Read Angami Naga Nuolhoutsüphrü 13 Bible Online

Nuolhoutsüphrü 13 - Angami Naga bible

Nuolhoutsüphrü 13

¹Jihovae Mosa ki,

²“A kijü khapie Israelko tsüketuo, Kanan kijüu rieketuo la, uko pfutsanuo pete donu krüta puopuokecü ketseshücie” sita.

³Süla Jihova diekhakeshü ze di, Mosae Paran rayha nunu uko ketseshü, uko pete rei Israelmiako donu krütamia phre.

⁴Mu uko za hako: Reuben yie nunu, Zakur nuou Shammua;

⁵Simeon yie nunu, Hori nuou Shafat;

⁶Juda yie nunu, Jefune nuou Kaleb,

⁷Isakar yie nunu Josef nuou Igal;

⁸Efraim yie nunu, Nun nuou Hoshea,

⁹Benjamin yie nunu Rafu nuou Palti.

¹⁰Zebulun yie nunu, Sodi nuou Gadiel;

¹¹Josef yie (morei Manasseh yiemia rei üyakezhau), Susi nuou Gadi.

¹²Dan yie nunu, Gemali nuou, Amiel.

¹³Asher yie nunu Mikael nuou Sethur.

¹⁴Naftali yie nunu Vofsi nuou Nahbi.

¹⁵Gad yie nunu, Maki nuou Geuel.

¹⁶Mosae kijü rietuoü di themia ketsekeshü hakoha. Siro Mosae Nun nuou Hoshea za thokedipie Joshua chüshü.

¹⁷Kanan kijü rietuoü di Mosa uko ketsekeshü ki, puo uko üse, “Nieko tuo Negeb tsatie volie, di tuo se kijüthou rünatsa khocie,

¹⁸sidi kijü kedipuomhie shi, morei themia lhoukebako meteiba mo thachüba shicü, morei ukoe tsa mo kra shi,

¹⁹mu uko lhoukeba kijüu vi mo mo shi tsiu uko lhoukeba nadiko puo dahou chüba mo mo shikecü;

²⁰siro kijü mha lhou kevi kijü mo mo shi, morei sünu sei nyi mo mo shikecü mehoshücie, sidi kijü sünu nhasi huo rie se vorcie” sishü. Sükisü khubesi me kerieu tei.

²¹Sükemhie di ukoe tuo Zin rayha nunu Lebo-hamath khieki keba Rehob ketso kijüko rieshü.

²²Ukoe Negeb nunu tuo Hebron nu vorlie; mu sünu Anak yiemiako Ahiman, Sheshai mu Talmaiko lhou ba. (Ijipt nu Zoan chükelie mhodzü cie thenie ki Hebron chülie.)

²³Sidi ukoe Eshkol razha nu vor, di sünunu khubesi phro puo biepie seipuo gei gulie di mia kenie bu pie vor; ukoe turaüsi mu chiedesi huo rei se vor.

²⁴Thechü süu za thopie Eshkol[27] razha chüta, kekreilamonyü Israelkoe sünunu khube phro puo biekelie la.

²⁵Ukoe kijü rieshü mu zha hiedia tuo di la vorta.

²⁶Sidi ukoe Paran rayha, Kadesh nu Mosa mu Aron mu Israelmiako kro-u pete ki vor, sidi uko dze pie unie mu themia kro-u pete ki pushü, mu kijü sünu nhasi pie uko pekieshü.

²⁷Sidi ukoe puo ki, “Hiekoe no hieko ketsekeshü kijü nu vowe; kijü sünu mithunudzü, mu mepfhidzü krukezhü ketho zo; mu haha sünu nhasi we.

²⁸Derei kijü sünu lhoukebako we kuo mu uko nadiko kuda chüpie houpfü ba mu zha rei sese, siro Anak nuosenuoyieko rei sünu keba hie nguwe.

²⁹Negeb kijütsa Amalekmia lhouba; mu kijüthou rünako nu Hitmia, Jebusmia mu Ammonmia lhou ba; siro dzükezha khie mu Jordan rü merhieko nu Kananmia lhou ba” sishü.

³⁰Derei Kaleb we Mosa mhodzünu nu themiako chü kethepfu di, “We mhai vo süu lielie khe, kekreilamonyü we kuolie mecie zo” sita.

³¹Derei themia puo ze kevoko we puo ki, “Úko themia hako petsou di kho rei krei mo; u ki kuokuokecü la” si.

³²Sidi ukoe vo riekeshü kijüu dze kesuo se vor Israelmiako ki pu di sie, “Hieko vo riekecü kijüu puo nu lhou kebako mezulieyakezha kijü puo; mu hie ngucü sünu keba themiako we zha mu cha sese phre.

³³Siro hie sünu Nefilim (Anakmiakoe Nefilim geinu lhou vor), rei ngu; tsiu uko khieki u ngupie we u mhinguki ku mhie zo” sita.