Jihova pukeshü mhie, Zion kijüthou gei mu Jerusalem nu takelieko tuo, mu rheikelieko donu Jihova thuo kiekelieko tuotuo.