Read Angami Naga Amos 2 Bible Online

Amos 2 - Angami Naga bible

Amos 2

¹Jihova hakemhie puya: Moab kejokemou se la tsiu dia la, a siazha kha shüko rhüwalie lho;[7] kekreilamonyü puoe Edom kediu ruko thepie mige chükewa la.

²Süla a mi ketsepie Moab gei shütuo, mu süu Kerioth kuda thewatuo, tsiu Moab-e ruorüi, shiekhoui mu ketsü kekhou pfhe donu nu siatatuo;

³a uko donu kezhako dathewatuo, tsiu puo sa di puo kezhako pete dukhriwatuo, Jihova siya.

⁴Jihova hakemhie puya: Juda kejokemou se la, tsiu dia la, a siazhako rhüwalie lho;[8] kekreilamonyü uko Jihova zho-u khawa, mu puo kepetha dieko se balie mote, derei uko puonuoko kevo chau medzi di kemedau thuo uko chatha kekrüwate.

⁵Süla a mi ketsepie Juda gei shütuo, mu süu Jerusalem kuda thewatuo.

⁶Jihova hakemhie puya: Israel kejokemou se la, tsiu dia la, a siazhako rhüwalie lho;[9] kekreilamonyü ukoe rakachü la kemiatho zewa, tsiu phikou puo la ketsopfhümia zewa.

⁷Ukoe kejümia tsü kedepie nyophe nu shüshü; tsiu kemezhie ketuomia nepie chakhie shüwa; puo puo mu puo nuo keze miapfü puo ze, sidi a za kemesau bie perhuwa;

⁸Ukoe pie mese di priesa thepukelie pfheko pie u zhükhra di ruosuoba khieki zhüya; sidi ukoe Ukepenuopfü kinu nu mia kemvü chü di piekelie thepha ma se khrükelie zu krie.

⁹Sishierei a uko mhodzünu nu Amormia pekawa, rükriepie sedar tuoi zorei, tsiu sükoe phriebo tuoi metei; a pesogei keba puosiu, mu kijü khro puo mieko pekawa.

¹⁰Siro a Ijipt nunu n ze par, Amormia kijü welietuoü di cie hiedia rayha nunu a n cha tha.

¹¹Siro a n nuonuo huo bu sier di siedzekesimia chü, tsiu n khriesa huo bu Nazirmia[10] chüshü. Süu chü kethoshü mo me? He-i Israelmiako. Jihova siya.

¹²Derei nie Nazirko[11] bu zu krie, tsiu siedzekesiko ki pu di, “Nie siedzekesidie pu hie” ita.

¹³Süla a gari puoe telha puopie tshu di puo kradapfü ketuo tuoi, nieko chü nunu nie kradashütuo.

¹⁴Kemephrümia geinu talie kevi ba motatuo, tsiu kekuomia u kekuo ba sa motatuo, morei kekuomia u kerheiro kelalie lho;

¹⁵theü seketuomia thalie motatuo, siro tuo kevimia u thuo u kelalie lho, morei gura seketuomia rei u thuo u kelalie lho;

¹⁶tsiu sünhie kekuomia donu kethepfumia zorei methuo di tatatuo, Jihova siya.