Read Angami Naga Amos 1 Bible Online

Amos 1 - Angami Naga bible

Amos 1

¹Amos, Tekoa nu kuopfheko donu mia puo dieko, puoe Juda kediu Uzia teiki mu Israelmia Joash nuou Jeroboam kediu teiki, kiükishü kevor mhodzü teicie kenie teiki Israel dze ngukecüko.

²Sitse puo sie: Jihova Zion geinu shiekhoui bate, tsiu Jerusalem nunu puo pfhe phrashü bate; kuopfhemia thutuo nhako rüwita, mu Karmel mezüu sote.

³Jihova hakemhie puya: Damaska kejokemou se la, tsiu dia la, a siazhau khakeshü rhüwalie lho;[1] kekreilamonyü ukoe martul kezhau pie Gilid kerhewate.

⁴Süla a mi ketsepie Hazael kiu gei shütuo, sidi süue Ben-hadad kudako mezulietuo.

⁵A Damaska kharu seiko bietshewatuo, tsiu Aven Razhau nunu themia dathewatuo, tsiu Beth-eden nu kedi the se kebau dathewatuo; mu Aram themiako mia die chü Kir nu votatuo, Jihovae puya.

⁶Jihova hakemhie puya: Gaza kejokemou se la, tsiu dia la, a siazhako rhüwalie lho;[2] kekreilamonyü ukoe themia seyie pete teze kedie chü vote, süko pie Edom tsüwatuoü di.

⁷Süla a mi ketsepie Gaza tsiepfhe gei shütuo, sidi puo kuda kemeteiko thewatuo.

⁸A Ashdod nu kelhouko duthewatuo, tsiu Ashkelon nunu kedi the se kebau duthewatuo; a a dzie yhapie Ekron petsoutuo, tsiu Filistinmia lhiepie kebako katatuo, Jihova Ukepenuopfü puya.

⁹Jihova hakemhie puya: Tur kejokemou se la, tsiu dia la, a siazhako[3] rhüwalie lho; Kekreilamonyü ukoe themia seyie pete pie Edom tsüwa, sidi siezedzürie kechü zho-u rükra mote.

¹⁰Süla a mi ketsepie Tur sozha gei shütuo, sidi puo kuda thewatuo.

¹¹Jihova hakemhie puya: Edom kejokemou se la, tsiu dia la, a siazhako rhüwalie lho;[4] kekreilamonyü puo zhiecha se puo siezeu whuo mu ngukemezhie va lotsote;[5] puoe puo nouyieu se seituoketa la, tsiu kechachie puo noupfhüu bu bate;

¹²Süla a mi ketsepie Taman gei shütuo, sidi süu Bozra kuda pete thewatuo.

¹³Jihova hakemhie puya: Ammonmia kejokemou se la, tsiu dia la, a siazhako rhüwalie lho;[6] kekreilamonyü ukoe u rieko bie kemeyatuoü di Gilid nu thenupfümia phoupie mo ketuo va rhiephawa.

¹⁴Süla a Raba dahou petsou di mi petushütuo, mi süu puo kuda thewatuo, terhü kechü ki shieshüyakecü tuoi, khriewhi rükhrie kevor nhie tuoishütuo;

¹⁵Sitse uko kediu mia die chü votatuo, puo mu puo khro kezhako rei sa di, Jihova siya.