Read Angami Naga Nuolhoutsüphrü 12 Bible Online

Nuolhoutsüphrü 12 - Angami Naga bible

Nuolhoutsüphrü 12

¹Uko Hazrot nu kebaki, Miriam mu Aron-e Kushipfü la Mosa petsoukecü die puta (kekreilamonyü Mosae Kushipfü lieliekethocü la);

²sidi unie sie, “Jihova Mosa ki rübei mha puyakezha zo me? Puoe hie ki rei sa pushü mo me?” sita. Mu Jihova süu silie.

³Mu Mosae mene sekecü puo,[26] kijü nu themia pete ki rei menekuo.

⁴Sitse Jihovae rükri sie Mosa, Aron mu Miriam ki pu di sie, “Nieko mia seko, par di kehou pfhekiu nu voliecie” sita. Sitse uko seko parlie.

⁵Mu Jihova kimhou co puo nunu ker di rüsuopfhekiu kicie nunu thalie, di Aron mu Miriam unie kie, sitse unie tuo parlie.

⁶Sitse puoe sie, “A dieko rünyüliecie, nieko donu siedzekesimia bakecü ki, Jihova thuo ziemho nu a pie uko pesipengushü, morei uko mhogei nu u ze kerüchü.

⁷Derei a kituou Mosa ki we si mo, a kinu pete pie puo peseshü.

⁸Puo zowe a mhotsou, mecümecie di puo rüchüya, dievi nunu ya mo; sidi puoe Jihova rhiu nguya. Süla nnie kiüdi a kituou Mosa ngukemvü die pu michieya mo ga?” sita.

⁹Sidi Jihovae unie gei puo nei kemo tuta, di puoe tuota.

¹⁰Mu kimhou rei pfhekiu geinu rülheta, sitse harie, Miriam sü mpa chüpie pekrie kemhie krapouita; sidi Aron-e mehoshü ru, harie süpfü mpa chüketa ngulie.

¹¹Sitse Aron-e Mosa ki, “Harie, a niepuu, kephouma pieu pie hienie tsü geishü hienu di n ki chayawe, kekreilamonyü hienie mhasikemo mhatho chüwa di phoumawate.

¹²Puo zuo va nunu kepar ki, puo chü tietsa suo di penuokelie kemhieta hienu di ae chayawe” si.

¹³Sitse Mosae Jihova ki shie di sie, “He-i Kepenuopfü, puo chü pevishünu di ae n ki chaya,” si.

¹⁴Derei Jihova Mosa ki, “Mhanuü puo puoe mhitsiepie puo zie gei vashü ro, puoe zha thenie menga bata motuo me? Süla zha thenie razhüchüu chazoutsa nu puo khapie bacie, sidi süsie nu puoze la lerliecie” sita.

¹⁵Süla zha thenie Miriam khapie razhüchü chazou khapie ba di Miriam ze la ler kemochie themiako tuoshü mo bata.

¹⁶Süsie nu themiako Hazerot nunu tuoshü di vo Paran rayha nu uko razhüchü chülie.