Read Angami Naga Nuolhoutsüphrü 11 Bible Online

Nuolhoutsüphrü 11 - Angami Naga bible

Nuolhoutsüphrü 11

¹Siro themiako panyapara di die kesuo pupie Jihova nyie nushü mu Jihovae süu si tse puo nou tusieta. Sidi Jihova mi-e uko donunu tusier, di razhüchüu kithotsa huo thewa.

²Sitse themiako Mosa ki rükhruoshü; mu Mosae Jihova ki chashü tse miu mheta.

³Süla thechü süu za üse Tabera[22] üta, Jihova miu uko donu tuketa la.

⁴Siro uko donu kehoukeruomiakoe mha mehou seta, mu Israelmiako rei kra di sie, “Supuonie themuo khapie u tsütuo ga?

⁵Hie Ijipt kijü nu khuo puoma chü mo di cükecüko, tsütuoko, banyiko, sülanyüko, themera mu chümerieko rükra baya zo;

⁶derei tsie we hie kekuo sote, manna sie mha kekrei puo rei ngu mote” sita.

⁷Manna sü gatha si kemhie mu puorhi ngupie delium mhie.

⁸Themiako vo pa se vor di kegenya nunu getshielie morei ciekhe nunu thusalie di li nu bepie niekhrüda rie cülieya, mu puo kelhe tier sa di riekecü mhielieya.

⁹Uko razhüchü nu thevagei thezei krükeshü ki manna thezei mhogei tetsu zhülieya.

¹⁰Mosae themiako u thuo u pfheki kicie nunu idi kikha pete nu krakeba silie; süla Jihova nou vakerüpe sewa, mu Mosae puo nei mota.

¹¹Sitse Mosa sie Jihova ki, “No kiüdi n kituou bu kemezhie hita ga? Mu kiüdi ae n mhodzünu n khriepfülie mota di themia hako pete pie a gei shüta ga?

¹²A themia hako pete lhoupfüliete me mu? Ae uko ze taparkecü ki no a ki, ‘Nuo kenunuoyo toupfüyakezha tuoi di a bu uko pie a merü nunu toupfü vo,’ noe kijü khapie uko tsütuoü di u puonuoko ki rüseshü mo me?

¹³Themia hako pete tsüketuo la a kirapuo nu themuo ngu kekralie ta? Kekreilamonyü ukoe hie bu cüketuo la, ‘Themuo khashü hie tsücie’ idi a ki kraba zote.

¹⁴A a rübei di themia hako pete la thepieu pfülie kenjüte, thepie a la mesithorketa la.

¹⁵No a gei hakemhie chükeshü sie a bu hieshiehieruo dzü sa molieketuo la; a n mhingu ki n khriepfülie üro, vapuochü a dukhriwacie” sishü.

¹⁶Sitse Jihovae Mosa ki, “N kesi nu Israelmiako mhokezhachüyakezha pehümia hiethenie pfhüliecie, sidi uko ze vor kehou pfhekiu kicie nu n ze thaliecie.

¹⁷Sitse ae sünu ker di n ze kerüchütuo; sidi a ruopfü n gei keba huo chüpie uko gei shüwatuo; sitse ukoe n ze di themiako pieu kezapfülietuo, sidi n bu n rübei pfü molietuo.

¹⁸Mu themiako ki pushülie: Sodu la nie chü kemesawalie, mu nieko themuo cütuo; kekreilamonyü niekoe Jihova kesi kinu sie, ‘Úko cüketuo themuo ba ücüwe’ isita mu ‘Ijipt nu baketawe vikuotuo mu ru’ iketa la. Süla Jihovae themuo kha nie tsü di nie bu cütuoüya.

¹⁹A nieko bu khunhie, morei zha kenie, morei zha pengou, morei zha ker, morei zha mepfü zo mo nyü;

²⁰nieko nyhüki nunu par mu nieko bu ngu cümecü zota kemochie thekhrü pete cütuo: Nie-e nie donu keba Jihova khawa mu ‘Hie bu kiüdi Ijipt nunu parte shi’ idi puo mhodzünu kratacü la” si.

²¹Sitse Mosae sie, “Pephi ketuo themia nyie krie sorou a zetuo; mu noe sie, ‘Uko bu thekhrü pete cüketuo la a themuo khashü tuo’ isi.

²²Mu uko cüketuo la kirikro tsei tuo zo me? Uko bu tecüketuo dzükezha nu khuo uko kelhuo tuo me?” sita.

²³Sitse Jihovae Mosa ki, “Jihova kekuo puo thela nyi me?[23] A dieko chüketho vortuo mo mo shiü no tsie ngutuo” sita.

²⁴Süsie Mosae chazou pa di Jihova dieko pie themiako ki pushü. Mu puoe themiako donunu pehümia hiethenie pfhü ze vor di uko bu pfhekiu houpfü balie.

²⁵Süsie Jihova kimhouu nunu ker di puo ze kerüchü, mu ruopfü puo gei keba huo chüpie pehümia hiethenieko gei shüshü; mu ruopfüe süko gei volie tse ukoe siedzekesi die puta. Derei süsie ukoe sükemhie pu sa mota.

²⁶Mia kenie razhüchü nu bata, unie mia puo za Eldad mu kekreiu za Medad, tsiu ruopfüu unie gei bata: unie rei mia ze unie za thukeliemia zo derei unie pfhekiu nu volie mota, sidi razhüchü nunu siedzekesidie pu bata.

²⁷Sitse khriesamia puo ta vo Mosa ki, “Eldad mu Medad unie razhüchü nunu siedzekesidie pu bate” ishü.

²⁸Mu Nun nuou Joshua, Mosa chalie chüyakezhau, themiako donu puo kedakelieu[24] sie, “A Niepuu Mosa, unie khawaliecie” si.

²⁹Derei Mosae puo ki, “A la no n roya me? Jihova bu puo ruopfü pie Jihova themia peteko gei shüshü di uko bu siedzekesimia chü phrekelie we a kedithede a neituo ga?” sita.

³⁰Süsie Mosa mu Israelmia pehüko puo ze razhüchü nu vota.

³¹Süsie Jihova kinu teikhrie puo vor di dzükezha nunu vüpfhi rapfü se vor petepie razhüchü khie shüshü, razhüchü hatsa khunhie chatuo mese mu razhüchü lutsa khunhie chatuo mese, kijü mho thu kenie rükrie di razhüchü lutsa tshupfü zhülie.

³²Sitse themiako sie di sünhie zhate, mu süzhü teizeizha pete, mu süsie nhie zhate perako te kengulie. Te ketsatho-u zorei homer ker telie sidi uko süko pie u thuo u la razhüchü lutsahatsa kelhapie phielie.

³³Derei themiako themuo mekrapie di cüliekemo nu Jihova uko gei puo nei mota; sidi Jihova thesa kere se puo pie themiako biekhriwa.

³⁴Süla thechü süu za üse Kibroth-hatava[25] üsita. Kekreilamonyü thechü sünu themia kecahuokecümia khrukecü la.

³⁵Kibroth-hatava nunu themiako tuo se Hazerot nu vorlie, sidi uko Hazerot nu volie.