Read Angami Naga Nuolhoutsüphrü 15 Bible Online

Nuolhoutsüphrü 15 - Angami Naga bible

Nuolhoutsüphrü 15

¹Jihovae Mosa ki:

²Israelko ki pushülie: Nieko bu lhoutuoü di a pie nie ketsü kijüu nu vokelie ki,

³mithu morei temvü morei tekuo kro nunu mi morei kethe ruosuo morei ruosuo khapie Jihova tsü morosuo, nie rüse puo la morei nie kenei la khakeshü morei thenyi ki nu, puore kethengu ruosuo chüpie Jihova tsüketuo la,

⁴siro kehoupuorei ruosuo chüpie Jihova ketsüu bu thou kevitho efa puo ker za puo, pie tier hin ker za puo pie kereikecü;

⁵mu kekrie ruosuo la, khubedzü hin dia za puo, kethe ruosuo morei tekuonuo pie ruosuo chüketuoko puo thetse no keselie morosuo.

⁶Siro tekuo chü puo la thou kevitho efa ker za kenie mu tier hin puo se za puo kesa kerei di kesepie balie morosuo.

⁷Mu kekrie ruosuo la khubedzü hin puo se za puo pie Jihova mhodzünu puore kethengu ruosuo chütuo.

⁸Siro no thudo puo pie kethe ruosuo, morei rüse puo la ruosuo kechü, morei kezekevi ruosuo khapie Jihova ketsü ki,

⁹puo bu puo thudo mu thou kevitho efa ker za se pie tier hin puotie sa kereipie lhacülhale ruosuo chü morosuo.

¹⁰Mu no khubezu hin puotie pie kekrie ruosuo la mi pie the di puore kethengu ruosuo chüpie Jihova ki shütuo.

¹¹Süsie thudo morei tekuo chü puopuo la, morei tekuonuo chü morei temvü nuo puopuo la, hakemhie chü morosuo.

¹²Nieko khurinuo kidepuo pie ruosuo chütuoü ba shiü khurinuo puopuo la hakemhie chü morosuo.

¹³Mi nu thepie Jihova ki puorekethengu ruosuo chükecü nu khenu kelhoumia pete bu hamhie di hako chütuo.

¹⁴Siro solhimia vor nieko ze lhouketuomia puoe morei phou pete nu nie donu lhouketuomia puoe Jihova ki mi nu thepie puore kethengu ruosuo puo chütuoü ro, puo bu rei nieko chüyakezha kemhie chü zotuo.

¹⁵Thehouu nu zowe mu solhimia nieko ze lhouketuomia la rei thezho puo zotuo, phou petenu mu kechachie zho puo, phou petenu chazoumia rei Jihova mhodzünu nieko mhie zo.

¹⁶Nieko mu solhimia la rei nie ze lhouketuomia la rei thezho puo mu nanyü puo zotuo.

¹⁷Jihovae Mosa ki:

¹⁸Israelko ki pushücie: Ae nieko ze vokeshü kijüu nu volie tse,

¹⁹mu nie kijü süu niekhrüda kecü ki, nie ruosuo chüpie Jihova tsütuo.

²⁰Nieko thou nelie kerietho-u da puo pie ruosuo chü morosuo, shie nunu se vor ruosuo kechü mhiei di nie süu khashü morosuo.

²¹Nieko phou pete nu thou nelie kerietho-u se ruosuo chüpie Jihova tsütsütuo.

²²Derei mia puoe Jihova Mosa ki pukeshü diekhakeshü hako zelie mota ro, kekrüta zo.

²³Jihovae diekhakeshü teisozha nhie phou peteko nu Mosa ki diekhakeshüko pete,

²⁴kehou bu si mo di kekrüwa ro, kehou pete bu thudonuo puo pie puore kethengu ruosuo la mi nu thepie kethe ruosuo chü pie Jihova rüsuo morosuo, mu thezho medzi di lhacülhale ruosuo mu kekrie ruosuo chü morosuo, tsiu mvüdo puo pie kephouma ruosuo chü morosuo.

²⁵Mu zievo-ue Israelmiako kehou pete la ruosuo chütuo, sitse uko kejo vashütuo; kekreilamonyü uko le mo di kekrükewako, mu phoumaketako la rei, ruosuo se vor di Jihova mhodzünu mi nu thepie kethe ruosuo chükewa la.

²⁶Sidi Israelmia kehou pete kejo vashüwatuo mu solhimia uko donu lhouketuomia rei zotuo; kekreilamonyü themia peteko rei si mo di chükewa la.

²⁷Mia puoe si mo di phoumawa ro, puo bu temvü puoü cie puoketa yopuo pie kephouma ruosuo chütuo.

²⁸Sidi zievo-u bu mia puoe si mo di kekrükelie geinu phoumaketau la Jihova mhodzü ruosuo chütuo, sitse puo kejo vawatuo.

²⁹Israelko donu khenu kelhoumia shierei morei chazoumia nie donu lhouketuomia shierei si mo di kekrükewa la thezho puo zotuo.

³⁰Derei khenu kelhoumia shierei morei solhimia shierei si tou di kejokechüu we mhotsou Jihova rhu mowate; süla themia süu puo themia donunu puo kelhiwa morosuo.

³¹Kekreilamonyü themia süu Jihova die rünyü mo di puo diekhakeshüko varhuokewa la, themia süu kha tseiwa zotuo, puo bu puo mhatho kesuo zhakhra ngu tou zotuo.

³²Israelko rayha nu ketuo ki, ukoe mia puo sabat nhie sei pa kengutuo di ngulie.

³³Sitse ukoe sei pa kenguketuou ze Mosa mu Aron mu thehouu pete mhodzünu vor.

³⁴Sidi puo khapie bawa; puo gei kedipuo chü morosuo shi rhülie mokecü la.

³⁵Sitse Jihovae Mosa ki, “Themiau pesiawalie; razhüchüu chazoutsa nu thehouu pete bu ketsie pie puo vawa morosuo” sita.

³⁶Sitse Jihova Mosa ki diekhakeshü mhie, kehou pete puo ze razhüchü chazou pra di ketsie pie puo vakhriwa.

³⁷Jihova Mosa ki:

³⁸Israelko ki pushülie, uko bu u pfhephrie chülie di u pfhephrie puo kiko nu lophrie keloshü pie khelienushülie, thephou pete nu hakemhie chütuo.

³⁹Nie bu nie nou mu nie mhingu ki menguko medzi di rügerüzhüta molieketuo la, nie pfhephrie ngu di Jihova diekhakeshüko rükralie mu chüü zelie ketuo la.

⁴⁰Süla nieko bu a diekhakeshü peteko rükralie mu nie bu Ukepenuopfü kitsa mesa balieketuo la.

⁴¹Ae Jihova nie Kepenuopfü chütuoü di Ijipt kijü nunu nieko ze parkeshüu: Ae Jihova nie Kepenuopfü zo.