Read Angami Naga Amos 9 Bible Online

Amos 9 - Angami Naga bible

Amos 9

¹Ae Jihova ruosuobau khieki thakecü ngu, tsiu puoe pukecü: Coko rünieta kemochie, puo tsügei kepfhü ba zolie; mu themia pete[23] tsü geinu süko vütshieshülie; sitse keshako a zhiecha pie dukhriwatuo; uko miapuorei talie kenjü, uko miapuorei rüdalie lho.

²Ukoe kheho ho se Sheol nu tsu zorei, sünu nu rei a dzie pie uko teshülietuo; uko thuo teigei sieta zorei, sünunu a uko se kertuo.

³Uko thuo Karmel mezü geinu rüshüta zorei, sünu a uko pfhü vo di uko telietuo; siro uko a mhodzünu nu vo dzükezha thotsü nu rüshü bata zo rei, sünu nu a dzünyhüu ki pushü di puo bu uko medutuo.

⁴Siro uko ngumvümia mhodzünu mia die chü vota zorei, sünu zorei a zhiecha ki pushü di puo bu uko dukhrituo; siro a mhi pie uko geikeshüu kevitsa nu mo di kesuotsa nutuo.

⁵Niepu-u, krodiko Kepenuopfü, kijüu bieshü mu süu zhata, mu sünu keba pete krata, mu sünu keba pete Nail dzü mhiei sietuo, tsiu Ijipt nu Nail dzü kemhie rükre la tsutatuo;

⁶teiko geinu puo kibou pesoko chülieya, siro kijüu geinu puo bouko chülieya; puoe dzükezha dzüko kieshüya, tsiu süko perüpie kijü zie gei shüshüya. Süu za Jihova.

⁷Niekoe a mhodzü ki Ethiopiamia[24] kemhie moü me? He-i Israelmiako, Jihova siya. A Ijipt kijü nunu Israel, tsiu Kaftor nunu Filistinko mu Kir nunu Arammiako ze parshü moü me?

⁸Niepuu Ukepenuopfü mhi-e kephouma tshukepfü kediu mhogei bate, mu a kijü zie geinu süu pekawatuo, sirei a Jakob kinuko we peka lotsowalie lho, Jihova siya.

⁹Kekreilamonyü harie, a diekhashütuo, sidi seyie pete donu nu, thouzo nu thou rüzokeshü tuoi Israel kinuko shükenieshütuo, derei tsiesenuo puorei kijü gei tetsuta lho.

¹⁰“A themia kesuou u penyülie lho, morei u ze kese lho” idi puyakezha kephoumamiako pete zhiecha geinu siatatuo.

¹¹Sünhie a David pru tsozhüketau touse sieshütuo, tsiu puo kepako mekawatuo, mu ruoketako phou lashütuo, sidi kerieki kemhie chü lashütuo;

¹²Uko bu Edom peshapie kebako pevie lalie, mu seyie a za kiekelie pete kela lalieketuo la, Jihova mha hau chükeshüu thuo puya.

¹³Puoteiu vor touzhie, Jihova siya, süki liephie keshümia liekeremia mhodzütatuo, tsiu khubezu theyakezhamia tsia kevamia mhodzütatuo; kijüthouko geinu khubezu moukezecü po tsurtuo, tsiu süu kru kijütsei pete tshutuo.

¹⁴A a themia Israel ruo chü pevi lashütuo, ukoe pekakewa nadiko chü lalietuo sidi süko nu lhoutatuo; uko khubebo pelhoutuo tsiu süko zu krietuo, tsiu uko tezie chütuo mu puosi rie cütuo.

¹⁵A uko pie uko kijü gei leishütuo, mu a kijü khapie uko ketsüu geinu mhakipuorei uko ciethese lata lho, Niepu-u Ukepenuopfü siya.