Read Angami Naga Nuolhoutsüphrü 14 Bible Online

Nuolhoutsüphrü 14 - Angami Naga bible

Nuolhoutsüphrü 14

¹Sitse themia kro-u pete melie shiekhouita, sidi süzhü themiako krata.

²Mu Israelmiako pete Mosa mu Aron unie gei kenyata; sidi themia kro-u pete unie ki, “Hie Ijipt kijü nunu siaketa we hie neikuotuo mu ru! morei hie rayha hanunu siaketa we hie neikuotatie!

³Kedipuo la Jihova hie ze vor di kijü hanunu hie bu zhiecha se chü sia ta? Hie nupfünuo mu hie nuonuoko mia bu telietie, hie bu la Ijipt nu voketa we hie la vikuo motuo me?” ita.

⁴Sidi ukoe huoniehuo ki, “Úko krüta puo pfhülie di la Ijipt nu vota khe” sita.

⁵Süla Mosa mu Aron unie-e Israelmiako kro-u pete mhodzünu unie zie pesupie thata.

⁶Sitse vo kijü riekecüko donu Nun nuou Joshua mu Jefune nuou Kaleb, unie-e unie pfhe cierhata

⁷di sie, Israelmia kro-u pete ki, “Hie vo kijü riekecüu kijü kevi se puo zo.

⁸Jihova uko ngu puo nei liro, puoe uko ze vo mithunudzü mu mepfhidzü krukezhü kijü hau nu shüshütuo.

⁹Jihova ngumvü di puo petsouta moliecie; morei kijü hau nu themiako preipie hiecie; themia sükoe u la niekhrüda zo; uko khrümvü uko zetuo mote, mu Jihova úko ze tuokecü la, uko preipie hiecie” sishü.

¹⁰Derei themia kro-u pete ketsie pie unie vatuoüta, sitse Jihova puo zayieu pie kehoupfhekiu nunu Israelmiako pete pekieshü.

¹¹Süsie Jihova Mosa ki, “Themia hako kedithechie a rütserücie tuotuo shi? Mu a uko donunu zasi neiü chüshü zorei uko kedithechie a pele mo tuotuo shi?

¹²A thesa se vor uko peka pejüwatuo mu uko kayie pejüwatuo, sidi a n chüpie n bu uko ki kuokuo mu zhakuokecü seyie puo chüwatuo” si.

¹³Derei Mosae Jihova ki, “Sikecü sie Ijiptmia süu sitie; noe uko donunu n kekuo pie themia hako ze parketa la,

¹⁴mu ukoe kijü hau nu lhoukebako ki pushü tie, no Jihova themiako hako donu bakecü ukoe site; harie Jihova, mia bu mhotsou n nguwate, mu n kimhou bu uko mhogei zhate mu no khinhie gei ro kimhou nu mu theva gei ro mi nu idi uko mhodzü tuoyakezha la.

¹⁵Süla no tsie mia puo kedukhri mhie di themia hako dukhriwa ro, n za kemeyie kesi themiakoe pu di,

¹⁶‘Jihova themia hako ze vo puo kijüpie uko tsütuoü di rüsekeshü tsolie kenjüketa la, puoe rayha nunu uko dukhriwa shie’ itie.

¹⁷Süla a tsie n ki a mezhiemeloya, no phrakeshü mhiei n kekuou bu zha philiecie, sidi sie,

¹⁸‘Jihovae puo nei mo rhütaya mo, mu puo kekhrie zhathor, mha kesuo kechü mu thezho kevarhuo rei vashüya, derei puoe kejo kechüu bu jo mo tsei zotuoya mo, puo puo kesuo kechü zhakhra khapie puo nuonuo phou seu phou diau gei rei shüya’ sita.

¹⁹Ae n ki chaya, noe Ijipt nunu vor tsie ketso themia hako kejo vashü uko tsü kevor mhie n kekhrie ngukemezhie kezha ze di tsieu va rei themia hako kejo vashü thienyü” sishü.

²⁰Süsie Jihovae sie, “N die mhie di a uko kejo vashüte ho;

²¹derei a rheituoya kethocü mhie, Jihova zayieu bu kijü pete tshulietuo.

