Read Angami Naga Nuolhoutsüphrü 10 Bible Online

Nuolhoutsüphrü 10 - Angami Naga bible

Nuolhoutsüphrü 10

¹Jihovae Mosa ki:

²No rakachü rükreipie ketsü kenie chülie; kehou kro-u kieketuo la mu razhüchü nu rüyieketuo la no sünie setuo.

³Mu uko ketsünie khoushü ro, kehou kro-u pete vor kehou pfhekiu kicie nu kengulietuo.

⁴Derei ukoe ketsü puo rübei khoushü ro, krütako mu Israelmia seyie krütako bu vor n mhodzünu kengulie morosuo.

⁵Siro no terhü tsükhou khoushü ro, niathutsa keba razhüchüko bu sie tuoshülie.

⁶Mu no terhü tsükhou va kenieu khoushü tse pekhrotsa keba razhüchüko bu tuoshülie. Terhü tsükhouu nieko tuoshüketuo ki setuo.

⁷Derei kehou kezha kehouketuo ki nieko ketsü khou morosuo, sirei terhü tsükhou khou hie.

⁸Siro Aron nuonuo zievoko bu ketsü khoutuo; sidi nie nuosenuoyie pete nu kechachie nieko la ketsükekhou pie thezho chütuo.

⁹Siro nieko kijü nu nieko ngumvümia nie pesekezhamia ze terhü chütuoü ro, nieko terhü tsükhou khoushü morosuo; sitse Jihova nie Kepenuopfü mhodzünu nieko rükralietuo, sidi nie ngumvümia kinu nieko kelalietuo.

¹⁰Siro nie kenei teisozha ki, mu nie thenyi ki, mu nie khrülhou kirei, nie kethe ruosuo mu kezekevi ruosuoko kechü ki niekoe ketsü khoukhou morosuo, sidi Ukepenuopfü mhodzünu nieko la kerükra puo chü di ketsü khoutuo: Ae Jihova nie Kepenuopfü zo.

¹¹Süsie cie kenie cie, khrü kenieu khrü zha mepfü nhie, dietseidiekhobou rüsuopfhekiu[21] mho geinu kimhou chüseta.

¹²Süla Israelmiakoe Sinai rayha nunu kro puopuo di tuo lashü, mu kimhou vo Paran rayha nu bata.

¹³Mu uko Jihova Mosa ki diekhakeshü mhie di uko rüve kenieu sede lashü.

¹⁴Therietho nu Juda nuomia razhüchü rüpfhünuoko tuoshü; mu Aminadab nuou Nahshon bu rüpfhünuoko mho kezha chü.

¹⁵Mu Zuar nuou Nethanel bu Isakar nuomia rüpfhünuo mho kezha chü.

¹⁶Helon nuou Eliab-e Zebulun nuomia rüpfhünuo mhokezhachü.

¹⁷Süsie rüsuopfhekiu rhuolie di Gershon nuomiako mu Merari nuomiako bu rüsuopfhekiu pie di tuoshü.

¹⁸Siro Reuben nuomia razhüchü pfhelhau khro kebako u thuo u rüpfhünuonuo idi tuoshü, mu Shedeur nuou Elizur-e puo rüpfhünuo mhokezhau.

¹⁹Siro Zurishadai nuo Shelumiel bu Simeon yiemiako rüpfhünuo mho kezhachü.

²⁰Deuel nuou Eliasaf-e Gad yiemiako rüpfhünuo mhokezhau chü.

²¹Süsie Kohatkoe kemesa nyako toupie di tuoshü; mu uko vo tsolie kemo nu kekreikoe rüsuopfhekiu pethou pie bata.

²²Süsie Efraim nuomia razhüchü pfhelhau khro kebako u thuo u rüpfhünuonuo idi tuoshü mu Amihud nuo Elishama bu rüpfhünuo mhokezha chü.

²³Mu Pedahzur nuou Gamaliel-e Manasseh yiemia nuonuoko rüpfhünuo mhokezhachü.

²⁴Mu Gideoni nuou Abidan-e Benjamin yiemia nuonuoko rüpfhünuo mhokezhachü.

²⁵Süsie Dan nuonuoko rüpfhünuo pfhelhau, razhüchü kenuotho-u, khrokebakoe u thuo u rüpfhünuonuo idi tuoshü, mu Amishadai nuou Ahiezer-e puo rüpfhünuo mhokezhau chü.

²⁶Okran nuou Pagiel-e Asher yiemia nuonuoko rüpfhünuo mhokezhau chü.

²⁷Mu Enan nuou Ahira-e Naftali yiemia nuonuo rüpfhünuo mhokezha chü.

²⁸Hamhie di Israelmiae u thuo u rüpfhünuo kro-u idi tuo lashü.

²⁹Süsie Mosae Midianmia Reuel nuou Hobab, Mosanuo meiu ki, “Hie Jihova thechü puo khapie hie tsütuoü di, ‘A süu kha nieko tsütuo’ idi pukeshüu nu votuoüzhie, süla no rei hie ze vocie, hie n la mhakevi chüshütuo mu, Jihovae Israelko ki mha kevi phrakeshü la” sishü.

³⁰Derei puoe puo ki, “A volie lho, a a thuo a kijü nu a themiamia ki votatuo” sita.

³¹Sitse puoe lasie, “A n ki chaya, hieko tseta hiecie, hiekoe rayha nu tuokecü noe siba mu noe hieko la themhi puo chü mhachütuo.

³²Mu no hie ze tuo ro, Jihova hie gei mhakevi kehoupuorei chükeshü khe, hie rei sükemhie n gei chüshütuo” sishü.

³³Süsie ukoe Jihova kijüthou geinu zha se tuo nu vota; mu uko kebachü pfhütuoü di, Jihova dietseidiekho bouue uko mhodzü zha se tuo rie vota.

³⁴Siro ukoe razhüchü nunu tuoshü tse Jihova kimhouu khinhie uko mhogei zhata.

³⁵Siro dietseidiekhobouu tuokeshü ki, Mosae sie, “He-i Jihova, sieliecie, n ngumvümia bu cüretalie cie, mu n rütseyakezhamia bu n mhodzünu nu tataliecie” isiya.

³⁶Mu süu bakecü ki, puoe sie, “Harie Jihova, Israelmia soünyie ketuoko ki rürei vorliecie” isiya.