Read Angami Naga Amos 5 Bible Online

Amos 5 - Angami Naga bible

Amos 5

¹A nie la thekrü chü di pukeshü die hau rünyüliecie; he-i Israel kinuko:

²Tetsute, lasielie lhote, rüüpfü Israel; puo kijü nunu puo rükra mote, miapuorei puo phoupie sieshüketuo ba mo.

³Kekreilamonyü Niepu-u Ukepenuopfü hakemhie puya: Mia nyie puo keze tuo praketa nadiu mia krie puo peshashütuo, mu mia krie puo tuopraketau nu mia ker peshashütuo.[15]

⁴Kekreilamonyü Jihovae Israel kinuko ki hakemhie puya: A pfhülie di rheiliecie;

⁵derei Bethel we pfhü hie, tsiu Gilgal nu le hie, morei Beer-sheba pfüthe vo hie; Gilgal-e mia die chü vo toutuo, mu Bethel-e kemethuo chütatuo.

⁶Jihova pfhülie di rheiliecie, moro puo Josef kinuko petsou di mi kemhie pratuo, sidi süu Bethel thewatuo, miapuorei süu tshülie lho.

⁷He-i, nieko kethoca pie ciena chükewako, sidi kemiatho pie kijü shükewako!

⁸Orion themvüko tsiu zuthie kroko chükeshüu, mu zeibouikecü pie khise chükeshüu, siro teiso chüpie teizei chükewau, dzükezha la dzüko kiekeshüu, sidi süko rupie kijü zie gei shükeshüu, puo za sü Jihova zo,

⁹Kekuomia petsou di kepeka ketseshüyakezhau, kepeka bu dahouko gei voryakezhau.

¹⁰Ukoe kharu ki nu mia kerhieshüyakezhau ngumecüya, tsiu ukoe dietho kepu-u rütseya.

¹¹Süla nieko mhakejümia kede mu uko ki nu thoulha khrolie, niekoe ketsie phropie ki chülie, derei nieko süko nu lhou lho; nieko khubebo u keneiko leishü, derei nieko khubezu krielie lho.

¹²Kekreilamonyü a nie kejokemou kide ba shi, tsiu nie kephouma kidezha shi si ba, nieko kemiathomia pechü, mu thesolie, sidi ketsopfhümia khupie kharu khie shüwaya.

¹³Süla kemenuomia süteiki kemekrie batatuo; puotei süki vi mokecü la.

¹⁴Mha kesuou mo di keviu pfhüliecie, sitse nieko rheilietuo; sitse Jihova, krodiko Kepenuopfü nieko ze balietuo, nieko pukeshü tuoi di.

¹⁵Mha kesuou ngumecülie mu mha keviu khrielie, mu kharu nu kethocau chüshülie; siliro, Jihova, krodiko Kepenuopfü, Josef peshapie kebako ngumezhieshü rei silie lho mu.

¹⁶Süla Jihova, Krodiko Kepenuopfü, Niepu-u hakemhie puya: Zieke pete nu thekrü chü di kra batatuo; mu cha pete nu ukoe, “Ayah! Ayah!” ibatatuo. Ukoe thekrü chüketuo la lieciemia kietuo, tsiu thekrü chükesimia bu krashü nu kietuo;

¹⁷khubelie pete nu mia kra batatuo, kekreilamonyü a nieko donu pfüthe votuoüzhie, Jihova siya.

¹⁸Jihova teisozhau mengu kebamia we ce chülietie! Kiüdi nieko Jihova teisozhau menguya ga? Süu zeiboui zo, kezie tuo mo;

¹⁹Mia puoe losha mhodzünu talietuo, sidi thega puo sekelie tuoi; morei ki puo nu le sidi puo dzie pie sozhau vakhrieshü ru, tinyhü puo medukewa tuoi zotuo.

²⁰Jihova teisozhau zie mo di zeiboui, kezie mo, di thedzükezei puo mo me?

²¹Ngumecülie, a nie thenyiko rütseya, mu nie kenanyü di kehoukengucüko a nei mote.

²²Nie thuo kethe tsiu lhacülhale ruosuoko pie a tsü zorei, a süko lielie lho; mu khunuo puo phou keviko pie kezekevi ruosuo chüshü zorei, a süko meholie lho.

²³A kinu nie ütsali pfheko chüsetalie; a nie übou pfhe keziviko rünyü lho.

²⁴Derei kethocau bu dzü tuoi rülou tsulie, tsiu kemiatho bu dzükru seikezhü kerü mhieiliecie.

²⁵He-i Israel kinuko, nie rayha nu teicie hiedia ketuo ki ruosuoko tsiu mhakha pie a tsü me?

²⁶Nieko Sakut pie nie kediu chü, mu Kaiwan pie nie rhuo themvüu chü nie terhuorhiko,[16] nie thuo nie la chükelieko setuo zotuo.

²⁷Süla a nieko bu mia die chü di nie ze Damaska tse vowatuo, Jihova, puo zae Krodiko Kepenuopfü zokecüu siya.