²²Kekreilamonyü themia hako a zayieu ngu mu Ijipt nu mu rayha nu a zasiko ngu zoürei va ker a medophitazhie mu a die rünyü mvüte;

²³süla a pie uko tsütuoü di u puonuoko ki rüse pie kezhü kijüu uko bu ngulie lho, kehoupuorei a rütseyakezhau süu ngulie kenjü

²⁴Derei a kituou Kaleb-e ruopfü kekrei puo zetuo mu puoe a siemedzi toukelie la, a puo ze vo puo vokecü kijüu nu shüshütuo; mu puo se puo yie bu süu pie u vie chütuo.

²⁵Tsie Amalekko mu Kananko razhüu nu lhou baya, sodu nieko Kemerie Dzükezha[28] cha ze di rayha nu voliecie.”

²⁶Süsie Jihova Mosa mu Aron unie ki:

²⁷Zha kitsuo themia kesuo hako a gei panyapara tuotuo shi? Israelko a petsou di a gei panyaketuo a siliete.

²⁸Uko ki pushücie, Jihova hakemhie puya, “A rheiketuo mhie mu nieko a nyie nu pukeshü mhie, a chüpie nieko geishü zotuo;

²⁹nieko a gei kenyakecüko, u kelhouzha cie mepfü mu sümhoko, nieko kephrü nu phrükelieko pete kesia mo rayha hanunu khruwatuo,

³⁰Jefune nuou Kaleb, Nun nuou Joshua unie rübei sie a nieko bu rüna chütuoü di rüse piekezhüu nu volie lho zo.

³¹Derei nie nuonuo kecüko, niekoe mia bu uko telietuoü di kepuko a uko ze vo nie meliekewa kijüu nu shüshü zotuo mu kijü süu ngulietuo.

³²Derei nieko la we, nieko kesia moko rayha hanunu khruwatuo.

³³Tsiu nieko kesia moko cieürieta kemochie, nie nuonuoko bu nie pieü zhakhra toupfü di cie hiedia rayha nu rühou tuotuo.

³⁴Nieko zha hiedia kijüu rie tuokecü mhie di khunhie puo la cie puopuo kecü le di nie bu cie hiedia nie kesuokechü zhakhra toupfütuo, sidi nieko bu a nei mo baketa silietuo.”

³⁵A Jihova, haha pushüte, a petsou keba themia kesuo kro-u gei ae haha chüshü petuo zotuo. Uko bu rayha nunu katatuo mu uko bu hanunu siatatuo.

³⁶Süsie kijü rietuoü di Mosa themia ketsekeshüko rünau dze die kesuo se vor pushü di themia kro-u pete bu puo gei kenyate;

³⁷rünau dze kesuo se vorkeshüko, Jihova mhodzünu thesa kesuo ngulie di siatuo.

³⁸Derei vo rünau riekecüko donu Nun nuou Joshua mu Jefune nuou Kaleb unie rübei rheikelie zotuo.

³⁹Süsie Mosa die hako pie Israelko pete ki pushü ru, themiako u nousuo phita.

⁴⁰Mu ukoe khise rüna sielie, di kijükhru kerükrieko gei kholie di, “Hie Jihova phrakeshü thechüu gei kho; hie phoumawaketa la” si.

⁴¹Derei Mosa sie, “Mha hau chü khrielie kenjü zo, nieko kiüdi Jihova diekhakeshüu varhuoya ga?

⁴²Kho hiecie, Jihova nie ze tuo motacü la, ngumvümia mhodzünu nu nieko biekhrü pie zhüwakecü chü hiecie.

⁴³Kekreilamonyü Amalekmia mu Kananmia nie mhodzünu ba, mu nie zhiecha se chütuo: niekoe Jihova sie kemedzi nunu rüreiketa la, Jihova nieko zetuolie lhote” sishü.

⁴⁴Sidi uko kijükhru kerükrieko gei khota derei Jihova dietseidiekho bouu mu Mosa we razhüchüu nu tuo mo ba zo.

⁴⁵Sitse kijükhru gei lhoukeba Amalekko mu Kananko ker di Horma ketso uko whuo zo vo di uko penyüwa.