Read Angami Naga Joel 3 Bible Online

Joel 3 - Angami Naga bible

Joel 3

¹Kekreilamonyü, teisozha süko nu mu süteiki, a Juda mu Jerusalem nu kedieko ze la vorkelie ki,

²a seyie pete kie kengulietuo sidi uko ze Jehoshafat razhau nu kerlietuo, sidi sünu nu a uko ze dienya kecütuo uko a themiako mu kayie Israel mhachükeshü medzi di kekreilamonyü ukoe uko bu seyieko donu cüretuoketa la. Ukoe a kijü kezawa.

³Sidi a themiako la dape, mu thethenuko la thepfunuoko se thelhichü, tsiu zu la thenunuoko ze, sidi süue krie meze.

⁴He-i Tur mu Sidon, tsiu Filistia kijü lha nu keba pete, nieko a pie kedipuo chütieya mu? Nieko mhaca huo la a zha chüshüzhie me? Nieko a zha chüpie a tsü liro, a rükri nieko mhatho-u pie nieko tsü gei lashütuo.

⁵Kekreilamonyü nieko a rakachü mu a suna chüliete, mu a kinyi ketapfü nie rüsuokiko[3] nu vote.

⁶Niekoe Judamia mu Jerusalemmia zepie Grikmia ki shüwa, uko kijürie nunu kepetse se nu shüwa.

⁷Derei tsiewe a uko bu nieko u zeshükewa thechüko khawa di tuotaketuo la uko phousesieshütuo, mu a nieko mhathoko chüpie nie tsü gei lashütuo.

⁸A nie nuonuo thenu rei thepfu rei zepie Judako dzie nu shüwatuo, mu ukoe uko zepie Sabianmia, kepetse phi nu ketuo seyiemia tsüwatuo, kekreilamonyü Jihova pushüwatacü la.

⁹Seyieko donu hau pushülie: Terhü[4]la dojülie, terhümiaviko pfü kehüshülie. Rüpfhünuo pete bu penuo vorlie, uko bu khorlie.

¹⁰Nie liecie jü ketsapie zhiecha chülie, mu nie charuo ketsapie rüngou chüliecie; kethachümia bu, “A terhümiavimia” iliecie.

¹¹Mhai vorliecie, nie seyie lukihaki ketuo pete, nie thuo vo sünu kenguliecie. He-i Jihova, n terhümiaviko ze kerliecie.

¹²Seyieko u thuo u hü sesierlie, sidi Jehoshafat razhau nu vorlie; sünu a balie di siezanuomia seyie pete dienya kecütuo.

¹³Nie Ziepfhinuo chüpielie, kekreilamonyü lie mezhüte. Tuo lelie, kedeshülie, kekreilamonyü khubezu kethebou tshu bate. Zutseko tshuzie bate, kekreilamonyü uko rügerüzhükecü zhathorte.

¹⁴Themia krodi, themia krodi, pepiketuo razhau nu bate! Kekreilamonyü pepikecü razhau nu Jihova teisozhau penuo baketa la.

¹⁵Niakiu mu khrüu zeite, tsiu themvüko rei zieshü mote.

¹⁶Jihova Zion geinu shiekhouizhie, tsiu Jerusalem nunu puo pfhe phrashüzhie, siro teiko mu kijüu rünie khrukhru bate. Derei Jihovae puo themiako keyau, Israel la dahou kemeteiu.

¹⁷Sidi niekoe a, Jihova nie Kepenuopfü, Zion gei kebau, a kemesa kijüthou gei kebau silietuo. Siro Jerusalem mesatatuo, mu chazoumia puorei süu pfüthe sa volie lho.

¹⁸Sünhie kijüthoukoe, khubezu kesa pekrushütuo, kijüthouko mithunudzü pekrushütuo, mu Juda rücüko pete dzü kruzhütatuo; Jihova kiu nunu dzüluo puo kru partuo. sidi dzüpie Shitim Razhau petseshütuo.

¹⁹Ijipt methuotatuo mu Edom-e rayha kemethuo puo chütatuo, uko Juda themiako gei mha kesuo chükeshü la, uko kijü nunu u kejo kejümia zie pekrukecü la.

²⁰Derei Juda we kechachie lhou batatuo; mu Jerusalem-e thephou pete ba votatuo.

²¹A uko zie khepulietuo, mu a uko kejokemouko[5] chü kemesalie lho, Jihova Zion gei bakecü la.