Read Angami Naga Amos 8 Bible Online

Amos 8 - Angami Naga bible

Amos 8

¹Niepu-u Kepenuopfüe mha hau se a pekieshü: teile ki nhasi[21] rha puo.

²Puo sie, “Amos, no kedipuo ngu ga?” isi. Sitse a sie, “Teile ki nhasi rha puo” ishü. Sitse Jihova a ki, “A themia Israel thelau vorte; a mhakipuorei uko pfüthe vo salie lhote.

³Teisozha sünhie rüsuoki[22] nu tsaliko kekra pfhe chütatuo” si. Jihova Ukepenuopfü puya; “Kesia mo kra phitatuo, süko kelhoupie thechü pete nu shütatuo. Kemekrie batalie!”

⁴Hau rünyüshücie, ketsopfhü kedewayakezhako, kijü nu kejüko pekawa,

⁵hai di sie, “Kikecü ki puo thekhrü kesau tseitatie shi, sidi hie bu telha ze lalie; tsiu sabat tseita di, u bu thoulha zelietuo shi. Hie efa chü pecülietuo tsiu shekel chü pezhalietuo, mu kemeda roshükhou-u se mia kedotuo,

⁶sidi rakachü la kejümia khrülie, tsiu phikou dziese pie ketsopfhüko khrülietuo, tsiu thoulha tshokelieko zetuo” iya.

⁷Jihovae Jakob kemiakokecü geinu rüseshü: Ketho zo a mhakipuorei uko mhathoko rükra motalie lho.

⁸Mhatho hako la kijüu pe, tsiu sünu keba pete thekrü chü bata moü me? Siro süu pete Nail tuoi siertuo, mu Ijipt nu Nail tuoi sier rüle lata.

⁹Sünhie, Niepu-u Ukepenuopfü puya, ae niakiu bu khinhieluo ki letatuo, tsiu a tei zie mecümecie baluokecü nu kijüu bu zeitatuo.

¹⁰A nie thehethehie kechüko pie kekra chüwatuo, tsiu nie tsali peteko pie thekrü chüwatuo; a nie chiecha pete nu gakhropfhe pedzieshütuo, tsiu nie tsü pete bu pietatuo; a süu chüpie mia puo puo nuopfuliu la krakecü tuoi shütuo, tsiu puo thelau bu pfhümezhakecü teisozha puo chüwatuo.

¹¹Teisozhau vor zotuo, Niepu-u Ukepenuopfü puya, süki a pekriekecü ketsepie kijüu gei shüshütuo; kecükekrie la pekriekecüu mo, morei dzü la terhükecü mo, derei Jihova dieko rünyüketuo lanu.

¹²Ukoe dzükezha nunu rühou dzükezha nu votuo, tsiu pesotsa nu niathutsa votuo; ukoe Jihova die pfhü di ta lukihaki votuo, derei ukoe süu ngulie lho.

¹³Teisozha sünhie rüü keziviko mu khriesako terhü di phisiatatuo.

¹⁴Samariamia Ashima za se rüse, di sie, “Nie rhuou rheiketuo mhie, he-i Dan” mu “Beer-sheba chau rheiketuo mhie” isiyakezhako, süko tetsutatuo, mhakipuorei la sier motatuo.