Read Angami Naga Obadia 1 Bible Online

Obadia 1 - Angami Naga bible

Obadia 1

¹Obadia ziemho. Niepuu Ukepenuopfü Edom dze hakemhie puya: Hie Jihova ki nu dielie puo siliete, mu seyieko ki dieliemia puo ketseshüte; “Sieliecie! Úko sie terhü chü süu petsou khe!”

²A nieko pie seyieko donu kecütho-u chüwatuo; mia nie ngumecü phi zotuo.

³N nou kemiakokecüu thuo n sewate, nie tsiekrie[1] gei lhou kebako, puo chü rükriekecü nu kebako. Noe n melou nunu, “Supuonie a pie ker kijü shülie ta?” ibaya.

⁴N thuo tsüüra tuoi thu rükrie khota zorei, n kru chüpie themvü donu ba zorei, sünu nu a n teshü kerwatuo, Jihova siya.

⁵Kerügumia n ki vor ro, kepekamia theva vor ro, kimhie di n pekawa shi! uko lie kenyüko rübei rügu lho me? Khubesi pfhü kenguyakezhamia n ki vor üro, uko huoyo peshashü lho me?

⁶Kimhie di Esau vie vawa, mu puo kinyiko pfhüwate shi?

⁷N ze kerekesieko pete n sewate, uko n whuopie therie nu shüwate; n ze kerekesieko n petsou di kuolietuo; n niekhrüda cükelieko n la kebie pethoupie bate, süu ca silie ketuo ba mo.

⁸Jihovae puya, sünhiesü, a Edom nu mhakesimiako, mu Esau kijüthou gei kesikele pekawatuo.

⁹N terhümiaviko u ziekejü chütatuo, he-i Teman, sidi Esau kijüthou gei mia pete dawatuo.

¹⁰Noe n siezeu Jakob dukhri, mu kemvü chükecüko thenga thuo n zepfülietuo, tsiu kechachie la n kelhiwatuo.

¹¹No rürei thaketa nhie, sikemomia puo kinyi chü seketa nhie, tsiu chazoumia puo kharu nu le, Jerusalem se dape kechü nhie, sünhie no rei uko mhiete.

¹²Derei n siezeu puo ruosuokelie nhie n mepfhü rha puo kie mo tse vituo ru; Juda themiako kaketa nhie; no n neikecü mese mo; uko nou kesuo nhie no kemelhakecü mese mo.

¹³Noe a themia kakezhü nhie puo kharu nu le zhü mo; nie Juda kakezhü nhie vo puo keka kre kebako ze puo kre zhü mo; puo kakezhü nhie puo nyaürako rügu zhü mo.

¹⁴Puo themia takelieko biewatuoü di no chatietshü nu tha zhü mo; kemezhie keba nhie puo themia pesha kebako tepie mia tsüwa zhü mo.

¹⁵Kekreilamonyü seyie pete petsoutuoükecü Jihova teisozhau penuo bate. No chükeshü tuoikecü chüpie n gei lashütuo; n mhathoko n tsü gei la vortuo.

¹⁶Kekreilamonyü no a kemesa kijüthou geinu kriekelie tuoi, seyie nie khie nie mhou keba pete rei krietuo; uko krielie mu mezulietuo, sidi uko mhakipuorei sümhieya kemo mhietatuo.

¹⁷Derei takelieko Zion kijüthou gei batatuo, tsiu süu mesatatuo; sidi Jakob kiue mia uko vie peviekelieko we lalietuo.

¹⁸Jakob kiu mi tuoitatuo, Josef kiu miü mhietatuo, tsiu Isau kiu mha do chütatuo; ukoe seko thewatuo, sidi süko the pejüwatuo, sidi Esau kiu nu lhiekelie puorei balie lho; kekreilamonyü Jihova pushüwate.

¹⁹Negeb nukoe Esau kijüthou pevielietuo, mu Shefela nukoe Filistinko kijü pevielietuo; ukoe Efraim mu Samaria kijü pevielietuo, mu Benjamin-e Gilid pevielietuo.

²⁰Israel Hala[2]nu mia die chü ketuoko Foinisia nunu vo Zarefath ketso pevielietuo, tsiu Sefarad nu Jerusalem numia mia die chü kevoko Negeb rünako pevielietuo.

²¹Kelalieketako[3] Zion kijüthou gei kho di; Esau kijüthouko mho kekhatatuo; sidi kedirüvieu Jihova vie chütatuo.