Read Angami Naga Nuolhoutsüphrü 16 Bible Online

Nuolhoutsüphrü 16 - Angami Naga bible

Nuolhoutsüphrü 16

¹Süsie Levi nuou Kohat, Kohat nuou Izhar, Izhar nuou Kora-e Reuben yiemia donu Eliab nuonie Dathan mu Abiram, mu Pelet nuou On rei sa,

²ukoe Israelmia kro-u donu krütamia huo themia kemeyiemia[29] krie kenie di hiepengou kie kengulie di Mosa ngumvü sie.

³Ukoe kepekrolie di Mosa mu Aron unie petsouta, sidi unie ki, “Nnie keyiethorte! Mia kro pete, mia puopuocü, mesa phre ba zo, mu Jihovae uko donu ba, süla nnie kiüdi Jihova kro-u ki zhakuoü bata ga?” ita.

⁴Mosa süu sishü tse, puo zie pesupfü bata.

⁵Sidi puoe Kora mu puo zeko ki, “Khise Jihovae suomia puo vie; mu suomia mesa mu suomia bu puo penuo votuo shicü thashütuo; puoe kedakelieu bu puo penuo votuo.

⁶Hau chüliecie: Kora mu n zeko pete, nieko mharekethengu kethebou selie;

⁷süko nu mi khashülie, mu sodu Jihova mhodzünu mi mhogei mharekethengu khapie baliecie; sümhie di Jihovae u kedakeliemia mesalietuo: Nie Levi nuonuoko keyiethorte” sita.

⁸Süsie Mosae Kora ki, “Nie Levi nuonuoko rünyüliecie!

⁹Nieko ze puo penuo vor di Jihova rüsuoki nu mhatho chüketuo la, Israelmiako donu, Israel Kepenuopfü nie kelakreikelie, nie süu üse mhakecü puo thenyüsieya me?

¹⁰No mu Levi nuonuo n siezedzürieko pete ze puo penuo vor mo me? Mu nie zievo rei chü sa nyüya me?

¹¹Süla no mu n kro-u pete Jihova ngumvü di kenguba me? Siro niekoe Aron gei kenya keba hau kedipuo ga?” sita.

¹²Süsie Mosa mia ketseshü di Eliab nuonie Dathan mu Abiram kie ru, unie kenienie sie, “Hienie khorlie lho.

¹³No rayha nunu hie dukhriwatuoü di mithunudzü mu mepfhidzü krukezhü rüna nunu hie ze ta parkecü haha mha kecü puoü me? Sidi no n thuo n üse hie mho dituo ütuo me?

¹⁴Sizomonyü no hie ze vo mithunudzü mu mepfhidzü krukezhü kijü nu shüshü lho, morei kiülie morei khubelie rei pie hie tsülie kenjükecü ngu mesate. No themia hako mhi kerülawa tuo me? Hienie khor lho” sita.

¹⁵Sitse Mosa puo neimo se di Jihova ki, “No uko ruosuo lie hiecie, a uko kinu gada puo rei lielie mo, morei uko miapuorei pechü mo zo” sishü.

¹⁶Sidi Mosae Kora ki, “Sodu no mu n kro-u pete Aron ze di Jihova mhodzünu vorcie.

¹⁷Mu kehoupuo rei mharekethengu bouu se phrelie di mharekethengu pie sünu shülie, sidi Jihova mhodzü mharekethengu kethebouu krie kenie di hiepengou se vorcie. No rei Aron rei mharekethengu kethebouu se phrelie,” sishü.

¹⁸Sitse uko u thuo u vie mharekethengu kethebou se phrelie di mi pie süko nu shülie di sümhogei mharekethengu khapie zhülie, di Mosa mu Aron unie ze vor kehou pfhekiu kicie nu thalie.

¹⁹Kora-e kehou kro-u pete ze vor uko petsou di kehoupfhekiu kicie nu uko mhodzü thalie, sitse Jihova zapuzayieu pie themia kro-u pete pengushü.

²⁰Süsie Jihovae Mosa mu Aron unie ki:

²¹Themia kro hau kinu nie thuo nie kerei kreiliecie, mhiphra puo nu a uko pejüwatuo mu.

²²Sitse unie unie zie pesupfü di sie, “He-i Kepenuopfü, themia puo ruopfü kenyi pete Kepenuopfü mia puo kephouma la no kehou kro-u pete gei n nei motatuo me?” sita.

²³Sitse Jihova Mosa ki:

²⁴Themia kro-u ki pushücie: Nieko Kora, Dathan mu Abiram uko nuoko lhoukebachü therhietacie.

