Read Angami Naga Amos 3 Bible Online

Amos 3 - Angami Naga bible

Amos 3

¹He-i Israelko, Jihovae Ijipt nunu nie kikru ze parkeshü peteu petsou di pukeshü die hau rünyüshücie:

²Kijü nu seyie pedekejüko donu ae n rübei sikecü zo; süla nie kejokemou pete la a siazha khapie nie tsütuo.

³Mia kenie-e keseketuo tei chieshü mo di keze tuolie vi me?

⁴Loshae ketsa nu puo chüteu ba mo ro mehoshütuo me? Losha nuonuo puo bou nu mhapuorei ngulie mo ro mehoshütuo me?

⁵Kijü gei kebie puorei pethoupiezhü mo ro, pera ta kebieu nu letuo me? Kebieu nu mhapuorei ma mo di kijü nunu rüka siertaya me?

⁶Nadi nu ketsü khoushü ro, themiako michie bata motuo me? Jihova thuo chüshü mo di kepeka nadiu nu vorlietuo me?

⁷Niepu-u Ukepenuopfü puo pekhreko pie, puo kituo siedzekesiko pesishü mo di, mhapuorei chüshü mo zo.

⁸Loshau mehoshüte; supuonie michie mo tuo ga? Niepu-u Ukepenuopfü pushüte; supuonie siedzekesi pu mo di balie ta?

⁹Ashdod nu kudako ki, tsiu Ijipt kijü kudako ki pushücie, sidi sie, “Samaria nu Kijüthou-u gei nie thuo vo kenguliecie,[12] sidi sünu kebou pezhapie kide chüzhü shi, tsiu kidepuo mia pesekecü u donu ba shi mehoshücie” si.

¹⁰Mha kemezhüu chüketuo si kemoko, Jihova siya, sükoe mia kemvü chükecü mu mia kede di rügukelieko pie uko kuda nu kengupie ba.

¹¹Süla Niepu-u Ukepenuopfü hakemhie puya: Ngumvümiae kijüu houpfülietatuo, sidi n keyau bierhuowatuo, tsiu u kuda vawatuo.

¹²Jihova hakemhie puya: Kuopfheue loshau me nunu puo phi kenie, morei puo nyieto kelakelie mhiei, sütuoi Samaria nu kelhou Israelmiako u yakouke mu u zhü nu keba huo sa kelalietuo.

¹³Rünyüliecie, sidi Jakob kiu petsoukecü pushücie, Niepu-u Ukepenuopfü, krodiko Kepenuopfü siya.

¹⁴Sünhiesü a Israel kejokemou la puo siazha khashütuo, a Bethel ruosuobako pechütuo, tsiu ruosuoba kiako dathewatuo, sidi süko te kijü tsutatuo.

¹⁵A teisei kiu tsiu teile kiu rei bierhuowatuo; mu tsohu pie kechü kiko katatuo, mu ki kezhako[13] puo thela chütatuo, Jihova siya.