Read Angami Naga Jona 1 Bible Online

Jona 1 - Angami Naga bible

Jona 1

¹Siro Jihova die Amitai nuou Jona ki vor di sie,

²“Ninevi rüna kezhau nu vo mhailiecie, sidi süu petsoukecü shieshülie, kekreilamonyü uko kerüzhü a mhodzünu khor bate” si.

³Derei Jona Jihova mhodzünu nu ta rüshü Tarshish nu votatuoüsie. Sidi puo Jopa nu kelie tse rou puo Tarshish nu votuoü ketha ngulie; süla puo rou zha chüwa mu Jihova mhodzünu nu tatatuoü di mia ze Tarshish nu voketuo la sügei pfülie.

⁴Derei Jihovae khriedi puo kegepie dzükezha mho shüshü, sidi dzükezha nu tei rükrierükhrie pie kemerie chü rou-u bietshawa thenyüsie zota.

⁵Sitse rou kethumiako michieta, sidi u thuo u rhuou kie phreta. Siro rouu bie kemedzalieketuo la uko mhanyako kelhoupie dzükezha nu shüwa, sirei Jona we rou-u nu lelie, sidi zetshüi zhüta.

⁶Sitse rou nu kezhau puo ki vor di sie, “No kiüdi ze tshüizhü ga? Sielie di n Kepenuopfü kieliecie! Siliro Ukepenuopfü u dze rükrashü di u bu kata molietuo nhie” sita.

⁷Siro roukethuko sie huoniehuo üse, “Vorlie, úko dape khe, sitse supuo la mha kesuo hau u gei vorte shi silietuo” sita. Süla uko dape chü sitse Jona zanu parta.

⁸Sitse uko puo ki “Kiüdi mha kesuo hau u gei vorte shi hie ki pushücie. No mhatho kikecüpuo chüya ga? No kirapuonu vorzhü ga? N seyie kikecü puo ga? Siro no kiramia ga?” sishü.

⁹Sitse puo sie, “A Ibrimia puo, A Jihova, teigei ketuo Ukepenuopfü dzükezha mu kijü keso chükeshüu rüsuoya” sishü.

¹⁰Sitse themiako michie kechüta, di sie puo ki, “No chüwaketa hau kedipuota ga?” sita. Kekreilamonyü themiakoe puo pukeshü mhie di puoe Ukepenuopfü mhodzünu nu tatakezhü silieketa la.

¹¹Sitse uko puo ki, “Dzükezhau bu hie gei menelieketuo la hieko bu n pie kedipuo chüwatuo ga?” sishü, kekreilamonyü dzükezhau rüpfhü kemerie chü miemieketa la.

¹²Sitse puo uko ki, “A chü kelhoupie dzükezha nu shüwacie, sitse dzükezhau nieko la zeitatuo, tei rükrierükhriekecü hau a la nieko gei vortacü la” sita.

¹³Sishierei themiako süu bu kijü keso nu vorlietuoü rou thu thethochü, derei uko chülie lhota, kekreilamonyü dzükezhau rüpfhü uko gei re miemieta.

¹⁴Sitse uko Jihova ki shie di, “He-i Jihova, hie n ki chaya, hie ngumezhie di themia hau la hieko bu kaüjüta hiecie, siro kejokejü thezieu pie hieko geishü hiecie, kekreilamonyü no, he-i Jihova, n medo mhiei chüwate,” sita.

¹⁵Süla uko Jona chülie, sidi puo kelhoupie dzükezha nu shüwa, sitse dzükezha rüpfhüu la zeita.

¹⁶Sitse themiako Jihova prei kechüta, sidi uko ruosuo chüpie Jihova tsü, sidi uko die phrashü.

¹⁷Derei Jihovae Jona mezulieketuo la khuokezha puo keseshü; mu Jonae teisozha se tsiu teizeizha se khuou vadi nu zhü.