²⁵Sitse Mosa sie di tuo Dathan mu Abiram unie ki vo mu Israel phichüko unie siemedzi vo.

²⁶Sidi puoe themia kro-u ki, “A nieki chaya, themia kerüzhü hako pfheki nunu tuotacie, mu uvie puorei nyü hie, u kephoumako bu nie zoupfüta rei si lho mu” si.

²⁷Süla uko Kora, Dathan mu Abiram uko kebachü therhieta; sitse Dathan mu Abiram unie unie nupfünuo, unie nuonuoko mu unie nuonuo kecükoyo ze di par unie pfheki kicie nu thalie.

²⁸Sitse Mosa sie, “Mha hako chütuoü di Jihova a ketsekeshü nieko silietuo, a thuo a medo nunu mokecü la.

²⁹Themia hako lhenu zho tuoi siakecü sie, morei mia pete gei voryakezha tuoi uko gei vorkecü sie, Jihova a ketseshü mo.

³⁰Derei Jihova mha kesa puo chüshü di kijüu bu puo me mekuopie uko mu uko vie peteko mezulie, sidi uko bu rhei zo di Sheol nu keta ro, nieko themia hako Jihova thepesuowa ücü lelie morosuo” sita.

³¹Süsie Mosae die hako pu theshü tsemetha uko ketha khro kijü rükota;

³²sidi kijüue puo me mekuoshü di uko kinuko mu Kora themiako mu uko vienyako pete mezulie.

³³Sükemhie di uko mu uko vieko pete rhei di Sheol nu keta; sidi kijü bu uko luopfülie di kehouu donunu uko pejüwa.

³⁴Sitse Israelmia uko houpfü kethako uko melie ruorükecü si di tata, kekreilamonyü ukoe sie, “Kijüue u rei mezulie rei si lhomu” ikecü pu.

³⁵Siro Jihova kinu mi par di mharekethengu thepie ruosuo chükecüko mia krie kenie di hiepengouko thekhriwa.

³⁶Süsie Jihovae Mosa ki:

³⁷Aron zievo-u nuo Eliazar ki pushücie; sidi puo bu mharekethengu kethebouko mi tukeba chü nunu chülie di se vor kepecie nunu lawacie; kekreilamonyü sükoe mesa zo.

³⁸Kephouma themia hako siakeshü nunu mharekethengu kethebouko mesaketa la. Süko ketsapie ruosuobau kege chüliecie; uko süko pie Jihova rüsuowatakecü la, süko mesa zo, mu sükoe Israelmiako la zasi puo chütatuo.

³⁹Süla Eliazar zievo-ue mi bu u thekhriwaketako ruosuo chükeshü merenyi ketsapie ruosuobau kege chülie,

⁴⁰süusü Jihovae Mosa ki pukeshü mhie, Aron yie kemo rüsomia puo bu rei Jihova mhodzünu vor di mharekethengu thepie ruosuo chü di Kora mu puo kro-u mhieta moketuo Israelmiako bu rükra tuolieketuo la süu chülie.

⁴¹Derei süsie nhie Israelmiako kro-u pete Mosa mu Aron unie gei panya di, “Nnie Jihova themiako dukhriwate” sita.

⁴²Siro themia kro-u Mosa mu Aron unie ngumvü di kehou keba ki, uko rürei kehoupfhekiu tsatie vashü, ru harie, kimhoue vor süu zepfü bata, mu Jihova zapuzayieu pengushü.

⁴³Tsiu Mosa mu Aron unie kehoupfhekiu mhodzütsa vor,

⁴⁴sitse Jihovae Mosa ki,

⁴⁵“A bu uko peka pejü mhaiwaketuo la no themia kro hau donu nu tuotaliecie,” sita.

⁴⁶Sitse Mosae Aron ki, “N kethebouu selie di ruosuobau nunu mi liepie sünu shülie di sügei mharekethengu khashü di se mhai themia kro-u ki voliecie, sidi uko phou chü kemesa ruosuo chüwacie; Jihova noupfhü parte; mu thesau sierte” sita.

⁴⁷Mosa pukeshü mhie mu Aron-e puo kethekhou selie di ta kehou donu vo; süki harie, themiako donu thesa sierbata; süla puoe mharekethengu khashü di themiako phou mesaketuo la ruosuo chüshü.

⁴⁸Sidi puo kesiako mu kerheiko donu nu thalie di thesau khawa.

⁴⁹Kora nyie nu siaketako zo kemo thesa hau nunu zocü mia nyie keredia di krie thenie siata.

⁵⁰Thesau khakewa sie Aron-e kehoupfhekiu kicie nu Mosa ki la vorta.