Read Angami Naga Amos 4 Bible Online

Amos 4 - Angami Naga bible

Amos 4

¹Die hau rünyüliecie, nie Bashan nu thukrüko, Samaria kijüthou gei kebako, mhakejümia pese, ketsopfhümia bie pesuokezhako, uko nupfunuoko ki, “Krieketuo la mha huo se vorlie!” iyakezhako.

²Niepu-u Ukepenuopfü puo kemesa nunu rüseshüte: Puotei puo nieko ki vor touzhie, süki uko khuoshüwi pie nieko teshülietuo, nie donu thelatho-u zorei khuoshüwi pie teshülietuo.

³Sozha kecieko nunu nieko tatuo, mia puopuokecü mhodzü tou nunu, sidi nieko kelhoupie Harmon nu shüwatuo, Jihova siya.

⁴Bethel nu vorlie, sidi kejokemou chülie; Gilgal nu vorlie, sidi kejokemou chü pekralie; teisoduü nie ruosuoko se vorlie, zha se metsei nie ker za puou se vorlie;

⁵Khrei sakecü niekhrüda se kethezie ruosuo khashülie; sidi u kenei nu khakeshü ruosuoko khashü nu pushülie, süko pu pesishülie; kekreilamonyü nie sikecüko chükecü nie neiyacü la, he-i Israelmiako! Niepu-u Ukepenuopfü siya.

⁶A nie nadi pete nu thehu kemesau kha nie tsü, tsiu thechü pete nu niekhrüda tsopfhükecüu khashü nie tsü, sirei nie a ki rürei vorlie mo, Jihova siya.

⁷Siro a lieyie tei vorketuo thekhrü se baluokecü nu nieko kinu teirüu khawa; a nadi puo nu teiperüshü, mu nadi kekrei puo nu teiperüshü mota; lie puo nu teirüshü, tsiu teirüshü moketa lieu rüwita.

⁸Süla rüna kenie kese-e dzükrietuoü di rühou rüna kekrei puo nu vo; derei u kelhuo ngulie mo; sirei nieko rürei a ki vorlie mote, Jihova siya.

⁹Ae thege tsiu thezei pekrüpie nieko va; a nieko zie mu khubelie bu methuota; kuprie bu nie chiedebo mu nie Oliv boko pekawa; sirei nie rürei a ki vorlie mo, Jihova siya.

¹⁰Ae Ijipt nu rhiu tuoi thepe ketsepie nieko donu shü; a zhiecha pie nie khriesako dukhriwa; a nie gurako[14] tezeta; sidi a nie razhüchü cieürieketa reu bu nie nyhüki nu si voshü; sirei nie rürei a ki vorlie mo, Jihova siya.

¹¹A nieko mia huo pekawa, Ukepenuopfüe Sodom mu Gomora pekakewa tuoi, mu niekoe miü nunu mezakelie mhie zo; sirei nieko rürei a ki vorlie mo, Jihova siya.

¹²Süla ae hakemhie chüpie n gei shütuo, he-i Israel; kekreilamonyü a hau n gei chütuoü batacü la, n Kepenuopfü ze keseketuo dojüliecie, he-i Israel!

¹³Kekreilamonyü harie, kijüthouko chükeshüu, teikhrie chükeshüu, puo keleko pie themiako pesikeshüu, khise chü pezeikewau, tsiu thechü kerükrieko gei tuotuoyakezhau, süu Jihova, krodiko Kepenuopfü sü puo zawe!